Эксперт: Расейскія крэдыты будуць тармазіць эканамічныя рэформы ў Беларусі
Атрыманне Беларуссю расейскіх рэсурсаў будзе зніжаць гатоўнасць беларускіх уладаў да эканамічных рэформ. Такое меркаванне выказаў эканаміст Антон Болтачка, каментуючы выдзяленне Расіяй новага крэдыту Беларусі.
"Расейскія рэсурсы традыцыйна станавіліся тормазам для эканамічных рэформ у Беларусі. Лёгкі доступ да рэсурсаў расслабляе беларускі ўрад, і сучасная гісторыя Беларусі гэта пацвярджае", — адзначыў Балточка.
Эканаміст чакае, што сітуацыя, хутчэй за ўсё, паўторыцца і гэтым разам. "Пасля паступлення грошай размовы аб неабходнасці рэформ сыдуць на нішто", — мяркуе ён.
Нагадаем, у мінулую пятніцу, 30 траўня, стала вядома, што ў чэрвені "Банк ВТБ (Расія)" паводле даручэння расейскага ўрада выдзеліць брыдж-крэдыт Беларусі на мільярд долараў. Рэсурсы выдзяляюцца да восені, калі ў Беларусь павінен паступіць двухмільярдны міждзяржаўны крэдыт з боку Расеі.
Як паведамлялася раней, дамоўленасць аб даванні расійскага крэдыту была дасягнута падчас сустрэчы Аляксандра Лукашэнкі з расейскім прэзідэнтам Уладзімірам Пуціным.
Акрамя гэтага, Расея згадзілася перагледзець умовы размеркавання вывазных экспартных пошлін на нафтапрадукты, якія беларускі бок раней поўнасцю пералічваў у расійскі бюджэт. Згодна з дасягнутай дамоўленасцю, з 2015 года Беларусь зможа залічыць у свой бюджэт нафтапошлін на 1,5 млрд. долараў.
У канцы мінулага тыдня, пасля падпісання Лукашэнкам дагавора аб Еўразійскім эканамічным саюзе, стала таксама вядома пра гатоўнасць Расеі павялічыць аб'ём паставак нафты ў Беларусь.
Беларускія эканамісты лічаць, што ўваходжанне Беларусі ў Еўразійскі эканамічны саюз робіць краіну яшчэ больш залежнай ад рашэнняў Расеі.