Гарэлка і пачак цыгарэт з фільтрам падаражэюць мінімум на 2 рублі

Бяда да беларусаў прыйшла, адкуль не чакалі, піша тэлеграм-канал «Нашы грошы». У пошуках тых самых грошай улады замахнуліся на святое. Калі вы паліце або часам выпіваеце, вас чакаюць дрэнныя навіны.


Урад доўга расказваў нам пра «звар’яцелы калектыўны Захад», які гадзіць у нашых пад'ездах і перашкаджае эканоміцы квітнець. Таксама ў табары ворагаў запісваліся бізнесмены-крахаборы, якія толькі і думаюць пра тое, каб узняць цэны і нажыцца на простым народзе.

На барацьбу з гэтымі пошасцямі выступіла Мінэканомікі і МАРГ, якія забаранілі цэнах расці (дзе-нідзе гэта нават спрацавала). Але ёсць і вельмі адчувальнае для народа падаражанне, якое адбудзецца ўжо па віне ўрада. Прычым прыгожых прычын, якія тлумачаць такі рост коштаў, акрамя як «грошы вельмі патрэбныя», у яго няма.

Гаворка ідзе пра акцызы на цыгарэты і алкаголь, а дакладней, пра планы кіраўніцтва краіны па іх павышэнні на 2023 год.

Вывучыўшы папраўкі ў заканадаўства, якое тычыцца пытанняў падаткаабкладання, тг-канал склаў зразумелы слайд, у якім пазначана, як вырастуць акцызы на тыя ці іншыя катэгорыі тавараў у 2023 годзе. Гаворка ідзе менавіта пра акцызы, гэта значыць, цэны вырастуць шляхам павышэння ўключанага ў кошт тавару ўскоснага падатку. Цікава, што акцызы на цыгарэты плануецца павышаць у кошце паступова, за 4 этапы, а вось моцныя алкагольныя напоі, хутчэй за ўсё, адначасова.


Што мы бачым? Больш за ўсё не пашанцуе аматарам «парыць», таму што акцыз на вадкасці для электронных сістэм курэння вырасце ў 5,1 разы! На другім месцы стаяць цыгарэты без фільтра, акцызы на гэты, самы дэмакратычны від тытунёвых вырабаў паднімуцца ў 2,9 разы. Акцыз на цыгарэты з фільтрам (гэта значыць 1 і 2 цэнавай групы) вырасце ад 1,6 да 2,2 разы. Акцызы на моцны алкаголь стануць даражэй на 31%.

Хочам яшчэ раз падкрэсліць вельмі важны момант: тут гаворка не ідзе пра падаражэнне, якое будзе адбывацца па віне вытворцы або прадаўца. Гаворка толькі пра акцыз — фіксаваны падатак, якім дзяржава абкладае алкагольную і тытунёвую прадукцыю.

Мы палічылі, як гэта адаб'ецца на бутэльцы гарэлкі і пачку цыгарэт з фільтрам, і прыйшлі да высновы, што ў абодвух выпадках кошт вырасце прыкладна на два рублі.

Якія ж матывы ў дзяржавы, якое рэзка павышае акцызы на прадукцыю, падаражэнне якой некаторыя пласты насельніцтва ўспрымуць вельмі хваравіта? Афіцыйна гэта робіцца для гарманізацыі падатковай палітыкі з Расіяй. Там акцызы на гэтую прадукцыю значна вышэйшыя, значыць, і ў нас павінны. То-бок, вельмі хутка любы беларус, які паліць, можа смела сказаць: «Сяброўства нашага ўрада з Расіяй мне абыходзіцца ў плюс 2 рублі за пачак цыгарэт».

І тут важна адзначыць, што па многіх катэгорыях рост акцызаў адбываецца адчувальна, але ўсё ж не настолькі, каб беларускія цэны зраўняліся з расійскімі. Так, напрыклад, акцызы на моцны алкаголь падвысяць да 80% ад узроўню расійскіх акцызаў, а цыгарэты без фільтра ўсяго да 65% ад расійскага ўзроўню. Хутчэй за ўсё, робіцца гэта не з клопату аб уласных грамадзянах, а для таго, каб кошт беларускага алкаголю і тытуню заставаўся канкурэнтназдольным на расійскім рынку.

Усе чулі пра кантрабанду беларускіх цыгарэт у ЕС, але гэта не значыць, што няма такога ж канала пастаўкі на ўсходнім кірунку.

Тут варта ўзгадаць два вельмі нязручных моманты. Першы: у Расіі сапраўды акцызы вышэй, але ж там і заробкі некалькі больш. І другі — у Беларусі акцызы на паліва і звадкаваны газ вышэй у некалькі разоў, чым у Расіі. Логіка падказвае, што на фоне «гарманізацыі» яны павінны зніжацца, але гэтага не адбываецца.

Сумарна за кошт выраўноўвання ставак акцызаў з расійскімі ўрад разлічвае зарабіць у бюджэт 2023 года 319 млн рублёў.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: