Балыкін: Улады з самага пачатку дапусцілі памылку, калі ўвялі практыку выплаты адзінага падатку рознічнымі гандлярамі

Беларускія ўлады з самага пачатку дапусцілі памылку, калі ў 1990-х гадах увялі практыку выплаты адзінага падатку індывідуальнымі прадпрымальнікамі — рознічнымі гандлярамі. Такое меркаванне выказаў БелаПАН кіраўнік Асацыяцыі малога і сярэдняга прадпрымальніцтва Сяргей Балыкін, каментуючы сённяшнюю нараду ў кіраўніка дзяржавы па праекце ўказа "Аб некаторых пытаннях рэалізацыі тавараў індывідуальнымі прадпрымальнікамі і іншымі фізічнымі асобамі".



"Па сутнасці, у 1990-х гадах прэзідэнт адкупіўся ад малога бізнесу, прапанаваўшы яму магчымасць штомесяц выплачваць своеасаблівы аброк узамен на магчымасць пазбегнуць бюракратычнай каніцелі. Я нават не буду засяроджваць асаблівую ўвагу на тым, што такое паўшальнае падаткаабкладанне больш характэрна для сярэднявечных дзяржаў і дзяржаў Старажытнага свету, і такімі метадамі не варта карыстацца ў індустрыяльнай і постіндустрыяльнай эканоміцы", — сказаў эксперт.
 

Балыкін канстатаваў, што беларуская дзяржава ў 1990-х гадах не захацела стварыць нармальныя ўмовы для малога бізнесу, не захацела зрабіць працу з дакументамі зручнай і камфортнай, з мінімальнай колькасцю папер, простымі правіламі іх запаўнення, "а палічыла за лепшае вылучыць з ліку прадпрымальнікаў самы шумны слой і дало яму магчымасць працаваць у адносна камфортных умовах". "І большасць цяперашніх праблем малога гандлёвага бізнесу выраслі на глебе тых рашэнняў", — упэўнены ён.
 

Эксперт звярнуў увагу на тое, што магчымасць разлічвацца наяўнымі грашыма без якіх-небудзь пацвярджальных дакументаў нарадзіла ценявы рынак валюты з усімі наступствамі, што адсюль вынікаюць. Акрамя таго, сфарміраваўся ценявы рынак крэдытаў, і прадпрымальнікі, вельмі часта не маючы магчымасці атрымаць нармальны банкаўскі крэдыт, звяртаюцца па грашовыя рэсурсы да паўпадпольных ліхвяроў. "Зразумелая справа, што магчымасць гандляваць без дакументаў прыводзіць да таго, што ІП — плацельшчыкі адзінага падатку гандлююць у тым ліку і кантрабандным, і кантрафактным таварам", — адзначыў ён.
 

Рэцэпт стварэння нармальных умоў для малога бізнесу шырока вядомы, падкрэсліў эксперт. Найперш дзяржава павінна правесці паўнавартасную эканамічную лібералізацыю. "Неабходна ў максімальнай ступені спрасціць дакументаабарот, прычым не толькі для малога, але і для любога бізнесу. Неабходна навесці парадак на валютным рынку, даць магчымасць праводзіць хуткія і недарагія разлікі без лішніх фармальнасцяў у беларускіх рублях і замежнай валюце. Акрамя таго, рэалізаваць шэраг іншых мер, пра якія ўжо неаднаразова гаварылі, у тым ліку пры звароце прадпрымальнікаў у самыя высокія інстанцыі", — канстатаваў кіраўнік прадпрымальніцкай асацыяцыі.
 

"Што да магчымай нішы малога бізнесу, то гэта ўсё ж хутчэй сфера паслуг, чым гандаль, — лічыць эксперт. — Аднак прыход у сферу паслуг і агульнага харчавання ў Беларусі ўсё яшчэ спалучаны з досыць сур'ёзнымі бюракратычнымі цяжкасцямі".

Вячаслаў Будкевіч, БелаПАН