Палітыкі, якія нас здзівілі: Алег Свірыдзенка, Марджары Грын, Франсуа Лего

Расійскі чыноўнік заяўляе пра пагрозу «гей-нацыяналізму». Амерыканская кангрэсвумен параўнала Дональда Трампа з Ісусам Хрыстом. А квебекцам, магчыма, пагражаюць санкцыі ЗША за... мову. Падборка навін пра незвычайныя ўчынкі, заявы і ініцыятывы некаторых сучасных палітыкаў.

Алег Свірыдзенка, намеснік кіраўніка Міністэрства юстыцыі Расіі

Расійская грамадскасць да гэтага часу спрабуе зразумець сэнс пасажаў чыноўніка падчас выступу на нядаўняй сесіі Пецярбургскага міжнароднага эканамічнага форуму. У рамках мерапрыемства Алег Свірыдзенка заявіў аб небяспецы «гей-нацыяналізму» ў Расіі. Па словах чыноўніка, міністэрства юстыцыі выявіла, што з 1984 года на тэрыторыі Расіі дзейнічаў міжнародны грамадскі рух ЛГБТ. Рух, калі верыць Свірыдзенку, прапагандаваў дэструктыўную ідэалогію, разбураючы сямейныя каштоўнасці і ствараючы пагрозу дэмакратычным каштоўнасцям у Расіі. Намеснік міністра таксама нагадаў, што прэзідэнт ЗША Барак Абама аб'явіў барацьбу за правы сексуальных меншасцяў за мяжой прыярытэтам амерыканскай знешняй палітыкі. Гэтую палітыку, маўляў, працягнуў і Джо Байдэн, які рэкамендаваў умацоўваць лідарства краіны ў пытанні ЛГБТ-прапаганды.

Заявы намесніка кіраўніка Мінюста выклікалі сапраўдную буру ў сацыяльных сетках. Хтосьці абураецца: «Геі-нацыяналісты, вы задзяўбалі дарогі развальваць!!!» Іншы спрабуе ўдакладніць: «Што такое гей-нацыяналізм і чым ён адрозніваецца ад гей-патрыятызму?»

Варта зазначыць, што ў нулявыя гады ва Украіне здымалі праграму «Файна Україна» — аналаг вядомага расійскага праекту «Наша Раша». Героямі шоу ў тым ліку была групоўка гей-нацыяналістаў з Івана-Франкоўска, якая «змагалася» з гомасексуаламі Расіі. Цікава, ці будзе Алег Свірыдзенка выкарыстоўваць гэты сюжэт для апраўдання сваёй экстравагантнай тэорыі?

Марджары Тэйлар Грын (Marjorie Taylor Greene), вельмі правая рэспубліканская кангрэсвумен

Марджары Тэйлар Грын правяла незвычайную паралель. Падчас мітынгу рэспубліканцаў у Лас-Вегасе на мінулым тыдні яна параўнала Дональда Трампа з самім Ісусам Хрыстом. Дакладна — яна раскрытыкавала дэмакратаў за спробу атрымаць піярныя бонусы з крымінальнага прысуду адносна Трампа. Нагадаем, экс-прэзідэнта ЗША судзяць за нямэтавае выкарыстанне выбарчага фонду, частка якога пайшла на хабар для адной порназоркі. Порназорка, у сваю чаргу, за пэўную суму павінна была ўстрымацца ад публічных заяў аб тым, што мела інтымныя сувязі з Дональдам.

Так ці інакш, Грын па ходу мітынгу заявіла: «Вы хочаце нешта ведаць, хто гэты чалавек, якому я пакланяюся? Гэты чалавек таксама асуджаны злачынец. І ён быў забіты на рымскім крыжы».

Яе заўвагі прымусілі прэсу, блізкую да дэмакратаў, падазраваць, што Рэспубліканская партыя пачала фармаваць нейкі культ асобы Дональда Трампа. Параўнанні з Хрыстом таксама падштурхоўваў сам Трамп, калі ён імкнуўся выкарыстаць сваю папулярнасць сярод белых евангельскіх хрысціян. Зрэшты, параўнанне Трампа і Хрыста можа хутчэй дыскрэдытаваць рэспубліканцаў. Пасля рэзанансных заяў Грын у сацыяльных сетках многія пачалі іранічна задавацца пытаннем: «Хіба Ісус плаціў порназоркам і хаваў гэтую інфармацыю?»

Франсуа Лего (Francois Legault), прэм’ер-міністр канадскай франкамоўнай правінцы Квебек

Як не дзіўна, Лего можа стаць ахвярай санкцый ЗША. Высветлілася, што  ў Штатах закулісна абмяркоўваюць магчымасць увядзення санкцый з-за прыняцця ўладамі правінцыі Квебек закона, які ўмацоўвае становішча французскай мовы і звужае сферу прымянення англійскай. Раней улады Квебека пастанавілі, што назвы фірмаў і прадукцыі на французскай мове не павінны займаць менш за дзве траціны прасторы на шыльдзе ці цэнніку і толькі адну траціну на англійскай. Амерыканскія кампаніі баяцца, што прыхільнасць квебекцаў да французскай мовы будзе шкодзіць англійскай і прывядзе да зніжэння экспарту з ЗША ў Квебек. Вашынгтон мае намер абараняць інтарэсы свайго бізнесу і разважае, як прымусіць Квебек знізіць статус роднай мовы на карысць англійскай.

Самае цікавае, што Квебек не самастойны міжнародны суб’ект. Таму ў выпадку санкцый пад іх трапіць увесь канадскі бізнес. Гэта выклікае адпаведны неспакой сярод урадавых чыноўнікаў. Аднак механізмаў ціску на Манрэаль у Атавы фактычна няма з улікам таго, што для квебекскіх нацыяналістаў мова — гэта святое.