«Калі ўбачыла разлік, апусціліся рукі». Баранавіцкія педагогі — пра свае заробкі, налічаныя па-новаму
Са студзеня работнікам бюджэтных арганізацый зарплату налічваюць па новай сістэме. 10 лютага баранавіцкія педагогі атрымалі зарплаты, налічаныя па-новаму. Што змянілася і чаму сумы ў разлікоўцы ў некаторых работнікаў адукацыі зменшыліся?
Галоўныя новаўвядзенні сістэмы налічэння заробкаў бюджэтнікам, якая пачала дзейнічаць са студзеня, — замена тарыфнай стаўкі першага разраду базавай стаўкай, памяншэнне колькасці тарыфных разрадаў з 27 да 18, скарачэнне колькасці надбавак і даплат. Па плане прымяненне пры налічэнні зарплаты базавай стаўкі павялічыць памер акладу бюджэтнікаў, а мінімізацыя колькасці надбавак зробіць разлік зарплаты прасцейшым і лагічнейшым.
Не паменшыць зарплату
Яшчэ да ўвядзення новай сістэмы ўлады абяцалі, што рэальныя зарплаты ў бюджэтнай сферы з-за новай сістэмы не паменшацца. А Аляксандр Лукашэнка заявіў, што «разбярэцца з усімі», хто ўносіў прапановы па змене схемы выплаты заробкаў бюджэтнікаў, калі хтосьці атрымае «на рубель менш» пры такой жа нагрузцы, як цяпер.
— Напярэдадні прэзідэнцкіх выбараў хіба можа дзеючы прэзідэнт сабе дазволіць памяншаць заработную плату для тых, на каго ён у асноўным абапіраецца? Гэта выкладчыкі, настаўнікі, лекары — бюджэтнікі, — сказаў кіраўнік дзяржавы падчас наведвання Беларускага дзяржаўнага медуніверсітэта ў снежні мінулага года. — Умова галоўная: ні ў якім разе рэфармаванне, мадэрнізацыя сістэмы выплаты заработнай платы бюджэтнікам не павінны паменшыць гэтую зарплату.
Па дадзеных Мінпрацы, у бюджэце на 2020 год прадугледжаны фонд аплаты працы, які забяспечвае сярэднегадавое павышэнне зарплаты ў бюджэтнай сферы не менш чым на 10% у параўнанні з 2019 годам.
«Памылкі магчымыя»
Усе работнікі ўстаноў адукацыі, з якімі ўдалося пагаварыць, распавядаюць, што ў канцы мінулага — пачатку бягучага года з імі правялі нарады з нагоды новай сістэмы аплаты працы. Праўда, ніякай канкрэтыкі, распавядаюць педагогі, яны тады не пачулі.
— Сказалі, што заробкі будуць налічваць па-новаму, што разлікоўкі будуць больш простымі, зразумелымі. А што і як будуць лічыць — ніхто толкам не патлумачыў. Адзінае — паабяцалі, што памер зарплаты, хутчэй за ўсё, не зменіцца, — расказвае настаўнік адной са школ горада.
Яшчэ адзін работнік адукацыі кажа, што «каб пазбегнуць непаразуменняў» адміністрацыя параіла параўноўваць студзеньскія зарплаты не з снежаньскімі, а з лістападаўскімі.
— У снежні, у канцы года, зарплаты звычайна вышэйшыя, таму нам сказалі, што ў студзені атрымаем на ўзроўні лістапада, — кажа суразмоўца.
У некаторых установах адукацыі настаўнікаў папярэдзілі, што «нейкія адхіленні ў зарплаце магчымыя», але гэта часовая з'ява.
— На нарадзе папярэдзілі, што гэта апрабацыя, што магчымыя нейкія памылкі, пралікі, але потым усё ўстане на свае месцы, — кажа настаўнік адной са школ.
Колькі атрымалі педагогі
Работнікі ўстаноў адукацыі горада распавядаюць, што, нягледзячы на абяцанне ўладаў захаваць зарплаты на ўзроўні снежня, студзеньскія палучкі ў многіх апынуліся ніжэйшымі.
— Аклады ў некаторых педагогаў нават павялічыліся. Але калі лічыць увесь заробак, з рознымі даплатамі, то цяпер я атрымала менш — у параўнанні і са снежнем, і з лістападам, — расказвае настаўнік адной са школ горада.
Прычым калі ў адных работнікаў адукацыі зарплаты зменшыліся не моцна, а ў кагосьці выраслі ці не змяніліся, то ў іншых — упалі значна.
— У мяне студзеньская зарплата рублёў на 30 ніжэйшая за снежаньскую. Гэта невялікая розніца, да таго ж у снежні рабочых дзён было 25, а ў студзені — 24, — кажа настаўнік адной са школ горада. — Але ў некаторых маіх калег заробкі ўпалі істотней, розніца са снежнем даходзіць да 100 рублёў.
