Масавыя затрымкі зарплат адлюстроўваюць складанае фінансавае становішча прадпрыемстваў

Няўчаснасць выплаты зарплат на беларускіх прадпрыемствах абумоўлена зніжэннем попыту на прадукцыю айчынных вытворцаў.



"Затрымкі выплаты зарплат, верагодна, выкліканыя складаным фінансавым становішчам прадпрыемстваў — попыт на іх прадукцыю знізіўся як на знешнім, так і на ўнутраным рынку", — гаворыць эканаміст Беларускага эканамічнага даследча-адукацыйнага цэнтра (BEROC) Кацярына Барнукова.

Акрамя таго, лічыць эксперт, жорсткая манетарная палітыка, якую Нацбанк праводзіць з пачатку года, прывяла да таго, што дзяржава абмежавала грашовую прапанову і ў прадпрыемстваў паменшыліся магчымасці прыцягваць крэдытныя рэсурсы на выплату зарплат.

У канцы 2014 года Нацбанк рэкамендаваў банкам не выдаваць крэдыты неэфектыўным прадпрыемствам на выплату зарплат. Прэм'ер-міністр Андрэй Кабякоў заяўляў у першым квартале 2015 года, што прадпрыемствы, якія дапусцілі рост складскіх запасаў, крэдытавацца не будуць.

"Прадпрыемствы не могуць прыцягнуць сёння танныя рэсурсы на выплату зарплат, і пры цяперашняй манетарнай палітыцы сітуацыя наўрад ці зменіцца. Аднак гэта не значыць, што цяперашняя грашова-крэдытная палітыка няправільная. Пазіцыя Нацбанка, які з мэтай забеспячэння фінансавай стабільнасці перастаў раздаваць грошы налева і направа, — абсалютна правільная", — мяркуе Барнукова.

Па стане на 1 красавіка 2015 года ў краіне лічылася 518 арганізацый, якія мелі пратэрмінаваную запазычанасць па заработнай плаце перад 90,8 тыс. работнікамі. Тым часам на 1 студзеня налічвалася толькі 20 арганізацый, якія мелі пратэрмінаваную завінавачанасць па зарплаце.

Такім чынам, за першы квартал колькасць арганізацый, якія не змаглі своечасова выплаціць зарплату, павялічылася прыкладна ў 26 разоў. Колькасць працаўнікоў, якія сутыкнуліся з затрымкай выплат зарплат, за квартал павялічылася ў 30 разоў.

Былы прэм'ер-міністр, старшыня Савета Рэспублікі Міхаіл Мясніковіч, адкрываючы 2 красавіка вясновую сесію парламента, паведаміў, што з боку грамадзян сталі паступаць скаргі на няўчасную выплату зарплат.

Дзмітрый Заяц, БелаПАН