У Горадні можна пабачыць Слуцкія паясы

Гарадзенскі дзяржаўны музей гісторыі рэлігіі адкрыў выставу “Залатканая адзнака годнасці”.



Менавіта тут можна пабачыць дзевяць кунтушовых паясоў 18-19 стагоддзяў, якія па-іншаму называюць Слуцкімі паясамі.

Таксама можна пабачыць традыцыйную вопратку шляхты Рэчы Паспалітай: жупан і кунтуш.

Старэйшая навуковая супрацоўніца музея Галіна Хамко распавядае, адкуль на Беларусі ўзялася такая вопратка:

— У 16-ым стагоддзі народы Еўропы шукалі свае карані. Шляхта Рэчы Паспалітай знайшла іх сярод сарматаў, народа, які жыў яшчэ да нашай эры ў Паўночным Прычэрнамор’і. Адсюль такая цікавасць на усходняга ўсяго. У гэты час у 16-ым стагоддзі складаецца традыцыйны шляхецкі касцюм. Галоўным там быў жупан, зверху апраналі кунтуш, а вось кунтуш павязвалі поясам — кунтушовым поясам. І гэтыя паясы спачатку прывозілі ў Усходу, але потым сталі вырабляць на нашых землях.

Паводле Галіны Хамко, апошні такі пояс зрабілі ў Беларусі ў сярэдзіне 19-га стагоддзя, такія паясы былі настолькі папулярныя сярод беларускай шляхты, што нават з’явіліся падробкі, зробленыя ў французскім Ліёне. Выставу можна пабачыць на працягу бліжэйшага месяца.

Радыё "Рацыя"

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: