У Ізраілі і Італіі адкрыліся Народныя амбасады Беларусі
Праект Народных амбасад Беларусі працуе і развіваецца па ўсім свеце. Сёння іх больш за дваццаць. Пра гэта заявіў намеснік прадстаўніка па знешніх сувязях Аб'яднанага пераходнага кабінета Уладзімір Астапенка.
Консул Дзед Мароз на выдачы альтэрнатыўных пашпартоў беларусам у Германіі / «DW»
«Маю гонар паведаміць пра адкрыццё яшчэ дзвюх Народных амбасад — у Італіі і Ізраілі», — цытуе дыпламата «Е*рарадыё».
«Вельмі прыемна, што амбасада ў Ізраілі адкрылася ў перыяд святкавання Ханукі, — каментуе падзею яго прадстаўнік Барыс Сухадрэў. — Гэта свята, якое сімвалізуе перамогу святла над цемрай».
Як і ў іншых краінах, Народная амбасада Беларусі ў Ізраілі будзе прадстаўляць і абараняць яе інтарэсы на дыпламатычным узроўні, а таксама дапамагаць грамадзянам, якія былі вымушаны пакінуць краіну.
«Задачы перад амбасадай стаяць разнастайныя, — працягвае Барыс Сухадрэў. — Гэта і прасоўванне медыйнай часткі праекта, наладжванне дыпламатычных сувязей, у далейшым мы збіраемся праводзіць культурныя мерапрыемствы, звязаныя з беларускай ідэнтычнасцю, таксама падтрымліваць нашы разнастайныя фонды і працягваць нашу гуманітарную дапамогу, якую мы ажыццяўляем да сёння і не ў рамках амбасады».
Па словах прадстаўніка сусветнай супольнасці «Беларусаў замежжа» і каардынатара праекта «Народныя амбасады» Міхаіла Рубіна, у Ізраілі складваецца даволі самавітая каманда выхадцаў з Беларусі, гатовых актыўна ўдзельнічаць у развіцці ініцыятывы.
«Калі я чую пра выхадцаў з Беларусі ў Ізраілі, узгадваю гісторыю з нашым экзітполам. Роўна за дзень да выбараў у 2020 годзе мы агледзеліся, што не ахапілі Блізкі Усход, і звязаліся з выхадцамі з Беларусі ў Ізраілі, каб тыя правялі апытанне перад амбасадай. Тады мне адказалі, маўляў, "ой, не ведаем, у нас больш за 50 градусаў заўтра, яшчэ Шабат, транспарт не ходзіць — ну ніяк". А шостай раніцы прыходзіць sms-паведамленне: "Стаім пад амбасадай, раскладаемся — праз дзве гадзіны пачынаем працаваць"».
Тады яшчэ ніхто не ведаў пра трагічную гісторыю, што здарыцца з адным з грамадзян Ізраіля Аляксандрам Фруманам, які пацярпеў на сваёй Радзіме ў Мінску. Як пісала «Еўрарадыё», 11 жніўня мужчына быў затрыманы, збіты і кінуты ў аўтазак. Аляксандру давялося некалькі гадзін стаяць з паднятымі рукамі ля сумна вядомай «Сцяны Плачу» ў Савецкім РУУС проста за тое, што зрабіў фота на вуліцы. Пасля вяртання ў Ізраіль ён схадзіў да сапраўднай Сцяны Плачу ў Ерусаліме і пакінуў у ёй запіску: «Госпадзе, зрабі Лукашэнку тое, што яго карнікі зрабілі са мной».
Па словах мужчыны, затрыманых падвяргалі самым жорсткім катаванням, а самому Аляксандру пагражалі абразаннем і нават смерцю.
Актывіст да гэтага часу працуе на тое, каб ні адзін з тых, хто здзекаваўся з яго і іншых беларусаў у 2020-м, не пазбегнуў адплаты. І менавіта ён разам з Барысам Сухадрэвам возьмецца за арганізацыю працы Народнай амбасады Беларусі ў Ізраілі.