На Facebook з'явіцца незалежны орган па скаргах карыстальнікаў

Група экспертаў будзе вывучаць скаргі на неправамернае выдаленне кантэнту з Facebook. Іх рашэнні будуць абавязковыя для выканання. Аднак кантэнт можна будзе не аднаўляць, калі гэта парушае закон.

46811063_303.jpg

Сацыяльная сетка Facebook паведаміла падрабязнасці аб незалежным наглядальным органе, якому карыстальнікі змогуць паскардзіцца на неправамернае выдаленне кантэнту. Сацсетка разлічвае прыцягнуць да гэтай дзейнасці каля 40 экспертаў, гаворыцца ў паведамленні Facebook, апублікаваным у аўторак, 17 верасня.
Імёны першых удзельнікаў групы, як чакаецца, стануць вядомыя да канца бягучага года. Іх будуць прызначаць на 3 гады. Кожную скаргу будзе разглядаць група з 5 экспертаў. Іх рашэнне будзе абавязковым для выканання і павінна ўступаць у сілу як мага хутчэй. Адзіным выключэннем служыць сітуацыя, калі кіраўніцтва Facebook палічыць, што аднаўленне кантэнту будзе азначаць парушэнне заканадаўства.
Заснавальнік сацсеткі Марк Цукерберг упершыню заявіў аб планах стварыць падобны орган у мінулым годзе. Чакаецца, што ён прыступіць да працы ў пачатку 2020 га.

Уцечка асабістых дадзеных і антыманапольнае расследаванне ў ЗША


За 15 гадоў існавання сацыяльная сетка неаднаразова станавілася аб'ектам крытыкі карыстальнікаў або прадметам цікавасці ўладаў. Так, у пачатку 2018 года стала вядома аб найбуйнейшай у гісторыі Facebook уцечцы асабістых дадзеных. Кампанія Cambridge Analytica незаконна сабрала дадзеныя 87 мільёнаў карыстальнікаў сацсеткі і перадавала іх трэцім асобам, у тым ліку, як мяркуецца, перадвыбарчаму штабу цяперашняга прэзідэнта ЗША Дональда Трампа, які выкарыстаў іх для палітычнай рэкламы.
У верасні 2019 года шэраг амерыканскіх штатаў пачаў антыманапольнае расследаванне ў дачыненні да сацыяльнай сеткі. Улады маюць намер высветліць, ці злоўжываў Facebook сваім дамінуючым становішчам на рынку.
dw.com