Хронікі рэпрэсій. Лукашэнкаўскія вертухаі здзекуюцца з Дашкевіча і Пачобута

Грамадства 27.07.2023

З дапамогай інфармацыі праваабаронцаў і незалежный медыя сабралі звесткі пра палітычны пераслед у Беларусі за 27 ліпеня.

Палітзняволены Зміцер Дашкевіч знаходзіцца ў карцары. «Ад першага дня прыезду ў турму Жодзіна Зміцер знаходзіцца ў карцары. Ён вымушаны знаходзіцца там, бо адмаўляецца ісці ў камеру да гвалтаўнікоў, куды яго заводзяць», — распавялі сябры палітвязня.

Зміцер павінен быў выйсці на волю па заканчэнні тэрміну 11 ліпеня. Але адразу па выхадзе яго затрымалі ў межах новай крымінальнай справы па арт. 411 КК (злоснае непадпарадкаванне патрабаванням адміністрацыі калоніі).

Палітзняволены журналіст Андрэй Пачобут у ШІЗА — другі ці трэці раз пасля пераводу ў калонію. Да яго не пускаюць адваката, а ў ШІЗА ён утрымліваецца без лекаў.

«Што на сённяшні дзень я ведаю пра мужа? Увогуле, нічога. Акрамя таго, што развіваюцца падзеі па найгоршым сцэнары, калі чалавек проста знікае ў калоніі без якіх-небудзь звестак. Прыбыўшы месяц таму ў калонію Наваполацка, Андрэй паведаміў аб гэтым у лісце. Таксама ён паспеў паведаміць, што адразу ж у карантыне яго абвясцілі злосным парушальнікам і пазбавілі перадачы і спаткання», — расказала жонка палітвязня.

Гомельскі абласны суд вынес прысуд 28-гадоваму палітвязню Віктару Залатарэўскаму. Яго абвінавацілі ў стварэнні экстрэмісцкага фармавання або ўдзеле у ім (арт. 362-1 КК) і садзейнічанні экстрэмісцкай дзейнасці (ч. 1 арт. 361-4 КК). Крымінальную справу разглядаў суддзя Алег Харошка.

Гамельчука затрымалі 3 сакавіка ў Гродзенскай вобласці, калі ён спрабаваў выехаць з Беларусі ў Літву. Вядома, што мужчына збіраўся ляцець у Грузію ў адпачынак. Пры аглядзе яго мабільнага тэлефона супрацоўнікамі міліцыі былі выяўленыя падпіскі на тэлеграм-каналы, прызнаныя ўладамі «экстрэмісцкімі».

У выніку, Віктару прызначылі 2,5 года пазбаўлення волі ва ўмовах агульнага рэжыму.

У Віцебскім раённым судзе 21 чэрвеня асудзілі палітзняволенага Канстанціна Ступнікава паводле ч. 1 арт. 368 КК (Абраза Лукашэнкі). Суддзя Міхаіл Зубеня прызначыў Канстанціну два гады калоніі агульнага рэжыму.

Як паведаміў мужчына на судзе, 25 красавіка ён адзначаў Радаўніцу разам з маці, сястрою і яе мужам. Кампанія шмат выпіла, пасля чаго жанчына выклікала на яго міліцыю. Паводле меркавання суду, Канстанцін у прысутнасці міліцыянтаў нецэнзурна выказваўся ў бок Лукашэнкі.

«Здзелкі адменяць». Юрыст — пра лёс прададзенай на аўкцыёне маёмасці палітвязняў — Глядзіце таксама

Суддзя суда Докшыцкага раёна Вячаслаў Елісеенка за распаўсюд «экстрэмісцкіх» матэрыялаў у сацыяльных сетках пакараў 40 гадзінамі грамадскіх прац кіроўцу філіяла «Докшыцыводаканал» Валерыя Шылько, якому ў 2023 годзе ўлады прысвоілі ганаровае званне «Лепшы работнік транспарту».

У судзе высветлілася, што мужчына распаўсюджваў «слоўнае абазначэнне каналаў «Белсат» і «Краіна для жыцця», якія рашэннем суда Цэнтральнага раёна Мінска ад 4 сакавіка 2022 года былі занесеныя ў рэспубліканскі спіс экстрэмісцкіх матэрыялаў».

У Гомелі затрыманы анастэзіёлаг-рэаніматолаг Сяргей Крыж. За што менавіта — невядома, але, паводле непацверджанай інфармацыі, 25 ліпеня яму прызначылі 15 сутак арышту.

У Мінску затрымалі студэнта Акадэміі мастацтваў Максіма Васільева. Хлопец навучаецца на спецыяльнасці «акцёр драматычнага тэатра і кіно». Яго вінавацяць у рэпостах «экстрэмісцкіх матэрыялаў». Таксама ў змантаваным відэа яго змусілі казаць, што ён удзельнічаў у пратэстах у ноч на 11 жніўня 2020 года, але «спужаўся і збег, калі пабачыў міліцыю».

Сілавікі заявілі аб першым затрыманні пасля выхаду фільма Delfi пра беларускія пратэсты. Ніякія падрабязнасці яны не апублікавалі.

Нагадаем, у панядзелак на канале «RU Delfi Литва» быў апублікаваны фільм пра беларускія пратэсты — у ім аўтары не хавалі твары пратэстоўцаў. Адразу пасля выхаду фільма ім зацікаваліся сілавікі і паабяцалі знайсці пратэстоўцаў.

Лукашэнкаўскія сілавікі затрымалі мужчыну, які нібыта пакінуў 2000 каментароў у «экстрэмісцкіх» чатах. На змантаваным відэа затрыманы кажа, што пакідаў каментары, якія «ганьбілі дзейную ўладу і яе прадстаўнікоў».