Мінчук на «хатняй хіміі» заехаў заправіцца на АЗС — і быў пакараны
Жыхар Мінска, прысуджаны да «хатняй хіміі», аднойчы пры паездцы па МКАД выявіў, што ў яго заканчваецца бензін, і заехаў на першую запраўку ўздоўж дарогі. Неўзабаве да яго прыйшла міліцыя, і мужчыну абвінавацілі ў парушэнні рэжыму адбыцця пакарання.
Мужчына абскардзіў
спагнанне ў судзе, спрабуючы давесці яго абсурднасць, але гэта не дапамагло.
Чаму яго пакаралі, стала вядома з апублікаванага судовага рашэння, на якое звярнула
ўвагу «Люстэрка».
Мінчук Кірыл (імя выдуманае) быў асуджаны паводле часткі 1 артыкула 328 КК за захоўванне наркотыкаў без мэты збыту на 2,5 гады абмежавання волі без накіравання ў папраўчую ўстанову. Такія асуджаныя жывуць дома, але з вялікімі абмежаваннямі: яны абавязаныя працаваць або, калі студэнты, вучыцца, павінны з вечара да раніцы і ва ўвесь вольны ад працы або вучобы час быць дома, не маюць права без дазволу міліцыі выязджаць са свайго горада і гэтак далей.
З такімі абмежаваннямі жыў і Кірыл і 10 студзеня 2024 года наўрад ці збіраўся нешта парушаць. У той дзень ён ехаў па вонкавым кальцы МКАД. У нейкі момант на панэлі аўто загарэўся сігнал, што бензіну засталося мала. Мужчына праверыў па Google-картах, дзе знаходзіцца бліжэйшая прыдарожная запраўка, і збочыў на яе на 44-м кіламетры. Заліў паліва і вярнуўся на свой маршрут.
Вельмі хутка Кірылу давялося незапланавана мець справу з міліцыяй. Начальнік крымінальна-выканаўчай інспекцыі абвясціў яму спагнанне ў выглядзе вымовы за парушэнне парадку і ўмоў адбыцця пакарання. Прычынай было тое, што мужчына «выехаў у іншы населены пункт Рэспублікі Беларусь без дазволу інспекцыі».
Аказваецца, запраўка, на якую заязджаў Кірыл, знаходзілася ў 100 метрах ад МКАД з вонкавага боку. А гэта значыць — за мяжой тэрыторыі горада Мінска, пакідаць які асуджаны не мае права. Як менавіта міліцыя даведалася пра гэта, у справе не гаворыцца. Магчыма, месцазнаходжанне мужчыны адсочвалі па электронным бранзалеце, насіць які нярэдка абавязваюць такіх асуджаных.
Кірыл не быў згодны з такой ацэнкай яго дзеянняў і лічыў вымову неабгрунтаванай. Ён падаў скаргу ў суд і запатрабаваў адмяніць спагнанне.
Глядзіце таксама
Любое спагнанне (гэта можа быць вымова, забарона выходзіць з дому на выходных або часовы арышт) пагражае асуджанаму да «хатняй хіміі» вялікімі праблемамі. Калі спагнанняў назапасіцца тры (атрымаць іх вельмі проста, а спісваюцца яны толькі праз год), то чалавека прызнаюць злосным парушальнікам рэжыму і могуць перавесці на больш строгае пакаранне — ва ўстанову адкрытага тыпу або нават калонію.
У судзе Кірыл паспрабаваў даказаць, што яго пакаралі незаслужана і па абсурднай прычыне. Ён патлумачыў, што яму трэба было тэрмінова заправіцца, ён не збіраўся з'язджаць з горада, а толькі заехаў на АЗС за 100 метраў ад дарогі. Ён звярнуў увагу суда на тое, што нават на Google-картах, дзе ён шукаў запраўку, адрас гэтай станцыі пазначаны як «горад Мінск».
Такім чынам, настойваў мужчына, у яго не было ніякага намеру парушаць рэжым, а значыць, і ўжываць да яго спагнанне няма ніякіх падстаў.
Аднак суд палічыў, што ўсё гэта не мае значэння. Дастаткова самога факту, што мінчук выехаў за межы гарадской тэрыторыі. Да таго ж факт гэты быў зафіксаваны відэакамерамі заправачнай станцыі.
Довады аб тым, што парушэнне было неспадзяваным і мужчыну ўвяла ў зман карта Google, суд адхіліў проста таму, што Кірыл быў абавязаны няўхільна выконваць парадак выканання пакарання і быў азнаёмлены з усімі правіламі.
У выніку суд прыйшоў да высновы, што мінчук
«наўмысна здзейсніў парушэнне парадку адбыцця пакарання». Скарга Кірыла была
адхіленая, і вымова была пакінутая ў сіле.