Зяленскі: Вайну ва Украіне можна скончыць значна хутчэй, чым здаецца

Прэзідэнт Украіны ўпэўнены, што прапанаваны ім «план перамогі» дазволіць прымусіць Расію да міру. Кандыдат у прэзідэнты ЗША Дональд Трамп назваў Зяленскага «найлепшым прадаўцом у гісторыі».

Прэзідэнт Украіны Уладзімір Зяленскі лічыць, што вайна з Расіяй можа быць скончаная ўжо ў наступным, 2025 годзе, адзначае dw.com. «Рашучыя дзеянні цяпер могуць паскорыць спыненне расійскай агрэсіі супраць Украіны ў наступным годзе. Наш план перамогі паспрыяе таму, каб практычна прымусіць Расію да міру», — напісаў ён у сваім мікраблогу на платформе X па выніках сустрэчы з прадстаўнікамі абедзвюх палат амерыканскага кангрэса ў Нью-Ёрку ўвечары ў панядзелак, 23 верасня.

Зяленскі збіраецца распавесці пра свой план на перамовах і, магчыма, падчас публічных выступаў, каб дамагчыся дадатковай палітычнай і вайсковай дапамогі з боку саюзнікаў. 

Уладзімір Зяленскі ў інтэрв’ю тэлеканалу ABC News заявіў, што лічыць вайну з Расіяй «бліжэй да заканчэння», чым думаюць многія, і заклікаў саюзнікаў умацоўваць украінскую армію, адзначае ўкраінская служба ВВС.

«План перамогі — гэта ўзмацненне Украіны», — сказаў Зяленскі ў інтэрв'ю праграме «Добрай раніцы, Амерыка», якое ён даў разам з першай лэдзі Аленай Зяленскай, «таму мы просім нашых сяброў, нашых саюзнікаў умацоўваць нас. Гэта вельмі важна».

«Я думаю, што мы бліжэй да міру, чым мы думаем, — працягнуў ён. — Мы бліжэй да канца вайны . Мы проста павінны быць вельмі моцнымі, вельмі моцнымі».

Украінскі прэзідэнт таксама заявіў, што яго план «не пра перамовы з Расіяй»: «Гаворка ідзе не пра перамовы з Расіяй. Гэта мост да дыпламатычнага спынення вайны», — сказаў ён.

У інтэрв'ю Зяленскі таксама заявіў, што Пуцін «баіцца» Курскай аперацыі: «Гэта праўда. Ён вельмі баіцца, таму што яго людзі ўбачылі, што ён не можа абараніць — што ён не можа абараніць усю сваю тэрыторыю».

Зяленскі дадаў, што толькі з «моцнай пазіцыі» Украіна можа «падштурхнуць Пуціна да спынення вайны».

Паводле брытанскай газеты The Times, «план перамогі» Зяленскага змяшчае патрабаванні аб прадастаўленні Украіне заходніх гарантый бяспекі, аналагічных тым, якія маюць сябры НАТА, і заклікі да выдзялення для Кіева новых пакетаў ваеннай і фінансавай дапамогі.

Пасля сустрэчы з кангрэсменамі, Уладзімір Зяленскі заявіў: «Цяпер, у канцы года, у нас ёсць рэальны шанец узмацніць супрацоўніцтва паміж Украінай і Злучанымі Штатамі. Я ўдзячны Кангрэсу ЗША, абодвум партыям і палатам за іх непахісную падтрымку».

Нагадаем, прэзідэнт Украіны неаднаразова звяртаўся да ЗША і Вялікабрытаніі з просьбай зняць абмежаванні на ракетныя ўдары ўглыб Расіі.

Зяленскі: «Мы і Захад па-рознаму ўяўляем перамогу»

«Пуціну не скрасці будучыню свету»

У ходзе прамовы на «саміце будучыні» ў штаб-кватэры ААН у Нью-Ёрку, Зяленскі паведаміў, што ў цяперашні час рыхтуецца правядзенне Другога саміту па ўсталяванні міру ва Украіне. Ён заклікаў кіраўнікоў дзяржаў і ўрадаў усіх краін і надалей падтрымліваць сумесныя намаганні, прыкладзеныя для дасягнення справядлівай і мірнай будучыні.

«Пуцін ужо шмат што скраў, але яму ніколі не скрасці будучыню свету. У гэтым я перакананы», — заявіў Зяленскі.

Расія па-ранейшаму адмаўляецца ўдзельнічаць у мірных самітах па Украіне. У чэрвені дзясяткі дзяржаў прынялі ўдзел у першым такім саміце, які адбыўся ў Швейцарыі. У сустрэчы, аднак, не ўдзельнічалі многія буйныя краіны, у тым ліку Кітай і Расія.

Зяленскі ўжо правёў шэраг сустрэч у ЗША, у прыватнасці з дэлегацыяй двухпартыйнага Кангрэса і канцлерам Германіі Олафам Шольцам. Пазней ён скіруецца ў Вашынгтон, каб сустрэцца з Байдэнам, а таксама з кандыдатамі ў прэзідэнты Камалай Харыс і Дональдам Трампам.

Дазвол на выкарыстанне заходніх ракет: Цяпер у гэтую гульню можна гуляць удваіх

Дональд Трамп: Зяленскі — «найлепшы ў гісторыі прадавец»

Між тым кандыдат у прэзідэнты ЗША Дональд Трамп з нагоды візіту Зяленскага ў Нью-Ёрк назваў украінскага прэзідэнта «найлепшым прадаўцом у гісторыі». 

«Я думаю, што Зяленскі з'яўляецца найлепшым прадаўцом у гісторыі — кожны раз, калі ён прыязджае ў краіну, ён з'язджае з 60 мільярдамі долараў», — сказаў Трампк.

Трамп таксама зноў паабяцаў у выпадку перавыбрання на пасаду прэзідэнта ЗША завяршыць вайну ва Украіне, прычым яшчэ да інаўгурацыі. 

«Калі я выйграю гэтыя выбары, першае, што я зраблю, гэта патэлефаную Зяленскаму, патэлефаную прэзідэнту Пуціну і скажу: «Вы павінны падпісаць пагадненне, гэта вар'яцтва», — растлумачыў Дональд Трамп.