Беларусь выключылі з працоўнай групы Еўрапрасторы вышэйшай адукацыі

Праз няспынныя акадэмічныя рэпрэсіі Беларусь страціла месца ў кіраўніцтве працоўнай групы Еўрапейскай прасторы вышэйшай адукацыі. Такую прапанову ўнёс Еўрапейскі студэнцкі саюз.

Як паведамляе нямецкае выданьне Forschung & Lehre, такое рашэнне прынятае на пасяджэнні Балонскай групы ў Славеніі.

Тады ж Беларусі неафіцыйна прапаноўвалася адмовіцца ад сустаршынства ў групе, але Мінск на гэта не пайшоў.

Беларусь павінна была прыступіць да кіраўніцтва працоўнай групай у другой палове 2022 году. Паколькі яна не сябра Еўрасаюза, функцыі належала падзяліць з Чэхіяй. Аднак на пасяджэнні краіны-сябры і міжнародныя арганізацыі скрытыкавалі рэпрэсіі беларускіх уладаў у дачыненні да выкладчыкаў і студэнтаў у Беларусі.

Студэнцкія асацыяцыі і ініцыятыва «Грамадзкі Балонскі камітэт» зарэгістравалі амаль 500 арыштаў студэнтаў, 12 чалавек асуджаныя паводле «справы студэнтаў», іх прызналі «схільнымі да экстрэмізму». Блізу 180 навуковых супрацоўнікаў пакаралі адміністрацыйнымі штрафамі з палітычных матываў.

Згодна са звесткамі «Задзіночаньня беларускіх студэнтаў», крымінальныя справы заведзеныя супраць не менш як паўсотні студэнтаў і выкладчыкаў, справы многіх дагэтуль застаюцца непублічнымі. Усе яны пераследуюцца за ўдзел у акцыях пратэсту, якія з 1 верасня 2020 году практычна штодзень праходзілі ў ВНУ. Байцы АМАП затрымлівалі навучэнцаў проста ў сценах іх альма-матэр.

Беларусь з другой спробы прынялі ў Еўрапейскую прастору вышэйшай адукацыі і Балонскі працэс у 2015 годзе. Да таго пытанне здымалася з парадку дня, бо адмысловая рабочая група прыйшла да высновы, што краіна да гэтага не гатовая — няма аўтаноміі ўніверсітэтаў, акадэмічных свабодаў, удзелу студэнтаў у самакіраваньні і іншага.

Паводле «Свабоды».