Японія спросціць уезд для працоўных мігрантаў
Дзякуючы новай візавай сістэме ў Японію, дзе вельмі мала замежнікаў, ужо у 2019 годзе змогуць прыехаць сотні тысяч мігрантаў. Закон выклікаў станоўчую рэакцыю ў экспертаў і жорсткую крытыку ў апазіцыі.
Ілюстрацыйнае фота, pixabay.com
У сувязі з імклівым старэннем насельніцтва Японіі ўлады вырашылі адкрыць межы для рабочай міграцыі, паведамляе агенцтва dpa. Нягледзячы на жорсткае супрацьстаянне апазіцыі, кіруючая кааліцыя на чале з Ліберальна-дэмакратычнай партыяй (ЛДП) у суботу, 8 снежня, прагаласавала за закон аб новай візавай сістэме, які ўступіць у сілу ў красавіку.
Чакаецца, што дзякуючы ёй у бліжэйшыя гады ў Японію пераедуць сотні тысяч замежных работнікаў. Паслабленне тычыцца ў першую чаргу тых абласцей, дзе асабліва моцна адчуваецца недахоп рабочых рук: будаўніцтва, сельская гаспадарка, нагляд за хворымі і састарэлымі. Эксперты станоўча ацэньваюць рашэнне парламента, паколькі, на іх думку, закон надасць імпульс дэбатаў аб сістэматычнай іміграцыйнай палітыцы.
Пакуль што, за рэдкім выключэннем, дазволу на прац выдаюць толькі высокакваліфікаваным замежным спэцыялістам, але і гэта адбываецца вельмі рэдка: паводле звестак сайта Asienspiegel.ch, у 2018 годзе ў краіне знаходзілася не больш за 8 тысяч такіх спецыялістаў. У сувязі з гэтым у Японіі, дзе пражывае каля 2 адсоткаў замежнікаў, ініцыятыва сутыкнецца з пэўнымі цяжкасцямі.
Апазіцыя ў парламенце спрабавала перашкодзіць прыняццю закона: на думку дэпутатаў, дакумент быў складзены недастаткова падрабязна, у ім незразумела прапісаны ўмовы для жыцця і працы замежнікаў. Таксама парламентарыі нагадалі, што ўдзельнікі вытворчых стажыровак у Японіі нярэдка становяцца ахвярамі эксплуатацыі з боку нядобрасумленных працадаўцаў, якія выкарыстоўваюць іх у якасці таннай працоўнай сілы. Такія стажоры звычайна жывуць ізалявана ад японскага грамадства, таму праграма, якую адкрылі ў 1993 годзе для мігрантаў з краін, якія развіваюцца, сёння валодае дрэннай рэпутацыяй. Крытыкі перасцерагаюць, што з прыбыццём у Японію сотняў тысяч замежных рабочых гэтая праблема толькі абвострыцца.
Паводле dw.com