Хронікі рэпрэсій. У Гомелі судзяць чалавека, якога абяцалі не пераследаваць

З дапамогай інфармацыі праваабаронцаў і незалежных медыя сабралі звесткі пра палітычны пераслед у Беларусі за 16 лютага.

У дачыненні да Франака Вячоркі распачалі «спецыяльнае расследаванне». Дарадцу Ціханоўскай прад'яўлена абвінавачанне па 9 артыкулах Крымінальнага кодэкса.

Франаку Вячорку інкрымінуюць:

• здрада дзяржаве;
• змова з мэтай захопу дзяржаўнай улады;
• публічныя заклікі да захопу дзяржаўнай улады, здзяйснення тэрарыстычнага акту і іншых дзеянняў, накіраваных на прычыненне шкоды нацыянальнай бяспецы;
• дыскрэдытацыя Рэспублікі Беларусь;
• стварэнне і кіраўніцтва экстрэмісцкім фарміраваннем (у тым ліку неаднаразова);
• распальванне іншай сацыяльнай варожасці і варожасці;
• арганізацыя масавых беспарадкаў;
• арганізацыя групавых дзеянняў, якія груба парушаюць грамадскі парадак;
• паклёп на Лукашэнку.

Франака Вячорка просяць прыехаць у Мінскае ўпраўленне Следчага камітэта Рэспублікі Беларусь па адрасе: г. Мінск, вул. Першамайская, 7.

* * *

У Мінску затрымалі кіраўніка ліквідаванай Беларускай Партыі Зялёных Дзмітрыя Кучука. Палітык збіраўся ўскласці кветкі каля амбасады Расіі ў Мінску, каб ушанаваць памяць Аляксея Навальнага.

Мужчыну ўдалося паведаміць, што каля амбасады знаходзіцца шмат супрацоўнікаў АМАПу.

* * *

У Жлобіне сілавікі правялі «зачыстку» перад адзіным днём галасавання. 15 лютага суддзя Валянціна Загароўская разгледзела ў Жлобінскім раённым судзе 5 адміністрацыйных спраў.

Былыя палітвязні Андрэй Андрэеў, Дзмітрый Берасьнёў, Аляксандр Кісялёў, Мікалай Ільянка і Яўген Пархамовіч прыцягнутыя да адміністрацыйнай адказнасці паводле артыкула 24.3 КаАП («Непадпарадкаванне» супрацоўніку міліцыі). Паводле звестак праваабаронцаў Вясны, гэта была «зачыстка ад нядобранадзейных» перад адзіным днём галасавання. Пастановы суда ўдакладняюцца.

* * *

Як паведамляе @BSDP_Hramada, пачасціліся выпадкі наведвання супрацоўнікамі праваахоўных органаў членаў ліквідаванай БСДП, якія раней удзельнічалі ў назіранні за выбарамі. Праводзяцца прафілактычныя гутаркі, праглядаюцца тэлефоны, некаторых затрымліваюць.

* * *

У Докшыцах затрымалі былога настаўніка гісторыі. Паводле звестак праваабаронцаў, Арцёму Стадольніку выстаўленае абвінавачванне паводле арт. 24.23 КаАП («Несанкцыянаванае пікетаванне») за пост у Instagram ад 18 студзеня 2021 года — ён быў праілюстраваны выявай аўтамабіля з налепкай «Пагоня».

Паведамляецца, што мужчына зняў налепку яшчэ раней на патрабаванне міліцыі — тады пратаколу не было. Але цяпер менавіта гэтае фота прыцягнула ўвагу сілавікоў. Арцём Стадольнік затрыманы на трое сутак.

* * *

Беларусы «добраахвотна» пералічылі дзяржструктурам на ахвяраванні каля $11,5 млн . Гаворка ідзе пра затрыманых за данаты людзей, ад якіх патрабавалі «добраахвотна» перавесці на рахунак якой-небудзь дзяржаўнай установы суму ў N разоў большую, чым яны ахвяравалі.

Прадстаўнікі Следчага камітэта назвалі гэта «механізмам вызвалення ад крымінальнай адказнасці асоб, якія фінансавалі экстрэмісцкую дзейнасць, але з'явіліся з раскаяннем і загладзілі прычыненую шкоду».

* * *

Супрацоўнікі КДБ правялі «прафілактычны рэйд» па Магілёве і вобласці. Ёсць затрыманыя. Вядома мінімум пра некалькіх людзей, якія 15 лютага былі затрыманыя супрацоўнікамі Камітэта дзяржаўнай бяспекі. Імаверна, рэальная лічба затрыманых яшчэ большая.

Як паведамляе MAYDAY.TEAM, сілавікоў цікавілі дзеянні магілёўцаў і некаторых жыхароў райцэнтраў Магілёўскай вобласці пасля выбараў 2020 года, а таксама перапіскі ў мэсэнджарах і сацыяльных сетках, падпіскі на тэлеграм-каналы. У некаторых выпадках, грамадзян прымушалі адпісвацца ад іх, нават тых, якія не ўключаныя ў спіс «экстрэмісцкіх матэрыялаў», а проста не спадабаліся чэкістам.

