У абноўленым ARCHE палітыкі паменее
Каб пазбегнуць магчымых трэнняў з уладамі, рэдакцыя пайшла на некаторыя саступкі. «Мы адмовіліся ад класіфікацыі сябе як грамадска-палітычнага выдання, паколькі гэта фармулёўка нам і
стварала масу праблем», — паведаміў Булгакаў.
Нагадаем, праблемы ў часопіса «Arche. Пачатак» пачаліся з затрымання галоўнага рэдактара Валера Булгакава. Яго затрымалі 14 верасня 2012 года ў Гародні на прэзентацыі кнігі «Саветызацыя Заходняй Беларусі» і абвінавацілі ў незаконнай прадпрымальніцкай дзейнасці. 21 верасня супрацоўнікі дэпартамента фінансавага расследавання (ДФР) Камітэта дзяржкантролю прыйшлі ў друкарню, дзе друкаваўся часопіс, з праверкай, а неўзабаве з друкарні былі выняты ўсе дакументы за апошнія два гады дзейнасці Arche.
2 кастрычніка было арыштавана больш пяці тысяч асобнікаў кніг у Булгакава, праз два дня ў ДФР выклікалі заснавальніка «Arche. Пачатак» Андрэя Дынько. Каб выратаваць часопіс ад зачынення, рэдакцыя прыняла рашэнне вызваліць Булгакава ад пасады рэдактара, але нягледзячы на гэта ДФР заблакаваў рахункі выдання і пачаў выклікаць яго супрацоўнікаў для дачы тлумачэнняў. Кіраўніцтва рэдакцыяй перайшло да Алеся Пашкевіча.
18 кастрычніка Булгакава за незаконную прадпрымальніцкую дзейнасць аштрафавалі на 500 тысяч рублёў. Асцерагаючыся крымінальнага пераследу, напачатку лістапада ён пакінуў Беларусь і каля пяці
месяцаў быў змушаны жыць за яе межамі.
Спробы перарэгістроўваць «Arche. Пачатак» рэдакцыя прадпрымала з лістапада 2012 года. Апошняя адмова ў рэгістрацыі Міністэрства інфармацыі аргументавала парушэннем працэдуры
падачы дакументаў.
26 сакавіка стала вядома, што банкаўскі рахунак часопіса разблакаваны, крымінальная справа па факце праверкі рэдакцыі выдання ўзбуджацца не будзе. 12 красавіка з'явілася інфармацыя, што крымінальная справа ў стаўленні Валера Булгакава ўзбуджана не будзе.
У інтэрв'ю БелаПАН Булгакаў распавёў, што вярнуўся ў Беларусь каля месяца назад. Па яго словах, за мяжой людзі ўвесь час раілі яму «забыцца пра Беларусь, падаваць дакументы для атрымання выгляду на жыхарства, будаваць новае жыццё».
«Але я знайшоў у сабе сілы, каб адмовіцца ад гэтых ідэй, і, як паказала жыццё, гэта было правільнае рашэнне», — адзначыў Булгакаў.
Разважаючы над матывамі рашэння Мініінфармацыі, ён адзначыў: «Элементарна справядлівасць перамагла. Мы прайшлі праз скрупулёзныя праверкі, якія праводзілі лепшыя
афіцэры фінансавай міліцыі Беларусі, лік інспектараў ішоў на дзясяткі. Вядома, дзякуй беларускай дзяржаве за такую ўвагу, але ў выніку пасля ўсіх праверак высвятлілася, што мы нічога не парушылі,
нідзе не растапталі літару закона. Нас нават не аштрафавалі пасля такіх зубаскрышальных праверак».
На пытанне, ці лічыць ён, што на рашэнне пра перарэгістрацыю мог паўплываць палітычны фактар (спробы Беларусі наладзіць адносіны з ЕС), галоўны рэдактар «Arche.
Пачатак» адказаў, што ён не з'яўляецца «прыхільнікам якіх-небудзь геапалітычных тэорый, хоць, магчыма, і яны неяк паўплывалі».
Па словах Булгакава, перарэгістрацыя, хутчэй, «дае шанец для аднаўлення працы, чым гарантуе яе», паколькі пільная ўвага з боку ДФР стварыла часопісу негатыўную рэкламу і
значная частка друкарань асцерагаецца з ім працаваць.
Зараз, каб не пазбавіцца рэгістрацыі, рэдакцыя павінна выпусціць чарговы нумар да 28 чэрвеня. «Нумар гатовы, але ў нас ёсць вельмі кароткі тэрмін, фактычна ледзь больш месяца, каб
знайсці друкарню, скласці дамову, аплаціць замову», — сказаў галоўны рэдактар.
Каб пазбегнуць магчымых трэнняў з уладамі рэдакцыя пайшла на некаторыя саступкі. «Мы адмовіліся ад класіфікацыі сябе як грамадска-палітычнага выдання, паколькі гэта фармулёўка нам і
стварала масу праблем», — паведаміў Булгакаў.
Па яго словах, часопіс будзе больш арыентавацца на навуку, гісторыю, іншыя тэмы, «якія не выклікаюць раздражнення з боку ўлад».
«Больш увагі будзем надаваць навуковым і менш — палітычным тэмам. Для распрацоўкі нейкіх палітычных тэм мы абралі фармат працы часовых аналітычных груп, якія будуць публікаваць вынікі сваіх даследаванняў», — растлумачыў Валер Булгакаў.