Яшчэ адна працаўніца адукацыі распавядае, што і ў яе зарплата «знізілася прыстойна».
— Зараз у разлікоўцы і 800 рублёў няма. У каго ні пытаюся — ва ўсіх сітуацыя з заробкам розная. У прадметнікаў усё нядрэнна, а настаўнікам пачатковых класаў заплацілі менш, чым у снежні. У бібліятэкара заробак упаў рублёў на 10, у тэхперсанала — прыкладна на 5, — кажа яна.
І хоць у нюансы налічэння зарплаты па новых правілах баранавіцкія педагогі не паспелі ўглыбіцца, яны заўважаюць, што істотна паменшылася аплата стымулюючых заняткаў, замены урокаў.
— Калі раней настаўнік з вышэйшай катэгорыяй і вялікім стажам працы за замену урока атрымліваў каля 8 рублёў, то цяпер — прыкладна 4, — дзеліцца настаўнік.
Некаторыя педагогі прыйшлі да высновы, што зменшылася плата за катэгорыю, а «матэрыяльнай дапамогі» ў разлікоўцы і зусім няма.
Аб памяншэнні заробкаў кажуць і некаторыя работнікі дзіцячых садкоў.
— Атрымліваецца, выхавальнік з вышэйшай катэгорыяй і стажам больш за 10 гадоў на рукі атрымаў на 100 рублёў менш, — кажа працаўніца адной з дашкольных устаноў горада.
Зрэшты, некаторыя педагогі распавядаюць, што іх заробак, у параўнанні са снежнем не змяніўся, а іншыя кажуць, што нават вырас.
— Я атрымала рублёў на 20 больш, чым у снежні. З чым гэта звязана — пакуль не зразумела. Спадзяюся, не якая-небудзь памылка, — кажа суразмоўца.
«Разабрацца пакуль складана»
Педагогі распавядаюць, што пасля ўвядзення новай сістэмы змяніліся не толькі сумы ў разліковых лістах, але і самі разлікоўкі сталі іншымі. Колькасць радкоў у іх паменшылася, але ці сталі яны больш зразумелымі для настаўнікаў — вялікае пытанне. Прынамсі, пакуль. Напрыклад, яшчэ не ўсе работнікі адукацыі разумеюць, што ўваходзіць у надбаўку «за спецыфіку работы ў сферы адукацыі», «за высокія дасягненні ў працы» і да т.п.
— Радкоў у разлікоўцы стала амаль у два разы менш. Праўда, разабрацца, дзе і што, пакуль складана. Амаль усе назвы новыя. Адміністрацыя спрабуе нешта растлумачыць, але, мабыць, да гэтай сістэмы трэба прывыкнуць. Асабіста я да гэтага часу не магу зразумець, у які з відаў надбавак уваходзіць даплата за катэгорыю, — распавядае педагог.
Параўноўваць трэба без прэміі
У цэнтралізаванай бухгалтэрыі пры кіраванні адукацыі Брэсцкага аблвыканкама Intex-press паведамілі, што «зарплаты ў настаўнікаў не зменшыліся», і звярнулі ўвагу на тое, што, згодна з Указам №27 ад 18 студзеня 2019 года «Аб аплаце працы работнікаў бюджэтных арганізацый», пры ўвядзенні новай сістэмы аплаты працы не дапускаецца зніжэнне памераў налічанай заработнай платы, але без уліку прэміі, якую настаўнікі атрымалі ў снежні. На гэты нюанс (снежаньскія прэміі) звяртае ўвагу таксама Міністэрства працы і сацыяльнай абароны. Паводле інфармацыі ведамства, студзеньскія заробкі бюджэтнікаў і да ўвядзення новай сістэмы былі меншымі за снежаньскія, таму што «штогод у канцы года выплачваецца прэмія ў павялічаным памеры за кошт назапашанай эканоміі фонду аплаты працы».
У цэнтралізаванай бухгалтэрыі кіравання па адукацыі Баранавіцкага гарвыканкама таксама гавораць, што некаторыя прэміі, надбаўкі, выплачаныя педагогам у апошнім месяцы года, не ўлічваюцца пры параўнанні студзеньскіх і снежаньскіх заробкаў, і дадаюць, што новая сістэма налічэння зарплаты толькі пачала дзейнічаць і ўсе пытанні вырашаць.
— Усё новае. Нешта, можа, і не ўлічылі і, калі будуць нейкія нюансы, усё перагледзяць, — растлумачылі ў бухгалтэрыі.
Педагогі спадзяюцца, што ў наступным месяцы сітуацыя з заробкамі сапраўды высветліцца. Прынамсі, гэта ім абяцаюць дырэктары школ, загадчыкі дзіцячымі садамі.
— Будзем чакаць, вядома. Я люблю сваю працу, але, калі ўбачыла разлік за студзень, проста апусціліся рукі, — кажа выхавальніца дзіцячага саду.