Хронікі рэпрэсій. Пяць гадоў дальнабойшчыку за петарду, аблава на адвакатаў

Грамадства

З дапамогай інфармацыі праваабаронцаў і незалежных медыя сабралі звесткі пра палітычны пераслед у Беларусі за 29 лютага.

hroniki_represij2_logo.png_logo_1_logo_1.webp

У Мінску 28 лютага супрацоўнікі КДБ зладзілі рэйд на адвакатаў. Па інфармацыі праваабаронцаў, было затрымана сама меней 12 адвакатаў. Большая частка з іх выйшлі на волю, а некаторыя застаюцца ў няволі. Прычыны затрыманняў невядомыя.

За апошнія тры з паловай гады сотні адвакатаў зазналі рэпрэсіі па палітычных матывах: некаторыя сталі фігурантамі крымінальных і адміністрацыйных справаў, а кагосьці пазбавілі ліцэнзій. Цяпер у зняволенні знаходзяцца шэсць палітзняволеных адвакатаў.

Мінгарсуд завяршыў разгляд крымінальнай справы 50-гадовага кіроўцы-дальнабойшчыка Андрэя Бурака. Мужчыну першапачаткова абвінавачвалі ў хуліганстве (ч. 3 арт. 339 КК) і стварэнні экстрэмісцкага фармавання, альбо ўдзеле ў ім (ч. 3 арт. 361-1 КК). Справу разглядаў суддзя Яўген Хаткевіч.

Паводле следства, увечары 11 траўня 2023 года «кіроўца аўтамабіля DAF, які праязджаў міма спыненай ваеннай транспартнай калоны, зрабіў падрыў неўстаноўленай прылады, самастойна вырабленай з піратэхнічных вырабаў, кінуўшы яго ў бок вайскоўцаў і ваеннай тэхнікі».

Папярэдне мужчыну абвінавачвалі толькі ў хуліганстве, артыкул аб удзеле ў экстрэмісцкім фармаванні з'явіўся падчас следства, а на судзе ўсё вывернулася наадварот: засталося толькі «экстрэмісцкае фармаванне».

Суддзя Яўген Хаткевіч прызначыў Бураку 5 гадоў пазбаўлення волі.


Глядзіце таксама

Гомельскі абласны суд вынес прысуд былому супрацоўніка жлобінскага завода БМЗ, бацьку траіх дзяцей Дзмітрыю Шчарбіну, абвінаваціўшы яго ў распальваніі іншай сацыяльнай варожасці і варажнечы паводле ч. 1 арт. 130 КК. Справу разглядаў суддзя Вадзім Бабыроў.

29-гадовага Дзмітрыя жорстка затрымалі амапаўцы ў кастрычніку 2023 года. Сілавікі абвінавацілі Шчарбіна ва ўдзеле ў пратэстах у 2020 года, якія адбываліся на БМЗ.

Пры гэтым паведамлялася, што Дзмітрыя не будуць працягваць пераследваць, бо «пасля адкрытай гутаркі з супрацоўнікамі праваахоўных органаў і дакладнай ацэнкі сваіх дзеянняў ён можа спакойна жыць і працаваць. Так што міліцыя выкарыстоўвае не толькі сілавыя метады, але і размовы па душах. Палку ніхто не перагінае».

У выніку за каментары яму прысудзілі адзін год калоніі.

Палітвязня Аляксандра Зіязэтдзінава другі раз судзяць за данаты. 29 лютага працэс пачаўся ў Мінскім гарадскім судзе. Айцішніка абвінавачваюць паводле ч. 1 арт. 361-2 («Фінансаванне экстрэмісцкай дзейнасці») і ч. 2 арт. 290-1 («Фінансаванне тэрарыстычнай дзейнасці»). Цяпер мужчыне пагражае да 15 гадоў калоніі. Справу разглядае суддзя Алена Шылько.

Палітвязня восенню 2022 года ўжо асудзілі паводле ч. 1 арт. 361-2 да трох гадоў калоніі за перавод крыптавалюты ў BYPOL. Адбываць тэрмін яго накіравалі ў шклоўскую калонію № 17.

Пры гэтым ён «кампенсаваў шкоду», праз што яму абяцалі памілаванне.

