Зацверджаны аргкамітэт і журы конкурсу «Курапаты — народны мемарыял»

Зацверджаны склад аргкамітэту і журы адкрытага грамадскага творчага конкурсу на лепшую ідэю мемарыялізацыі Курапатаў і на лепшы мастацкі твор па тэматыцы гэтай трагічнай старонкі айчыннай гісторыі пад дэвізам «Праз Курапаты — да пакаяння».

У склад аргкамітэту ўвайшлі прадстаўнікі грамадскіх структураў — заснавальнікаў конкурсу, у тым ліку грамадзянскай ініцыятывы “Эксперты ў абарону Курапатаў”, суполкі “Пагоня” Беларускага саюзу мастакоў і Беларускай асацыяцыі журналістаў.  

Журы конкурсу ўзначальвае беларускі мастак і грамадскі дзеяч Аляксей Марачкін. Яго намеснікамі абраныя акадэмік Радзім Гарэцкі і паэт Анатоль Вярцінскі. У журы ўвайшлі вядомыя беларускія навукоўцы, у тым ліку археолагі і гісторыкі, а таксама дзеячы культуры. Да канца траўня фарміраванне складу журы будзе завершана.

У палажэнні конкурсу, між іншым, зазначаецца, што Курапаты — гэта адначасова і сімвал генацыду беларускага народу, і еўрапейскі мемарыял памяці ахвяр сталінізму з розных краін, рознага паходжання, забітых на беларускай зямлі.

Заснавальнікі спаборніцтва  — 13 структур грамадзянскай супольнасці — прапануюць конкурс творчых ідэй і прац, выкананых у розных відах пластычных мастацтваў, а таксама ў музыцы, літаратуры, тэатры і кіно. Тэматыка конкурсу —Курапаты, памяць пра ахвяры, непрыняцце гвалту і бальшавізму, пакаянне за ўдзел людзей у злачынствах таталітарнага рэжыму, а таксама за тое, што мы маглі і можам зрабіць, але не зрабілі дзеля праўды, волі і годнага жыцця. Мастацкія формы ўвасаблення тэм мусяць быць у гармоніі здухам існага Народнага мемарыялу, а таксама не павінны навязваць пэўных ідэалагічных або рэлігійных канцэпцый.

Пры ацэнцы ідэй і прац, звязаных з асэнсаваннем прасторы мемарыялу, перавага будзе аддавацца праектам, якія інтэгруюць тэрыторыю гістарычна-культурнай каштоўнасці, улічваюць візуальнае ўспрыманне мемарыялу звонку, а таксама вобразныя і інфармацыйныя магчымасці ахоўнай зоны і зоны рэгуляванай забудовы вакол каштоўнасці.

Вынікі конкурсу дапамогуць распрацоўваць будучыя дэталёвыя праекты мемарыялу, прапануюць грамадству выразныя вобразы і сімвалы, неабходныя для аднаўлення гістарычнай памяці. На думку арганізатараў, конкурс прыцягне ўвагу грамадства, паспрыяе пашырэнню гістарычных ведаў, узбудзіць творчую актыўнасць розных пакаленняў мастакоў, увогуле будзе карысным для кансалідацыі грамадства і ўмацавання заснаванай на каштоўнасцях свабоды і гуманізму ідэнтычнасці сучаснай беларускай нацыі. Арганізатары спадзяюцца, што чарговыя туры конкурсу змогуць адбывацца і надалей, а лепшыя конкурсныя працы ўвойдуць у фонды і экспазіцыю будучага Музею Курапатаў.

Да ўдзелу ў конкурсе запрошаныя паўнагадовыя грамадзяне Беларусі і замежжа, якія пададуць творчую працу адпаведна ўмовам творчага спаборніцтва.

Яно праводзіцца ў тры этапы (першы —з 15 траўня па 31 жніўня 2016, калі ўдзельнікі рыхтуюць свае працы і дасылаюць неабходныя матэрыялы ў журы; другі —

з 1 верасня па 15 кастрычніка 2016, калі журы адбірае працы для дэманстрацыі на выніковай выставе; трэці —з 16 кастрычніка па 30 лістапада 2016, калі вынікі конкурсу дэманструюцца на II дакументальна-мастацкай выставе “Праўда пра Курапаты. Факты, дакументы. сведчанні”. Падчас выставы журы вызначыць працы-пераможцы творчага спаборніцтва і адзначыць іх ганаровымі ўзнагародамі.

На конкурс прымаюцца творчыя працы ў галіне пластычных мастацтваў па наступных намінацыях:

• архітэктурны праект;
• архітэктурна-ландшафтны праект;
• скульптура;
• жывапіс;
• графіка;
• арт-аб'ект;
• фатаграфіка;
• відэаінсталяцыя.

Таксама ў межах асобных намінацый прымаюцца працы ў любых жанрах такіх мастацтваў, як

• літаратура;
• музыка;
• тэатар;
• кіно.

Больш падрабязна з умовамі ўдзелу ў конкурсе можна пазнаёміцца на сайце Грамадскага электроннага архіву "Вытокі" www.vytoki.net