Стаўкі па ўкладах і крэдытах: у лютым банкі не прадбачылі праблем

У лютым 2022 года беларускія банкі не прадбачылі праблем, звязаных з дэвальвацыяй рубля (у канцы месяца) і адтокам валютных сродкаў насельніцтва, таму скарачалі працэнты па валютных укладах фізічных асоб.

Паводле даных Нацыянальнага банка Беларусі, у лютым сярэдняя стаўка па новых валютных дэпазітах фізічных асоб на тэрмін да 1 года ў банках Беларусі знізілася да 3,22% гадавых з 3,31%, што была ў студзені, а аналагічная стаўка па доўгатэрміновых дэпазітах упала да 4,74% з 4,86%.

Гэты даволі дзіўны вынік тлумачыцца тым, што банкі не паспелі зрэагаваць на крызіс, які пачынаўся на валютным рынку РФ і РБ, які паўстаў толькі 28 лютага — пасля таго, як Банк Расіі адмовіўся ад правядзення валютных інтэрвенцый у мэтах падтрымкі курсу расійскага рубля.

У сакавіку беларускія банкі істотна паднялі працэнты па валютных дэпазітах (да 6-7% гадавых па некаторых укладах).

З дэпазітамі юрыдычных асоб сітуацыя ў лютым была больш складанай. Сярэдняя стаўка па новых валютных укладах беларускіх прадпрыемстваў на тэрмін больш за год у лютым знізілася да 2,78% гадавых з 3,69% у студзені, але стаўка па кароткатэрміновых укладах павялічылася да 3,76% гадавых з 3,03%.

Пры гэтым сярэдняя стаўка па новых крэдытах у замежнай валюце, прадастаўленых беларускімі банкамі юрыдычным асобам на тэрмін да года, у лютым знізілася да 7,34% гадавых з 7,48% у студзені. Па доўгатэрміновых крэдытах сярэдняя стаўка вырасла да 7,64% з 7,02%.

З крэдытаваннем фізічных асоб сітуацыя была крыху іншай: раслі працэнты па крэдытах на ўсе тэрміны. Сярэдняя стаўка па новых кароткатэрміновых крэдытах насельніцтву ў лютым паднялася да 10,79% гадавых з 10,37% у студзені.

Па доўгатэрміновых крэдытах яна вырасла да 12,29% з 11,99%. Людзей, якія атрымалі крэдыты ў лютым, можна лічыць шчасліўчыкамі, таму што дэвальвацыя рубля значна абясцэніла іх доўг (у пераліку на долары і еўра).

Паводле "Белорусы и Рынок"