Яны пра нас: Рана ці позна ў Беларусі адбудзецца рэвалюцыя кшталту Майдана

Прапануем вам чарговы агляд таго, што пішуць замежныя СМІ наконт падзей, якія тычацца Беларусі.

«Лукашэнка ў апошні час выступае за змену беларускай пазіцыі адносна вайны. Беларусь застанецца саюзнікам Расіі і не будзе крытыкаваць гэтую вайну, але Лукашэнка не хоча, каб яго лічылі адным з агрэсараў. З гэтай мэтай Беларусь актывізуе дыпламатычныя намаганні па спыненні вайны і будзе настойваць на ўдзеле ў любых мірных перамовах. Іншымі словамі, Лукашэнка пасля аказання дапамогі падпальшчыку цяпер, відаць, хоча прыкінуцца пажарнікам. Мінск можа колькі заўгодна марыць аб адраджэнні ролі, якую ён граў пасля расійскай анексіі Крыма ў 2014 годзе і пачатку вайны на Данбасе, калі ён мог рабіць выгляд пасрэдніка. Але гэты цягнік ужо сышоў».
Новое время (Украіна)

«З прэс-канферэнцыі Пуціна і Лукашэнкі можна зрабіць некалькі высноваў. Па-першае, Саюзная дзяржава Расіі і Беларусі - гэта факт. Ідзе поўная каардынацыя паміж вайсковымі і сілавымі структурамі гэтых дзвюх краін. Эканомікі Расіі і Беларусі працуюць у поўнай сінэргіі. Па-другое, на першы план было вылучана паняцце "трыадзінага народа" рускіх, беларусаў і ўкраінцаў, якое мае магутную геапалітычную праекцыю.
Actualno (Балгарыя)

«Кожны дзень прамаруджвання з беларускага боку і зацягвання Расіяй баявых дзеянняў пагражае Беларусі яшчэ большымі эканамічнымі і знешнепалітычнымі выдаткамі ў выніку нарастальнага санкцыйнага ціску. Стратэгічныя пралікі беларускага кіруючага класа і зацыкленасць на канспіралагічнай карціне свету паставілі пад пагрозу само існаванне Беларусі як сапраўды суверэннай, незалежнай і развітой дзяржавы».
Независимая газета (Расія)

«Чаго ж тады дабіваецца Беларусь, імкнучыся да ўдзелу ва ўрэгуляванні ўкраінскага канфлікту? Думаецца, што беларускія ўлады цікавіць не столькі Украіна, колькі ўласны лёс. У сувязі з гэтым можна меркаваць, што Беларусь спрабуе зарэзерваваць для сябе максімальна выгаднае становішча ў гэтым новым рэгіянальным парадку і хоча аформіць свае адносіны як з Расіяй, так і з Захадам у яго рамках. Беларускія ўлады могуць паспрабаваць выкарыстаць перамовы па Украіне, каб у той ці іншай меры прарваць палітычную ізаляцыю з боку Захаду, у якой яны аказаліся пасля падзеяў 2020 года. Акрамя таго, пасля завяршэння баявых дзеянняў ва Украіне адкрыецца шырокае поле для дзейнасці па аднаўленні эканомікі і інфраструктуры, і Беларусь таксама хоча атрымаць сваю долю гэтага пірага. Зрэшты, пакуль гэтая дыпламатычная актыўнасць Мінска выглядае відавочна заўчаснай».
Украина.ру (Расія)

«Найбольш балючыя санкцыі, якія ўвёў Захад супраць расійскай эканомікі, тычацца паўправаднікоў. Ніякая сучасная электроніка без іх не робіцца. Аднак 12 красавіка, у Дзень касманаўтыкі, высветлілася, што ў Расіі ёсць яшчэ адзін варыянт займець чыпы. Іх прапануе вырабляць Беларусь, дзе неяк выжыў былы савецкі флагман вытворчасці мікрасхем "Інтэграл". Нягледзячы на ​​ўстарэнне вытворчых магутнасцяў, асноўныя задачы прадпрыемства выконваць па-ранейшаму можа, калі верыць прэзідэнту Беларусі Аляксандру Лукашэнку. Бягучая сітуацыя, відавочна, можа стрэсці пыл з савецкага прадпрыемства і ўдыхнуць у яго новае жыццё».
ІА REX (Расія)

«Прэзідэнт Лукашэнка ведае, што ягонае становішча крохкае. Ёсць сапраўдная беларуская апазіцыя. Беларуская грамадская думка можа абярнуцца супраць Лукашэнкі. Хаця беларускі лідар не спяшаецца накіраваць сваё войска на дапамогу Пуціну. Калі Расія пацерпіць няўдачу, Лукашэнка ведае, што, будучы саюзнікам, ён значна хутчэй паўстане перад Міжнародным крымінальным судом, чым Уладзімір Пуцін. Нельга выключаць, што рана ці позна ў Беларусі адбудзецца рэвалюцыя кшталту Майдана».
Atlantico (Францыя)

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: