Вярхоўны суд адмовіўся разглядаць скаргу аргкамітэта БХД на нерэгістрацыю партыі

9 красавіка на прэс-канферэнцыі адказны сакратар аргкамітэту БХД Дзяніс Садоўскі заявіў, што Вярхоўны суд Беларусі адмовіўся разглядаць скаргу аргкамітэта па стварэнні партыі "Беларуская хрысціянская дэмакратыя" ў дачыненні да Міністэрства юстыцыі з нагоды нерэгістрацыі партыі.



9 красавіка на прэс-канферэнцыі адказны сакратар аргкамітэту БХД Дзяніс Садоўскі заявіў, што Вярхоўны суд Беларусі адмовіўся разглядаць скаргу аргкамітэта па стварэнні партыі "Беларуская хрысціянская дэмакратыя" ў дачыненні да Міністэрства юстыцыі з нагоды нерэгістрацыі партыі.

Паводле яго слоў, падставай для адмовы ў разглядзе скаргі стала тое, што яе падпісаў толькі Садоўскі. "На з'ездзе было вырашана, што ў судзе партыю прадстаўляюць чатыры чалавекі: адказны сакратар і тры сустаршыні партыі. Скаргу падпісаў адзін я, а не чатыры чалавекі. На гэтай падставе суд лічыць, што ён не можа прыняць скаргу да разгляду", — сказаў адказны сакратар БХД.

Пры гэтым, адзначыў ён, у законе нідзе не сказана, колькі ўпаўнаважаных чалавек павінны падпісаць скаргу: "Па законе "Аб палітычных партыях" прадстаўнікі партый, якіх ўпаўнаважыў на гэта з'езд, могуць падаць скаргу ў Мінюст і аспрэчыць рашэнне ў Вярхоўным судзе. Аднак ні ў якім законе не пазначана, колькі чалавек павінны падпісаць гэтую скаргу", — заявіў Садоўскі.

Сустаршыня аргкамітэту па стварэнні БХД Віталь Рымашэўскі адзначыў, што падчас мінулай спробы рэгістрацыі БХД была зусім супрацьлеглая карціна: "12 верасня 2010 года ў Мінску прайшоў устаноўчы з'езд па стварэнні партыі БХД. 30 кастрычніка БХД атрымала ліст з Мінюсту аб рашэнні адмовіць ў дзяржаўнай рэгістрацыі. 1 снежня мы абскардзілі гэтае рашэнне ў судзе. Суд павінен быў прыняць рашэнне аб разглядзе гэтай справы ў месячны тэрмін . Але 19 снежня здарыліся вядомыя падзеі, звязаныя з прэзідэнцкімі выбарамі, і адзін з сустаршыняў БХД, Павал Севярынец, апынуўся ў следчым ізалятары КДБ. Мы адпраўлялі запыт у Вярхоўны суд з тым, каб Севярынца вызвалілі — хаця б на час, дзеля таго, каб ён мог падпісаць пазоўную заяву. Але тады Вярхоўны суд адказаў, што абсалютна не важна, ці будзе прысутнічаць Севярынец на судзе і ці падпіша ён гэтую заяву, паколькі ёсць і іншыя ўпаўнаважаныя ад аргкамітэту з'езду. Цяпер, атрымліваецца, Вярхоўны суд прымае рашэнне, якое супярэчыць свайму папярэдняму рашэнню", — заявіў Рымашэўскі.

"Па пытанні нерэгістрацыі БХД гэта поўнае беззаконне як з боку Вярхоўнага суда, так і з боку Мінюсту, які не зарэгістраваў партыю. Адназначна, што гэта палітычная замова не рэгістраваць БХД", — лічыць Садоўскі.

Нерэгістрацыю партыі "Беларуская хрысціянская дэмакратыя" (БХД) ініцыятары яе стварэння абскардзяць у Камітэце па правах чалавека ААН (КПЧ ААН), паведаміў Віталь Рымашэўскі.  "Мы пададзім скаргу ў парадку нагляду старшыні Вярхоўнага суду. Але мы і так ведаем, што скардзіцца на Вярхоўны суд яго старшыні — справа бессэнсоўная. Таму мы будзем рыхтаваць скаргу ў КПЧ ААН аб парушэнні правоў грамадзян на свабоду асацыяцый", — сказаў ён.

Паводле яго слоў, цяпер Беларусі, як ніколі, патрэбныя добрыя адносіны з Еўрасаюзам. "Нам трэба выплачваць шматмільённыя крэдыты. І вердыкт КПЧ ААН будзе толькі чарговым рычагом уздзеяння на беларускія ўлады. Ніхто не захоча зноў выдаваць крэдыты ненадзейнаму партнёру", — адзначыў Рымашэўскі.

Пры гэтым ён адзначыў, што скарга будзе пададзеная калектыўная. "Мы ведаем, што разгляд спраў у КПЧ ААН можа доўжыцца месяцамі, і нават гадамі. Але ў дачыненні да Беларусі — іншая тэма. Па-першае, там скаргі беларускіх грамадзян разглядаюць хутчэй. Па-другое, калектыўная скарга разглядаецца яшчэ хутчэй. І як толькі мы атрымаем адказ ад старшыні Вярхоўнага суда аб адмове ў нашай скарзе, то адразу ж пададзім пазоў у КПЧ ААН", — сказаў Рымашэўскі.

Нагадаем, першая спроба рэгістрацыі БХД была зробленая ў 2009 годзе, яшчэ дзве — у 2010-м, чацвёртая — у 2011-м. Спробы абскардзіць адмовы ў рэгістрацыі ў судзе былі безвыніковымі.

Паводле Беларускіх навін