Telegram і Viber: Як адключыць функцыю, што стварае праблемы падчас праверак тэлефона сілавікамі?

Падчас праверак тэхнікі сілавікамі (напрыклад, на мяжы) пэўная асаблівасць мэсэнджараў можа выклікаць праблемы. Як адключыць гэту функцыю?

У Telegram і Viber ёсць функцыя, якая дазваляе аўтаматычна захоўваць прагледжаныя фота і відэа ў галерэі тэлефона. Калі сілавікі зладзяць праверкі тэхнікі, у яе уладальнікаў могуць паўстаць праблемы, калі на дэвайсе застануцца медыяфайлы з забароненых у Беларусі каналаў і чатаў.  «Люстэрка»  расказвае, як адключыць гэту функцыю.

Як працуе функцыя аўтазахавання фота і відэа

Калі функцыя аўтазахавання фота і відэа ўключаная, кожны раз, калі вы адкрываеце стужку канала, групы або атрымліваеце фота і відэа ў асабістых паведамленнях, медыяфайлы не проста падгружаюцца ў самым мэсэнджары, але і захоўваюцца ў галерэі на вашым смартфоне.

Частка з іх (зноў жа — у залежнасці ад наладак мэсэнджара) можа захоўвацца на тэлефоне пэўны час, а потым выдаляцца.

Аўтазахаванне кепскае з дзвюх прычын.

Па-першае, яно забівае памяць прылады, праз што часта сам мэсэнджар (асабліва гэта датычыць Telegram) пачынае горш працаваць: абнаўленні чатаў і каналаў запавольваюцца, вашыя паведамленні адпраўляюцца з затрымкай і інш. Пры гэтым захоўванне фота і відэа на тэлефоне не мае вялікага сэнсу, бо медыяфайлы пастаянна захоўваюцца на хмарных серверах самога мэсэнджара.

«Страху ў людзей поўныя штаны». Як рэпрэсіі ўплываюць на паводзіны беларусаў у інтэрнэце

Па-другое, аўтазахаванне можа стаць пагрозай для бяспекі ўладальніка тэлефона. У Беларусі сілавікі правяраюць дэвайсы падчас перасячэння мяжы ці на допытах (напрыклад, падчас выкліку на гутарку ў КДБ па справах пра данаты, якія ўжо закранулі тысячы людзей).

У такой сітуацыі чалавек мог, скажам, пачысціць сацсеткі, чаты і групы, але не заўважыць фота на палітычныя тэмы, якія Telegram аўтаматычна загружаў у адпаведную папку.

Функцыі Telegram, якія важна ведаць

Як адключыць

Спачатку трэба выдаліць ўжо загружаныя файлы. У Telegram заходзім у «Налады» — «Дадзеныя і памяць» — «Выкарыстанне памяці». Там націскаем «Вычысціць кэш». Потым заходзім у папку пад назвай Telegram у галерэі вашага тэлефона — і правяраем, што там засталося.

У Viber заходзім у «Налады» — «Памяць». Націскаем «Вычысціць кэш». Потым заходзім у папку пад назвай Viber у галерэі вашага тэлефона — і правяраем, што там засталося.

Цяпер адключаем аўтазахаванне файлаў у наладах мэсэнджараў.

У Telegram заходзім у «Налады» — «Дадзеныя і памяць». Адключаем ўсе бегункі ў раздзеле «Захоўваць у галерэі» (як на скрыншоце).

Можна адключыць бегункі і ў раздзеле «Аўтазагрузка медыя». Медыяфайлы не будуць загружацца аўтаматычна — для адкрыцця на іх трэба будзе клікаць. Так вы зэканоміце, напрыклад, трафік мабільнага інтэрнэту, а кэш мэсэнджара будзе запаўняцца не так імкліва, дзякуючы чаму праграма будзе працаваць хутчэй.

У Viber заходзім у «Налады» — «Медыя». І адключаем функцыю «Захоўваць у галерэю». Калі трэба, адключаем і аўтазагрузку: «Аўтазагрузка фота/відэа ў мабільных сетках» і «Аўтазагрузка фота/відэа праз Wi-Fi».

Як бяспечна чытаць навіны ў Беларусі?