БССР-2. Што хаваецца за бюракратычнымі фармулёўкамі «саюзных праграм»?

Эксперт @iSANS_Belarus Андрэй Елісееў напісаў вялікі матэрыял, дзе расказаў, што для захавання расійскай падтрымкі Лукашэнка за мінулы год пайшоў на здачу суверэнітэту Беларусі адразу ў некалькіх сферах. А за сухімі пунктамі ў некалькі радкоў, якія паказалі грамадскасці, крыюцца шырокія дакументы аб перапісванні законаў РБ на расійскі манер.

Паводле слоў эксперта, для захавання свайго становішча Лукашэнка за апошні год здаў адразу некалькі сфер суверэнітэту Беларусі:
▪️Інфармацыйную. Цяпер на ТБ у Беларусі знакавыя падзеі каментуюць прапагандысты з Расіі і Украіны.
▪️Самастойную знешнюю палітыку і абарону. З кабінетаў ужо гучаць заклікі выкрасліць з Канстытуцыі фармулёўкі аб імкненні да нейтралітэту.
▪️Незалежныя прававыя нормы.
Акрамя таго, паскоранымі тэмпамі ідзе «інтэграцыя» Беларусі з РФ у адукацыйнай сферы. Гаворка ідзе аж да планаў стварэння «агульных» падручнікаў гісторыі.
«Улічваючы вялікую ступень эканамічнай залежнасці Беларусі і тое, што яе эканоміка складае ўсяго блізу 3% ад памераў расійскай, на практыцы, за выключэннем рэдкіх паказушных прыкладаў "раўнапраўя", гаворка будзе ісці аб маштабным пераходзе Беларусі на расійскія прававыя нормы практычна ва ўсіх сферах, з магутнай інстытуцыйнай прывязкай Беларусі да Расіі», — кажа Елісееў.
Важна сказаць і пра фармулёўкі так званых «саюзных праграм», якія сталі вядомыя людзям.
Калі там гаворыцца пра «ўніфікацыю» права, маецца на ўвазе перапісванне беларускіх законаў пад расійскія літаральна пад капірку, а там дзе пра «гарманізацыю» — пра максімальна магчымае іх прывядзенне да адзінага назоўніка, пераважна зыходзячы з патрэб і пажаданняў расійскага боку.
Экс-амбасадар РФ Дзмітрый Мезенцаў яшчэ ў канцы 2020 года казаў, што інтэграцыйныя дамоўленасці будуць азначаць «выданне, дадатак, "асучасніванне" больш за 700 нарматыўна-прававых актаў».
Гэта значыць, што многія (калі не большасць) беларускіх міністэрстваў і ведамстваў будуць скарочаныя, бо для капіравання расійскіх законаў проста не трэба столькі людзей.
Эксперт таксама падкрэслівае, што «інтэграцыю» нельга параўноўваць з практыкай ЕС, бо эканоміка Германіі там складае 22%, а не 97%, як у выпадку параўнання з РФ.
«Інтэграцыю» можна параўнаць са зводам законаў Расійскай імперыі, калі скасавалі дзеянне Статута ВКЛ у 1840 годзе. Або з БССР, калі Мінск меў толькі намінальны суверэнітэт, а ўсе рашэнні прымала Масква.
Гэта значыць, беларускія ўлады вядуць сакрэтныя ўзгадненні і лічаць неабходным даваць справаздачу не перад беларускім народам, а выключна перад расійскімі калегамі.