Акрамя таго, супрацоўнікі КДБ цікавіліся, ці збіраецца той ці іншы чалавек ісці на адзіны дзень галасавання 25 лютага.

Пасля гутаркі людзей прасілі падпісаць дакумент, у якім яны дэкларавалі недапушчальнасць незаконных дзеянняў, пасля чаго адпускалі.

* * *

Берасцейца затрымалі за ахвяраванне праз сістэму PayPal. Відэа апублікаваў блізкі да сілавікоў Рэгіянальны тэлеграм-канал. Мужчына кажа, што год таму ён перавёў грошы арганізацыі, якую прызналі экстрэмісцкай. «Я блытаю іх — «Байпол» або «Байсол».

Па якім артыкуле затрыманы мужчына, невядома. Аўтары канала сцвярджаюць, што ў дачыненні да затрыманага распачалі крымінальную справу.

* * *

Суддзя Мінскага гарадскога суда Святлана Макарэвіч вынесла прысуд 27-гадовай палітвязынкі Ксеніі Хадыравай — пяць гадоў калоніі ва ўмовах агульнага рэжыму. Яе судзілі за данаты па двух артыкулах — «фінансаванне экстрэмісцкай дзейнасці» і «фінансаванне або іншае забеспячэнне вайны».

Ксенія з Мінска, вучылася ў школе ў Лошыцы, а потым паступіла ў БДУ на факультэт сацыяльных камунікацый. Ва ўніверсітэце Ксенія была выдатніцай і атрымала званне «Ганаровы выпускнік БДУ».

* * *

16 лютага МУС зрабіла традыцыйны пятнічны апдэйт «Пераліку грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці». Як паведамляюць праваабаронцы, у «спіс экстрэмістаў» дадалі яшчэ 24 чалавекі, цяпер у гэтым спісе 3789 прозвішчаў.

* * *

Сілавікі затрымалі жанчыну, якая працавала ў Вярхоўным Савеце і Савеце Міністраў Беларусі. Яе «пакаяннае відэа» апублікаваў набліжаны да ГУБАЗіК тэлеграм-канал.

На камеру жанчыну прымусілі расказаць пра тое, што яна ў 90-ых гадах працавала ў Вярхоўным Савеце і Савеце Міністраў Беларусі. Затым яна працавала ў розных часопісах і газетах.

«У 2020 годзе была схільная агульнай хвалі ўплыву, прысутнічала на некалькіх маршах, размаўляючы са сваімі сваякамі, сябрамі з Украіны і Ізраіля абмяркоўвала некаторыя моманты, датычна палітыкі», — вымусілі распавесці пад запіс жанчыну.

Прапагандысты паведамілі, што яе арыштавалі на 15 сутак.

* * *

Гомельскі абласны суд 16 лютага пачаў разгляд крымінальнай справы былога работніка Жлобінскага завода БМЗ Дзмітрыя Шчарбіна, якога абвінавачваюць у распальванні сацыяльнай варожасці (ч. 1 арт. 130 КК). Справу разглядае Вадзім Бабыроў.

29-гадовага Дзмітрыя жорстка затрымалі амапаўцы ў кастрычніку 2023 года. Сілавікі абвінавацілі Шчарбіна ва ўдзеле ў пратэстах 2020 года, якія адбываліся на БМЗ. Пры гэтым паведамлялася, што Дзмітрыя не будуць працягваць пераследаваць, таму што «пасля адкрытай размовы з супрацоўнікамі праваахоўных органаў і дакладнай ацэнкі сваіх дзеянняў ён можа спакойна жыць і працаваць. Так што міліцыя выкарыстоўвае не толькі сілавыя метады, але і размовы па душах. Палку ніхто не перагінае».

* * *

Віцебскі суд завочна асудзіў беларуску, якая даўно ўжо жыве за мяжой. Беларуску Алену Шабуню, якая ўжо некалькі гадоў жыве за мяжой, выклікалі ў суд Першамайскага раёна Віцебска, паведаміў тэлеграм-канал «Віцебск, я гуляю». Пазней жа ўжо сама Алена паведаміла ў фэйсбуку пра тое, што яе завочна асудзілі па міліцэйскіх пратаколах, аформленых без яе прысутнасці.

«З Першамайскай міліцыі мой стары знаёмы Рыбакоў паведаміў, што мяне будуць судзіць 21.02 у 10.00 у судзе Першамайскага раёна і прыклаў пратаколы, якія складзеныя на мяне без маёй прысутнасці і ведама. Я збіраюся пайсці на суд, шукаю па крамах новую сукенку, якая найбольш падыдзе да такой урачыстай сітуацыі, а тут з іншага боку даносіцца інфармацыя, што суд, аказваецца, адбыўся сёння. Вось дзе невязуха — не паспела», — напісала Алена Шабуня.

Мяркуючы па раскладзе на сайце суда, жанчыну судзілі па двух адміністрацыйных артыкулах — аб распаўсюдзе «экстрэмісцкіх матэрыялаў» і парушэнні парадку правядзення масавых мерапрыемстваў (артыкулы 19.11 і 24.23 КаАП).