Саюз палякаў будзе змагацца за адукацыю на польскай мове

Старшыня не прызнаванага беларускімі ўладамі Саюзу палякаў Анжаліка Борыс атрымала адказ з Міністэрства адукацыі на ліст у абарону школ з польскай мовай навучання ў Гродна і Ваўкавыску.

Ліст, пад якім падпісаліся блізу шасці тысяч чалавек з усяе Беларусі, быў накіраваны ў адміністрацыю Лукашэнкі.

 Паводле Анжалікі Борыс, галоўнае ў адказе з Міністэрства адукацыі — адсутнасць канкрэтыкі.

 «Нам напісалі, што праца над зменамі ў заканадаўства аб адукацыі, паводле якіх ва ўсіх школах Беларусі выпускныя іспыты павінны будуць здаваць на адной з дзяржаўных моваў, дагэтуль не скончаная. Канчатковага рашэння няма. Але магу сказаць, што Саюз палякаў гатовы да найгоршага рашэння і будзе адстойваць адукацыю на польскай мове ў школах Горадні і Ваўкавыску».

Борыс сказала “Радыё Свабода”, што да яе часта звяртаюцца бацькі дзяцей, якія вучацца ў гэтых школах, іншыя сябры Саюзу палякаў:

 «Адчуваецца, што людзі насамрэч хвалююцца за тое, што можа знікнуць адукацыя на польскай мове. І ў людзей няма даверу да ўладаў у гэтым пытанні».

Напісаць ліст Аляксандру Лукашэнку прымусілі змены, якія, як чакаецца, будуць у ліпені ўнесеныя ў Закон аб адукацыі. Паводле гэтых зменаў, усе вучні Беларусі будуць здаваць выпускныя іспыты абавязкова на адной з дзяржаўных моваў. Фактычна, як кажуць сябры СПБ, па-руску.

 І тады ў гэтых школах губляецца сэнс выкладання асноўных прадметаў — такіх, як матэматыка, фізіка, хімія — на польскай мове.

 Анжаліка Борыс у траўні падавала заяўку ў Гродзенскі гарвыканкам на пікет у абарону школаў з польскай мовай навучання. Але ёй адмовілі — маўляў, заяўка не адпавядае нормам закону.

 У Беларусі дзейнічаюць дзве школы з польскай мовай навучання: адна ў Гродна і адна ў Ваўкавыску. Апошнімі гадамі бацькі, якія хочуць, каб іхныя дзеці пайшлі ў школу з польскай мовай навучання, вымушаны стаяць у чэргах, каб паспець падаць заяву на прыём дзяцей у першы клас.

Школы з польскай мовай навучання ў Гродна і Ваўкавыску існуюць больш за 20 гадоў.

 www.svaboda.org