У Мінску адкрылася фотавыстава Герыта Энгеля

7 сакавіка ў Палацы мастацтва распачала працу фотавыстава нямецкага фатографа Герыта Энгеля пад назвай «Берлін. Фотаздымкі». Выстава была арганізавана Інстытутам імя Гётэ ў Мінску ў супрацоўніцтве з Беларускім саюзам мастакоў.



7 сакавіка ў Палацы мастацтва распачала працу фотавыстава нямецкага фатографа Герыта Энгеля пад назвай «Берлін. Фотаздымкі». Выстава была арганізавана Інстытутам імя Гётэ ў Мінску ў супрацоўніцтве з Беларускім саюзам мастакоў.
Герыт Энгель – адзін з самых вядомых нямецкіх фатографаў, які здымае гарады. Ён нарадзіўся ў 1965 годзе ў нямецкім горадзе Эсэн, і атрымаў адукацыю не толькі як фатограф, але і як архітэктар. Вядомасць прыйшла да Герыта Энгеля ў 2006 годзе – менавіта тады пабачыў свет яго праект «Manhattan. NEW YORK».
Праект «Берлін. Фотаздымкі» прыцягнуў чарговую хвалю цікаўнасці да аўтара ў 2009 годзе, калі ў Германіі выйшаў аднайменны альбом. Для таго, каб рэалізаваць гэты праект Герыту Энгелю давялося два гады ездзіць па Берліне на ровары і зрабіць сотні фатаздымкаў. З іх было адабрана і размешчана ў храналагічным парадку 42. Экспазіцыя пачынаецца са здымка царквы Святога Мікалая, якая была пабудавана ў 1230 годзе і завяршаецца здымкам Галерэі Хінтэр дэм Гісхаўс, пабудаванай у 2008 годзе па праекце Дэвіда Чыперфілда.
«Я стараюся здымаць пабудовы так аб'ектыўна, наколькі гэта магчыма, — працытаваў Герыта Энгеля дырэктар Інстытута імя Гётэ ў Мінску Франк Баўман на адкрыцці выставы. І сапраўды, Берлін на здымках Герыта Энгеля выяўлены адносна своеасабліва – у адрозненне ад фота ў турыстычных даведніках усе здымкі выкананы на фоне шэрага неба, з мінімумам колераў, вырваных з кантэксту. Іх можна параўнаць са здымкамі фатографа-партрэтыста за выключэннем адной толькі акалічнасці – прадметам здымкі сталі не людскія твары, а гарадскія пабудовы.
Выстава «Берлін. Фотаздымкі» – вандроўная: перад мінскай экспазіцыяй здымкі паказваліся ў Сербіі, а пасля Беларусі выставу плануюць паказаць у Кітаі, Сінгапуры, Італіі, Фінляндыі ды іншых краінах.
У Мінску выстава працягнецца да 23 сакавіка, а з 29 сакавіка па 16 красавіка арганізатары збіраюцца паказаць выставу гомельскім гледачам: экспазіцыю плануецца размясціць у Палацава-паркавым комплексе Румянцавых і Паскевічаў.