Хто будзе лекаваць людзей? Нікога гэта не хвалюе

Крызіс у сферы, дэфіцыт высокатэхналагічных кадраў — такія наступствы затрыманняў медыкаў пералічвае экс-кіраўнік РНПЦ «Кардыялёгія» Аляксандар Мрочак, — паведамляе Радыё Свабода.

«У Беларусі дэфіцыт кадраў у медыцыне — каля 4 тысяч чалавек. Не хапае лекараў. Рэальны дэфіцыт кадраў сярод лекараў, якія ведаюць высокатэхналагічныя падыходы ў лячэнні пацыентаў. Іх няшмат і на рахунку кожны», — кажа доктар.

На думку Аляксандра Мрочака, кадравы адток са сфэры медыцыны ўжо ідзе. Людзі з’яжджаюць з краіны.

«Уся сітуацыя яшчэ ўскладняецца каранавірусам. Але гэта ўсё не хвалюе нікога з тых, хто прымае рашэнні», — кажа лекар.

Паводле доктара Змітра Салошкіна, нават адзінкавыя затрыманні «ўскладняюць працу». А калі гэта вузкія спецыялісты, то іх «няма каму замяніць».

«Калі чалавек не трапляе на адну змену ці адсутнічае дзень ці два — то яго трэба некім замяняць, нешта змяняць у раскладзе. Медычны працэс ня любіць такіх тэрміновых пертурбацыяў. Доктару складана ўсё даведацца пра ўсіх пацыентаў пасля такіх перастановак. Ніхто не прымусіць людзей працаваць у такім рэжыме, заробкі ня надта трымаюць і не кампенсуюць пакутаў сумлення», — кажа Зміцер Салошкін.

Доктар упэўнены, што сярод медыкаў ёсць салідарнасць і штрайкбрэхераў таксама ня будзе.

«Можна справакаваць ад’езд людзей. 60 чалавек затрымалі — а наступным днём пасля такога можа быць вымушаны страйк. Напрыклад, чалавека затрымліваюць, а ён адмысловец, рэаніматолаг, напрыклад. Аднаго ня будзе — і ўвесь працэс стане, і гэта будзе страйк рукамі міліцыі», — разважае Салошкін.

5 лістапада Аляксандар Лукашэнка прыгразіў не пускаць у Беларусь лекараў, якія з’ехалі працаваць за мяжу. Аднак лекары з’яжджаюць ня толькі ў заходнія краіны, але і ў Расею, кантролю на мяжы з якою няма.

«І да гэтых падзеяў, і цяпер Расея нармальна канкуруе з Польшчай за беларускіх лекараў. З гледзішча грошай для пачаткоўцаў умовы досыць прывабныя. Беларускі дыплём там адразу цэніцца, бо відавочна, што яго не купілі. Гэтыя людзі вучыліся. Можна заблакаваць Польшчу, але побач Расея», — даводзіць Зміцер Салошкін.

Паводле Белстату, у 2019 годзе ў сфэры аховы здароўя і сацыяльных паслугаў працавала 328,1 тысячы чалавек.