«Лікі святых павінны спрыяць правільнаму выхаванню»
Нядаўна са Свята-Пакроўскага кафедральнага сабора ў Гродне прыбралі абразы навамучанікаў, якія пацярпелі ў ХХ стагоддзі ад бальшавіцкага рэжыму. У адным з праўладных тэлеграм-каналаў іх знікненне патлумачылі «непрымальнымі ў такім богаўгодным месцы сцэнамі гвалту і варожасці».
Нагадаем, іконы з'явіліся ў цэнтральным нефе храма ў 2006 годзе. Усяго іх было восем. На іх былі намаляваны святары падчас свайго пакутніцтва за Хрыста. Каты — чырвонаармейцы і супрацоўнікі НКУС — апранутыя ў сваю форму. Цяпер з васьмі абразоў два, самыя блізкія да алтара, зніклі. На іх намаляваны свяшчэннамучанікі Уладзімір, мітрапаліт Кіеўскі (закатаваны ў 1918 годзе) і Веніямін, мітрапаліт Петраградскі (расстраляны ў 1922 годзе).
У тэлеграм-канале «Гродна медыя Group», звязаным з Гродзенскім аблвыканкамам, раскрытыкавалі агалоску, якую атрымала знікненне абразоў з храма, пішуць «Белнавіны».
«Гэты факт спрабуюць, як звычайна, перакручваць і паднесці як нешта дрэннае і няправільнае, хоць кожны з нас ведае, што любая духоўная вера — гэта вера ў любоў, у дабро і міласэрнасць», — сцвярджаюць аўтары і паведамляюць, што абразы прыбралі з-за «непрымальных у такім богаўгодным месцы сцэн гвалту і варожасці».
Глядзіце таксама
«Любая царква павінна вучыць верацярпімасці, беражлівым адносінам да гістарычнай і культурнай спадчыны ўсякага народа. Ідучы ў Храм Божы, чалавек шукае супакаенне, у тым ліку праз візуальнае светапогляд. Выявы лікаў святых павінны натхняць на станоўчыя эмацыйныя перажыванні і спрыяць правільнаму этычнаму і маральнаму выхаванню», — напісалі ў канале.
Выданне Hrodna.life звяртае ўвагу, што сцэны гвалту існуюць на мностве абразоў. У гісторыі царквы ёсць пакутнікі, уключаючы факт бічавання самога Ісуса Хрыста, — традыцыйна яны малююцца на абразах. Вынікаючы логіцы ўладаў, прыбраць трэба не толькі два абразы, зніклыя са Свята-Пакроўскага кафедральнага сабора.
Гарадзенскія абразы заўсёды раздражнялі мясцовую ўладу і праўладных і прарасійскіх актывістаў, самай гучнай з якіх была «інфаказачка» Вольга Бондарава. Але царква доўгі час ігнаравала патрабаванні зняць іконы.
Афіцыйна ў Гродзенскай епархіі знікненне абразоў не каментавалі.
Глядзіце таксама
