Да 20 гадоў. Вынесены прысуд па справе «Атрадаў грамадзянскай самаабароны Беларусі»

Аляксея Глотава – да 20 гадоў калоніі і штрафу 700 ў базавых велічынь,

Дзмітрыя Сасноўскага – да 20 гадоў калоніі і штрафу ў 700 базавых велічынь,

Вадзіма Гулевіча – да 18 гадоў калоніі і штрафу ў 600 базавых велічынь,

Наталлю Мацвееву – да 14 гадоў калоніі і штрафу ў 400 базавых велічынь,

Нагадаем, Вадзім Гулевіч, Кірыл Ашурак і Аляксей Глотаў былі затрыманы па справе аб падрыве вузла сувязі ў Вілейцы, Наталля Мацвеева — па справе аб спробе знішчыць лесанарыхтоўчую тэхніку ў лясгасах, Дзмітрый Сасноўскі — па справе аб замаху на работніка тэлеканала «СТВ» Рыгора Азаронка.

Дзмітрыю Сасноўскаму перакваліфікавалі абвінавачванне з «падрыхтоўкі на акт тэрарызму» на «акт тэрарызму». Гэта тычыцца нібыта нападу на беларускага прапагандыста Рыгора Азаронка.

Раней у суд быў раптоўна выкліканы інжынер расійскай вайсковай часткі «Вілейка». Пракурор у самым пачатку спытаў, ці складае дзяржаўную тайну інфармацыя аб вайсковай частцы, на што інжынер адказаў, што часткова складае. Пасля гэтага працэс часова закрылі — інжынера дапыталі ў закрытым рэжыме ў якасці грамадзянскага істца. Закрытае судовае пасяджэнне доўжылася не больш за 10 хвілін, пасля чаго суд адкрылі, а пракурор заявіў, што будзе прад'яўляць новае абвінавачванне аднаму з фігурантаў — Дзмітрыю Сасноўскаму. Ён папрасіў у суда невялікі перапынак, каб напісаць новае абвінавачванне, адзначыўшы, што на гэта яму будзе дастаткова 40 хвілін.

Па першапачатковай версіі абвінавачання Дзмітрыю Сасноўскаму ставілася ў віну ч. 1 арт. 361-1 («Стварэнне экстрэмісцкага фарміравання або ўдзел у ім»), ч. 2 арт. 290-4 («Удзел у дзейнасці тэрарыстычнай арганізацыі»), ч. 1 арт. 13 і ч. 1 арт. 359 («Падрыхтоўка да акта тэрарызму ў адносінах да дзяржаўнага або грамадскага дзеяча»), ч. 6 арт. 16, ч. 1 арт. 13 і ч. 2 арт. 295, ч. 1 арт. 14 і ч. 4 арт. 295 («Незаконныя дзеянні ў дачыненні да агнястрэльнай зброі, боепрыпасаў і выбуховых рэчываў»), ч. 3 арт. 361 («Заклікі да санкцый), ч. 1 арт. 130 («Распальванне іншай сацыяльнай варожасці») Крымінальнага кодэкса Рэспублікі Беларусь.

Як піша «Sputnik», пракурор больш за гадзіну зачытваў новае абвінавачванне. Артыкулы ў Сасноўскага засталіся тыя ж, але адзін з іх перакваліфікаваны з «падрыхтоўкі тэракту» на «тэракт». Гэты артыкул абвінавачвання тычыцца беларускага прапагандыста Рыгора Азаронка.

Сасноўскі віну, як і раней, не прызнаў і папрасіў выклікаць у суд пацярпелага журналіста. У судзе абвешчаны перапынак да 22 лістапада.

Нагадаем, падчас дачы паказанняў Сасноўскі казаў, што ў злачынства ў дачыненні да Азаронка яго ўцягнулі падчас следчага эксперыменту. Ён таксама заявіў суду, што пасля затрымання каля дома Азаронка да яго «ўжывалі гвалт і катаванні, прымусілі напісаць чыстасардэчнае прызнанне». На першым пасяджэнні, калі суд высвятляў яго асобу, ён заявіў, што хоча адмовіцца ад грамадзянства Беларусі, таму што «не мае дачынення да тэрарызму».

Усе фігуранты ўнесены ў «пералік арганізацый і фізічных асоб, якія маюць дачыненне да тэрарыстычнай дзейнасці» КДБ.

— Устаноўлена, што названая супольнасць была створана ў верасні 2020 года з мэтай ажыццяўлення супрацьпраўнай дзейнасці і аб'ядноўвала радыкальна настроеных грамадзян для гвалтоўнай змены дзяржаўнай улады, — паведаміў старшыня ўпраўлення Генпракуратуры Сяргей Абрамовіч. — Кіраўнікі і сябры арганізацыі не толькі абмяркоўвалі, але і прыступілі да здзяйснення актаў тэрарызму на тэрыторыі Беларусі для дэстабілізацыі грамадскага парадку, аказання ўздзеяння на прыняцце рашэнняў органамі ўлады.