Першая беларуская вакцына ад COVID прайшла рэгістрацыю. Але медыкі злёгку шакаваныя
Ніколі не адгадаеце, які навагодні падарунак беларусам зрабіла фірма ААТ «БелВітуніфарм». А яна зарэгістравала першую беларускую вакцыну ад COVID. Інфармацыю пра гэта можна знайсці на сайце Цэнтра экспертыз і выпрабаванняў у ахове здароўя.
Як гаворыцца, не прайшло і чатырох гадоў. І пакуль навіна аб рэгістрацыі кавіднай вакцыны бударажыць розумы прапагандыстаў і падаецца ледзь не як прарыў, супольнасць беларускіх медыкаў «Белыя халаты» спрабуе разбірацца, што ж насамрэч адбылося.
Міністэрства аховы здароўя заяўляе наступнае:
«У 2023 годзе ў Беларусі завершаны клінічныя выпрабаванні айчыннай вакцыны супраць COVID-19».
Гэта значыць, што вакцына адобрана для шырокага прымянення?
Быццам бы так. Калі б Міністэрства аховы здароўя казала праўду. Але, ведаючы іх звычку выдаваць жаданае за сапраўднае, тут відавочна нешта не так.
Клінічныя выпрабаванні праводзяцца ў чатыры фазы, і вакцыны да шырокага ўжывання могуць быць ухвалены толькі пасля трэцяй. На сайце Цэнтра экспертыз і выпрабаванняў ва ўмовах рэгістрацыі пазначана «клінічнае даследаванне I/II фазы». Дакладнай інфармацыі аб тым, што беларуская вакцына прайшла трэцюю фазу, мы не знайшлі. Можна меркаваць, што ў Беларусі такая інфармацыя засакрэчаная, хоць ва ўсім свеце яна публічная.
Калі прасачыць за заявамі чыноўнікаў ад аховы здароўя, то атрымліваецца даволі цікава.
29.12.2023 галоўны санітарны ўрач А. Тарасенка заявіў:
«Паспяхова прайшла трэцяя фаза клінічных выпрабаванняў па ўкараненні вакцыны. У ёй актыўна ўдзельнічаў Гомельскі дзяржаўны медыцынскі ўніверсітэт».
20.12.2023 рэктар Гомельскага медыцынскага ўніверсітэта, прафесар І. Стома казаў:
«На базе навукова-даследчай лабараторыі Гомельскага дзяржаўнага медыцынскага ўніверсітэта зараз праводзяцца першая і другая фазы клінічных даследаванняў дадзенай вакцыны».
Магчыма, Беларусь — адзіная краіна ў свеце, дзе клінічныя выпрабаванні можна правесці за паўтара тыдні. Прынамсі, гэта вынікае са слоў чыноўнікаў.
Глядзіце таксама
Што такое трэцяя фаза і навошта яна патрэбная?
У гэтай фазе вызначаецца імуналагічная эфектыўнасць і бяспека вакцыны для розных груп насельніцтва і ў розных дазіроўках. Колькасць удзельнікаў такіх выпрабаванняў — ад некалькіх соцень да тысяч людзей. Выпрабаванні фазы III з'яўляюцца неабходнай умовай для рэгістрацыі і выдачы дазволу на выкарыстанне ў клінічнай практыцы. Зараз ёсць інфармацыя аб выпрабаванні вакцыны на 135 здаровых добраахвотніках.
Для стратэгічна важных прэпаратаў («БелКавідВак» сюды таксама аднесена) існуе 4 віды рэгістрацыі:
1) стандартная
2) умоўная
3) умоўная для экстраннага прымянення
4) у спрошчаным парадку.
Улічваючы даступную на сённяшні момант інфармацыю, можна сказаць, што «БелКавідВак» прайшоў умоўную рэгістрацыю як стратэгічны прэпарат для экстраннага прымянення.
У чарговы раз мы можам канстатаваць скажэнне рэальнасці ад Міністэрства аховы здароўя.
Зрэшты, нічога новага.
Глядзіце таксама
