Чаму нельга збіраць кветкі-першацветы?

Вось-вось у лясах Беларусі з'явяцца першыя дзікарослыя кветкі, а разам з імі — сотні нелегалаў у пераходах, якія вырашылі прадаць вам кавалачак вясны.

Згодна з беларускім заканадаўствам, збор першацветаў-чырванакніжнікаў знаходзіцца пад забаронай — і гэта нездарма, піша «Экадом».

Нават адзін букецік нельга? А калі для маці?

Самыя раннія кветкі, якія з'яўляюцца пасля зімы, займаюць асаблівую экалагічную нішу. Яны з'яўляюцца важным кампанентам прыродных біяцэнозаў — першымі меданосамі і лекавымі сродкамі для фаўны лесу; захоўваюць цэласнасць глебавага покрыва, што асабліва важна ў перыяд пераўвільгатнення глебы.

Знішчэнне гэтага звяна з экалагічнай ланцужкі немінуча прывядзе да яе парушэння.

Пад катэгорыю «недатыкальных» трапляюць розныя расліны, сярод якіх:

• раўнаплоднік васілістнікавы
  
• прастрэл раскрыты, ці сон-трава
• прастрэл лугавы
• чубатка полая
• чубатка прамежкавая
• медуніца вузкалісная
• медуніца мяккая
• чарамша
• ветраніца дуброўная
• купальніца еўрапейская

Звярніце ўвагу, што пралеска беласнежная — тая самая кананічная пралеска, якой мы часта называем усе першацветы — да іх не належыць, аднак і знайсці гэту расліну можна толькі на крайнім поўдні краіны.

А што мне за гэта будзе?

Збор першацветаў, уключаных у Чырвоную кнігу Беларусі, цягне за сабой адказнасць, прадугледжаную арт.16. 8 КаАП, а менавіта:

• для фізічных асоб — штраф ад 20 да 30 базавых велічыняў;
• для ІП — ад 20 да 100 базавых велічыняў;
• для юрыдычных асоб — ад 35 да 500 базавых велічыняў.

Цяпер адна базавая велічыня складае 37 рублёў, а значыць, фірма можа «ўляцець» на 18,5 тысяч рублёў, а жанчына ў пераходзе Камароўкі — на 1110 рублёў. Абавязкова нагадайце ёй пра гэта, як убачыце букецік у руках.

Вядома, за куплю першацветаў адказнасці не прадугледжана, але калі вы набываеце кветкі-чырванакніжнікі, вы заахвочваеце іх знішчэнне і незаконныя дзеянні прадаўцоў.

Папярэдні слайдНаступны слайд

Калі ўсё ж такі можна гандляваць першацветамі?

Калі вырасціць кветкі ва ўласным садзе, а не сабраць у лесе, тады можна распараджацца імі як заўгодна, у тым ліку прадаваць. Праўда, для гэтага ў прадаўца павінен быць пацвярджальны дакумент, а гандляваць неабходна ў спецыяльна адведзеным месцы.

Дарэчы, за гандаль у неўстаноўленым месцы таксама прадугледжаны штраф ад 5 да 50 базавых велічынь для фізасобы. Так што калі праваахоўнікі вырашаць аштрафаваць за ўсё, атрымаецца значная сума. Пытанне, ці варты таго гандаль кветкамі?