"Такія пытанні на вуліцы не вырашаюцца": Пуцін адказаў на заклік далучыць "ДНР" і "ЛНР" да Расіі
Прэзідэнт Расіі Уладзімір Пуцін пракаментаваў прапановы ўключыць так званыя самаабвешчаныя "Данецкую і Луганскую народныя рэспублікі" ў склад Расіі.
«Мы душой і сэрцам з Данбасам, але, на жаль, такія пытанні на вуліцы не вырашаюцца. Гэта сур'ёзнае пытанне, якое тычыцца лёсаў ўсёй Расіі і людзей, якія пражываюць на Данбасе», — цытуюць РИА "Новости" Пуціна.
Так Пуцін пракаментаваў "просьбу аднаго з турыстаў у Ялце". Той падчас прагулкі Пуціна і экс-прэм'ера Італіі Сільвіё Берлусконі па гарадской набярэжнай звярнуўся да расійскага прэзідэнта з заклікам уключыць Данбас ў склад Расіі.
Каментуючы цяперашнюю сітуацыю на ўсходзе Украіны, Уладзімір Пуцін падкрэсліў, што альтэрнатывы Мінскім пагадненням па ўрэгуляванні канфлікту няма, аднак можна падумаць з нагоды пераносу тэрмінаў рэалізацыі дамоўленасцей.
"Вось спадар Кучма сказаў пра гэта, пра тое, што не паспяваюць усё зрабіць. У прынцыпе можна падумаць пра нейкі перанос тэрмінаў, але лепш імкнуцца, каб усё было выканана ў тэрмін", — сказаў Пуцін.
Што тычыцца выканання Мінскіх пагадненняў, то альтэрнатывы ніякай іншай, на мой погляд, няма. І самае галоўнае, што трэба зрабіць, гэта трэба наладзіць прамы кантакт паміж кіеўскімі ўладамі і "ўладамі" "Данецкай і Луганскай рэспублік" з тым, каб рэалізаваць Мінскія пагадненні», — сказаў прэзідэнт Расіі.
«І змены ў Канстытуцыю, і закон аб мясцовых выбарах павінны быць прыняты па ўзгадненні з Данбасам. Такога ўзгаднення не праводзіцца. Гэта ключавая праблема», — заявіў ён.
Ён заявіў, што таксама павінен быць прыняты закон аб амністыі. «Як можна весці дыялог з людзьмі, якія знаходзяцца пад крымінальным пераследам? Трэба, нарэшце, увесці ў дзеянне ўжо прыняты раней Радай закон аб адмысловым статусе гэтых тэрыторый. Гэта ключавыя элементы менавіта палітычнага ўрэгулявання», —дадаў прэзідэнт РФ.
31 Жніўня Вярхоўная Рада на пазачарговым паседжанні прыняла ў першым чытанні змяненні ў Канстытуцыю ў частцы дэцэнтралізацыі. Згодна з рэгламентам Вярхоўнай Рады, парламент папярэдне ўхваляе законапраект (у першым чытанні) мінімум 226-ю галасамі. Затым на наступнай сесіі для канчатковага прыняцця закона аб унясенні змяненняў у Канстытуцыю неабходна не менш за 300 галасоў парламентарыяў.