Ужо праз гадзіну паміж Месяцам і Зямлёй праляціць астэроід, здольны знішчыць горад

У суботу ўвечары, 25 сакавіка, — у 22:49 па беларускім часе — паміж арбітамі Зямлі і Месяца праляціць велізарны астэроід, здольны знішчыць цэлы зямны горад. Астэроід можна будзе разглядзець у начным небе з дапамогай бінокля.

 На шчасце для жыхароў Зямлі, астэроід 2023 DZ2 праляціць міма і самой нашай планеты, і яе спадарожніка. Пра гэта паведамілі ў амерыканскім касмічным агенцтве NASA.
Дыяметр астэроіда 2023 DZ2 — ад 40 да 90 метраў. У 19:49 па Грынвічы (або 22:49 па беларускім часе) ён праляціць на адлегласці прыкладна 175 тысяч кіламетраў ад Зямлі, а перад гэтым праляціць міма Месяца.
Такія вялікія астэроіды рэдка набліжаюцца да нашай планеты настолькі блізка. Астраномы называюць пралёт астэроіда падзеяй, якая адбываецца раз у дзесяцігоддзе.
Як заявілі ў NASA, пралёт астэроіда дасць навукоўцам магчымасць яго ўважліва вывучыць, у тым ліку і для таго, каб падрыхтавацца да магчымага сутыкнення падобнага аб'екта з зямлёй.
«Рызыка таго, што гэты «забойца гарадоў» ударыць па зямлі, нулявая, але яго набліжэнне дасць нам выдатную магчымасць для назіранняў», — кажа кіраўнік дэпартамента планетарнай абароны Еўрапейскага касмічнага агенцтва Рычард Майсл.
Па папярэдніх даных, 2023 DZ2 уяўляе навуковы інтарэс, дадае астраном, але склад астэроіда навукоўцы пакуль не вызначылі — для гэтага трэба больш даных.

Новая сустрэча



Дзякуючы блізкасці пралёта, астэроід можна будзе назіраць з зямлі з дапамогай бінокля або невялікага тэлескопа. Таксама на пралёт можна будзе паглядзець у інтэрнэце ў прамым эфіры з дапамогай праекта the Virtual Telescope Project.
Паводле разлікаў навукоўцаў, 2023 DZ2 зноў праляціць недалёка ад арбіты Зямлі ў 2026 годзе, аднак і тады ён не сутыкнецца з нашай планетай.
Раней у сакавіку навукоўцы выявілі яшчэ адзін астэроід падобнага памеру, 2023 DW, і ў нейкі момант даследчыкі нават давалі невялікі шанц (1 да 432), што ён патрапіць у нашу планету 14 лютага 2046 года, на Дзень Святога Валянціна.
Цяпер Рычард Майсл кажа, што 2023 DW размінецца з зямлёй прыкладна на 4,3 млн км.
Нават калі вялікі астэроід устане на курс сутыкнення з Зямлёй, нават цяпер у чалавецтва ёсць магчымасць абараніцца.
У верасні мінулага года NASA ўпершыню правяло эксперымент па змене арбіты астэроіда з дапамогай непілатуемага карабля. Зонд амерыканскага касмічнага агенцтва NASA урэзаўся ў астэроід Дымарф дыяметрам 163 метры.
Гэта была першая спроба чалавецтва адпрацаваць механізм планетарнай абароны. Арбіта астэроіда сапраўды з часам змянілася, але ў жніўні мінулага года навукоўцы заявілі, што на яе маглі паўплываць і іншыя фактары.
Паводле ВВС