У судзе Ленінскага раёна Гродна 20 лютага адбыўся суд над мясцовым жыхаром паводле арт. 24.23 КаАП («Несанкцыянаванае пікетаванне»). Паводле пастановы суда, ён паклаў побач з генконсульствам Расіі ў Гродне два гваздзікі і фота палітзняволенага расійскага палітыка Аляксея Навальнага, які 16 лютага памёр у папраўчай калоніі. Пасля гэта мужчына сфатаграфаваў кветкі і фотаздымак.

У гэты час каля консульства дзяжурылі супрацоўнікі міліцыі, якія і затрымалі мужчыну.

Суд прызнаў яго вінаватым у пікетаванні і прызначыў яму 10-сутачны арышт.


Глядзіце таксама

У Смаргоні затрымалі мужчыну, які сарваў чырвона-зялёны сцяг з крамы. Інцыдэнт, як сцвярджаецца, адбыўся 27 лютага. Паведамляецца, што затрыманым аказаўся 35-гадовы мясцовы жыхар. У дачыненні да яго заведзеная крымінальная справа.

Сілавікі затрымалі мужа і жонку з Фаніпаля, іх абвінавачваюць ва ўдзеле ў пратэстах.

Сілавікі затрымалі дваіх жыхароў Гродна. Сцвярджаецца, што яны нібыта ўдзельнічалі ў акцыях пратэсту, пакідалі абразлівыя каментары і распаўсюджвалі «экстрэмісцкія матэрыялы».

Таксама быў затрыманы менеджар па продажах. Акрамя ўдзелу ў пратэстах, яго абвінавачваюць у рэгістрацыі ў чат-боце плана «Перамога».

74-гадовы Анатоль Прышчык з Мікашэвічаў выйшаў на волю пасля 15 сутак арышту. Пенсіянер адбываў свой арышт у ІЧУ Лунінецкага РАУС. Сядзеў мужчына на жорсткім рэжыме, як для ўсіх палітычных: без пасцельных прыналежнасцяў, ні матраца, ні падушкі, ні коўдры не было выдадзена. З прадметаў гігіены таксама нічога не давалі і не ўзялі перадачу ў дачкі з гэтым. Наогул не ўзялі ні цёплага адзення, ні прадуктаў, ні вады, толькі таблеткі і акуляры. Два тыдні без прагулак, без душа. Добра, што затрымалі на вуліцы, калі пенсіянер быў у цёплай вопратцы — у ёй ўсе 15 сутак спаў на жалезных палосках нар.

Уначы двойчы падымалі, каб мужчына і двое іншых палітычных выгукнулі, хто яны і па якім артыкуле адбываюць пакаранне. Днём трэба было высунуць рукі ў «кармушку» тройчы, каб надзелі кайданы, затым выводзілі ў калідор, ставілі ля сцяны з той жа справаздачай.


Глядзіце таксама

Чарговае папаўненне Спіса экстрэмісцкіх матэрыялаў, у яго трапілі тэлеграм-каналы і чаты «Беларусы и Ко в Эстонии 97», «Твари Добруша», «‡ BASED.ВY ‡», «Княства базаванае»; інстаграм-старонка «libertas_belarus» з лагатыпам; ютуб-каналы «ЖестЬ Доброй Воли», «Саша, что ты несешь?!»; відэаролік «Навошта Лукашэнку выбары і што рабіць апазыцыі»; сацсеткі і лагатып праекту «Хай так TV»; сайт і сацсеткі ініцыятывы «Association of Belarusians in America»; сайт і сацсеткі праекту «Правовая инициатива»; мабільная аплікацыя «Радыё Свабода»; чат-бот «BELPOL»; старонка ў «Аднакласніках» «Вольная Беларусь»; цікток-старонкі «ЖестЬ Доброй Воли», «witzmag», «Виктория Райская», «Małaja», «Artem», «madeinminsk», «Типичный Борисов Беларусь», «ОБЫЧНОЕ УТРО», «damkretor».

Таксама «экстрэмісцкай» прызнаная песня «10 миллионов рабов» гурта «Дай Дарогу».

У Беларусі яшчэ сем новых палітвязняў — Вікторыя Казакова, Дзмітрый Палякоў, Валерый Самсоненка, Уладзімір Лісіца, Генадзь Васілюк, Яўген Кладаў, Радзівон Касцінец. Цяпер, паводле спісаў праваабаронцаў, у Беларусі 1409 чалавек. Насамрэч іх значна больш.