«Лялька» Баляслава Пруса выйшла ў беларускім перакладзе
Выданне кнігі пабачыла свет у Варшаве. Гэта 21-ы пераклад класічнага твора Пруса на замежную мову. На беларускую «Ляльку» пераклала журналістка Галіна Жарко разам з мужам, прафесарам Варшаўскага ўніверсітэта Міколам Хаўстовічам.
Пераклад заняў некалькі гадоў. Кнігу яны выдалі за ўласныя грошы. Пакуль свет пабачыў І том. Пасля таго як наклад першай часткі будзе прададзены, выйдзе працяг: ІІ і ІІІ тамы.
Раман «Лялька» — эпічная панарама варшаўскага жыцця канца 70-х гадоў XIX ст. Герой рамана Станіслаў Вакульскі — чалавек вялікай энергіі і выдатных здольнасцяў.
Дзеля багацця і высокай пазіцыі ў грамадстве ён ідзе на кампраміс з уласным сумленнем, здраджвае сваім ідэалам і пакутуе ад гэтага. А каханне да бяздушнай прыгажуні — арыстакраткі Ізабэлы
Лэнцкай — толькі пагаршае яго пакуты.
Найбліжэйшым часам кніга трапіць у мінскія кнігарні і да прыватных распаўсюднікаў, інфармуе Беларуская служба Польскага радыё.