Яны пра нас. Замежныя СМІ пра рэферэндум у Беларусі і магчымасць вайны з Украінай
Рэферэндум у Беларусі і транзіт улады, расійска-беларускія ваенныя вучэнні і магчымасць вайны з Украінай. Як замежныя СМІ рэагавалі на гарачыя тэмы тыдня — у нашым дайджэсце.
«У Казахстане была завершана эпоха «двоеўладдзя» Такаева і Назарбаева. Новы прэзідэнт узяў на сябе адказнасць і стаў рэальным кіраўніком дзяржавы. Падобныя падзеі не могуць не адбіцца на планах беларускага кіраўніцтва ў пытанні трансфармацыі ўлады. Падобна, казахстанскага варыянту транзіту (з вызваленнем Лукашэнкам месца прэзідэнта і зыходам яго на пасаду кіраўніка УНС) можна не чакаць. Палітык наўрад ці дапусціць з'яўленне падобных пагроз і фармальнае двоеўладдзе. Але і рух да канстытуцыйнай рэформы ўжо не спыніць — для гэтага зроблена занадта шмат, і да рэферэндуму засталося ўсяго каля месяца. Найбольш верагодным варта лічыць наступнае развіццё падзеяў. Новая Канстытуцыя з УНС будзе прынятая, Лукашэнка зойме дзве пасады — і прэзідэнта, і старшыні новага органа. У праекце новай Канстытуцыі для гэтага ёсць артыкул 144, які дае такую магчымасць». Украина.ру (Расія)
«Звярніце ўвагу, што вучэнні праводзяцца ў межах бяспекі Саюзнай дзяржавы. Гэта ключавое слова. Гэта значыць, Расія і Беларусь разглядаюць ужо аб'яднаныя ўзброеныя сілы ў кантэксце Саюзнай дзяржавы, адзінай ваеннай структуры. Гэта вельмі важна — у нас зараз з'яўляецца зусім іншая канфігурацыя ўздоўж нашых межаў».Politeka (Украіна)
«Незалежна ад таго, ці мае намер Пуцін атакаваць Кіеў з Беларусі, разгортванне ўдарнай групоўкі на поўначы ад украінскай сталіцы паслужыць страхоўкай у кантэксце магчымай аперацыі на ўсходзе, у Данбасе, і на поўдні (дзеянні з боку Крыма). Украінскаму войску давядзецца абараняць сталіцу, што перашкодзіць ёй цалкам засяродзіцца на адбіцці нападу з іншых напрамкаў. Калі сілы суперніка расцягнуты, іх лягчэй прарваць, а, такім чынам, можна хутчэй завяршыць кампанію. Псіхалагічнае значэнне захопу Кіева таксама немалаважна. Перспектыва з'яўлення на Майдане Незалежнасці расійскіх танкаў уяўляецца большасці ўкраінцаў жахлівай. Менавіта таму беларускія вучэнні могуць адыгрываць больш важную ролю ў кантэксце аперацыі супраць Украіны, чым у працэсе падрыхтоўкі да "вайны з НАТА"».Polityka (Польшча)
«Сцэнар таго, што РФ увядзе на тэрыторыю ДЛНР сваіх "міратворцаў" пад сцягам АДКБ і ўстане паміж ВСУ і баевікамі, цалкам магчымы. Прычым тут асабліва і рабіць нічога не трэба будзе. Расійскае камандаванне і так ужо знаходзіцца ў Данецку і Луганску. Ім дастаткова будзе падняць расійскі сцяг. У такім выпадку паўзучая анексія часткі Данбаса проста трансфармуецца ў адкрытую форму. Аляксандр Лукашэнка можа падтрымаць такі варыянт».Апостраф (Украіна)
«Аляксандр Лукашэнка прызнаўся, што рэферэндум па праекце Канстытуцыі яму не патрэбны, але ён усё ж адбудзецца. Транзіту ўлады, дзеля якога ён задумваўся, не будзе, мяркуюць эксперты. Мяркуючы па ўсім, Лукашэнка настроены не толькі дасядзець да канца цяперашняй кадэнцыі, гэта значыць да сярэдзіны 2025 года, але і застацца яшчэ на два тэрміны ў сувязі з уступленнем у сілу новай Канстытуцыі, якая яго тэрміны абнуляе. Гэта значыць яшчэ 13 гадоў — да 2035 года».
Незалежная газета (Расія)
«Беларускія ўлады так і не правялі ніводнага расследавання па пяці тысячах зваротаў аб выяўленні і прыцягненні да адказнасці вінаватых у катаваннях у дачыненні да ўдзельнікаў мірных акцый пратэсту. Як канстатуюць праваабаронцы, беларуская прававая сістэма дэманструе сваю поўную залежнасць ад дзейнай улады і няздольнасць абараніць правы чалавека і свабоды». DW (Германія)