Міністэрства аховы здароўя змяніла тактыку ў дачыненні да COVID-19: «Наяўнасць РНК віруса не сведчыць аб здольнасці заражаць»

Міністэрства аховы здароўя ўнесла змены ў ведамасныя загады (№488 ад 24 красавіка і №453 ад 20 красавіка), якімі вызначаліся дзеянні ў дачыненні да новага каронавіруса і хворых. І патлумачыла чаму: «Для ўдасканалення мер па сучаснай дыягностыцы і лячэнню». У прыватнасці, мяняюцца тэрміны знаходжання людзей на бальнічным. Вырашана, што ў некаторых выпадках носьбіты РНК віруса не заразныя.

Зараз дзейнічае загад №557 ад 21 траўня.
Адносна лячэння:
змененая кратнасць прыёму «Фавіпіравіра» (супрацьвіруснага сродку, раней выкарыстоўваўся галоўным чынам пры лячэнні грыпу). Міністэрства аховы здароўя удакладняе, што на яго ўскладаліся і пэўныя надзеі пры лячэнні COVID-19;
вызначаны новыя падыходы да выкарыстання гідроксіхлорахіна. СААЗ прыпыніў выпрабаванні гэтага сродку і плануе на працягу двух тыдняў растлумачыць канчатковую пазіцыю;
рэгламентуецца выбар і дазаванне антыкаагулянтаў для лячэння і прафілактыкі тромбаэмбалічных ускладненняў;
падрабязна распісана выкарыстанне глюкакорцікастэроідаў.
Ведамства адзначае, што змены ў пратаколы лячэння будуць і далей уносіцца па меры назапашвання клінічных дадзеных і атрымання міжнародных рэкамендацый.
Таксама апісаны крытэрыі ўстанаўлення дыягназу COVID-19. Вызначаны групы пацыентаў, якія падлягаюць абследаванню, парадак лабараторнага даследавання пры выпісцы / пераводзе і гэтак далей.
Каментуючы новую палітыку, Міністэрства аховы здароўя удакладняе: сучасная дыягностыка дазваляе вылучыць фрагменты РНК віруса, але іх наяўнасць не кажа аб яго жыццяздольнасці. У здаровага чалавека ў норме РНК каронавіруса вызначацца не павінна. Адпаведна, калі першасна выяўляецца пацыент з РНК (з сімптомамі або без), гэта сведчыць пра інфікаванне. Пры гэтым, як паказвае практыка, у вялікай колькасці пацыентаў рэшткі РНК могуць выдзяляцца больш за месяц. У той жа час, адзначае Міністэрства аховы здароўя, вопыт кітайскіх і іншых навукоўцаў паказвае, што гэта нежыццяздольны вірус, які не здольны інфікаваць кагосьці яшчэ.
Прэс-служба ведамства спасылаецца на даследаванні, якія паказваюць, што ўдалося вылучыць і атрымаць жыццяздольны вірус максімум праз 12 дзён ад з'яўлення клінічных сімптомаў. Міністэрства аховы здароўя адзначае: улічваючы тое, што бессімптомныя і лёгкія формы ў Беларусі тыпуюцца (многія краіны бессімптомныя формы наогул не лічаць), паўстае пытанне аб тым, што наяўнасць РНК віруса не сведчыць аб здольнасці заражаць. «Не апісана выпадкаў інфікавання пацыентаў праз 21 дзень ад моманту дыягнаставання сімптомаў пры лёгкіх формах захворвання, а таксама тое, што носьбіцтва не сведчыць аб здольнасці заражаць, — тлумачаць беларускія медыкі. — Пры гэтым абломкі віруса ў клетцы могуць утрымлівацца яшчэ досыць доўга, але жыццяздольны вірус, здольны заражаць іншых, яны не вылучаюць».
У сувязі з гэтым Міністэрства аховы здароўя паведамляе:
«Вядучымі экспертамі краіны прынята рашэнне аб тым, што не варта падвяргаць пацыентаў лішні раз не зусім прыемнай працэдуры ўзяцця мазка (які не мае клінічнага значэння). Такім чынам, пацыентам з лёгкай і бессімптомнай формай COVID-19 тэставанне праводзіцца на 14-е суткі і (пры адмоўным выніку) пацыент будзе выпісаны. Калі ж у пацыента станоўчы вынік тэставання, то зачыняць бальнічны ліст будуць на 21-ы дзень».
Паводле onliner.by