Валерый Карбалевіч пра заяву Пуціна: мяркую, ён проста троліць Лукашэнку

19 лістапада Пуцін нечакана выказаўся: «Сітуацыя ў Беларусі супакоілася, але праблемы ёсць, мы разумеем гэта і заклікаем да дыялогу паміж уладамі і апазіцыяй». Што гэта было? «Наша Ніва» спытала ў эксперта.

«Заява Пуціна — трохі нечаканая і дзіўнаватая. Бо цягам года міністр замежных спраў Расіі Лаўроў гаварыў, што ў Беларусі ідзе дыялог паміж уладай і грамадзянскай супольнасцю наконт канстытуцыйнай рэформы, усё ў парадку з гэтым, — кажа палітычны аналітык Валерый Карбалевіч. — А тут раптам вынікае, што нічога такога няма і дыялог трэба пачынаць.

Я гэта тлумачу той жа прычынай, якая выклікала напружанне ў кастрычніку, калі адбылася гісторыя з "Камсамолкай", пасля — абмен "уколамі" з тэлеканалаў, пасля адмова Пуціна прыязджаць у Мінск…

Мяркую, словы Пуціна звязаны з тым, што Лукашэнка не выконвае абяцанні, якія даў год таму на сустрэчы ў Сочы. Тады ж Пуцін падтрымаў Лукашэнку, але пры ўмове, што адбудзецца транзіт улады і Лукашэнка сыдзе.

А цяпер жа вынікае, што Лукашэнка нікуды не сыходзіць, а застанецца кіраўніком Усебеларускага народнага сходу, што не адпавядае абяцанням пра сыход.

І гэта Пуціну не падабаецца, таму ён такім чынам і троліць Лукашэнку.

Таксама магчымыя супярэчнасці ў вырашэнні крызісу з мігрантамі. Невыпадкова апошнім часам Пуцін і Лукашэнка часта размаўляюць па тэлефоне — калі б усё было ў парадку, наўрад ці сазвоны былі б настолькі рэгулярнымі.

Магчыма, калі да Пуціна звярталіся кіраўнікі еўрапейскіх краін, ён і паабяцаў дапамогу ў вырашэнні мігранцкага пытання, а пасля высветлілася, што ўплываць на Лукашэнку не так і проста. Адпаведна, цяпер Пуцін не можа выканаць свае абяцанні, што яго раздражняе.

Але ж не варта спадзявацца, што Пуцін сапраўды зацікаўлены ў дыялогу беларускай дзяржавы і апазіцыі. Бо сам Пуцін не вядзе дыялогу са сваімі апанентамі, ён робіць з імі якраз тое ж, што і Лукашэнка — саджае ў турму.

Таму, мяркую, словы Пуціна — сапраўды проста тролінг».