«Рыхтуюся стаць мільянеркай і мецэнаткай беларускай культуры». Спявачка Руся — пра стартап і заробкі

Вакалістка гурта «Shuma», голас Чыгуначнага вакзала Мінска, трэнерка і стартаперка Руся Шукюрава ў інтэрв'ю каналу «Максімальна» распавяла, як прапампаваць свой брэнд, як прыцягнуць фінансавую ўдачу, як яна сама стала ўладальніцай стартапа і колькі ёй цяпер патрэбна на жыццё. Асноўнае з размовы прыводзіць «Н*ша Ніва».

Як сакрэтная праца стала стартапам

Руся распавядае, што апошнія 15 гадоў яна займаецца тым, што працуе як прыватны трэнер голасу. Але паколькі асноўнымі яе кліентамі спачатку былі апазіцыйныя палітыкі, то яна не магла гэта «моцна выводзіць у публічную прастору: гэта была сакрэтная праца, за якую маглі пасадзіць».

Спачатку яна рабіла ютуб-канал, прысвечаны голасу, потым зразумела, што ў яе ёсць сістэмнае бачанне трэніровак голасу, як гэта ўсё можна звязаць з псіхалогіяй, псіхааналізам, сексалогіяй, псіхасаматыкай, несвядомай камунікацыяй. Так з'явіўся дадатак Vocal Image. Ён дазваляе даведацца пра слабыя месцы голасу і прапрацаваць іх.

Дадатак стварылі ў 2020 годзе: з двума Мікалаямі яна адкрыла стартап-кампанію ў Эстоніі. Цяпер яны выйшлі на амерыканскі, іспанскі рынак і спрабуюць заняць там сваё месца.

Сярод іншых магчымасцей, якія дае праграма, у ёй ёсць модуль для аднаўлення маўлення пасля інсультаў, а таксама модуль для трансгендарнага голасу, калі мужчына становіцца жанчынай і трэба змяніць голас.

Руся ў стартапе — сузаснавальніца, аўтарка сістэмы, кантэнт-дырэктарка. Дадатак платны. «Я хачу манетызаваць сваю працу. Утрыманне дадатку каштуе вялізных грошай. Апошнім часам у месяц у нас больш за 20 тысяч еўра сыходзіць толькі на рэкламу», — распавядае Руся.

У яе ёсць ютуб-канал, цікток, інстаграм, якія не манетызуюцца, хоць там ёсць відэа з мільёнам праглядаў. «Гэта проста мецэнацтва, як кажуць мае два Мікалаі», — гаворыць Руся.

«Патэлефанавалi з пытаннем, цi ўпэўненая я ў бяспецы маiх дзяцей». Зоркi — пра паўгода ў эміграцыі

Калі пачалася вайна, трэнерка стала выпускаць відэаролікі на беларускай мове, каб павысіць цікавасць да яе, «насыціць лінгвістычнае поле новымі тэрмінамі пра голас. Мы ж не гаворым пра горла, звязкі і гэтак далей штодня».

Яна распавядае, што калі пачала публікаваць беларускамоўны кантэнт, то «злавіла столькі хейту» ад расійскіх неадэкватных карыстальнікаў, якія «смачна па-імперску выказваліся аб тым, "навошта нам гэтая ўкраінская" — там вельмі жорстка было».

Руся кажа, што яе партнёры ўгаворвалі перайсці на рускую мову, але яна пасля такога прынцыпова адмовілася.

«Калі ласка, маса рускамоўнага кантэнту ў бясплатным доступе. Калі расіянам не падабаецца мая беларуская мова, то яны могуць пайсці да рускамоўных трэнераў, якіх таксама вельмі шмат на рынку, на любы кашалёк і любы ўзровень».

Колькі цяпер зарабляе

Руся кажа, што заробак залежыць ад таго, наколькі дазваляе працаваць псіхалагічны стан.

«Калі я ўпадаю ў дэпрэсію, у апатыю, то я наогул не магу працаваць. Я проста ўсё ўкладаю ў тое, каб вярнуць сабе добры стан. Калі я ў рэсурсе, усё ў жыцці добра, то залежыць яшчэ і ад жадання: магу зарабіць у месяц ад 1000 да 8-10 тысяч [долараў], залежыць ад таго, якія ёсць праекты».  

Яе прыватная кансультацыя каштуе ад 50 да 150 долараў за гадзіну. Калі гэта вялікія праекты, замежныя кампаніі, калі трэба наладзіць голас як брэнд, каб, умоўна, у кампанію тэлефанавалі кліенты, а ўсе супрацоўнікі адказвалі аднолькавым голасам з пэўным пасланнем пра ўпэўненасць, бяспеку, давер і гэтак далей (Руся кажа, што такія несвядомыя пасланні галасоў брэнда павялічваюць эфектыўнасць продажу).

Калі гэта праца для вялікай кампаніі, то там можна і 15 000 у месяц зарабіць, але «гэта цяжкая штодзённая праца, таму што натрэніраваць, скажам, 600 чалавек за месяц — гэта не проста».

На пытанне, колькі ёй трэба для жыцця, Руся адказвае: «Я наогул рыхтуюся стаць еўрамільянеркай. Я хачу мець шмат грошай, каб большую частку накіроўваць на культуру. Я хачу быць мецэнаткай беларускай культуры».

Пакуль праграма-мінімум — купіць якую-небудзь кватэру, «таму што ў мяне ёсць комплекс такі: ужо ўсе мае сябры-сяброўкі выраслі, ва ўсіх дамы, машыны, а ў мяне нічога няма».

Для жыцця ў Польшчы мінімум ёй трэба «дзесьці 3-4 тысячы» [долараў], каб аплаціць кватэру, дзіцячы сад дачкі, ежу, якую яна любіць, паход на масаж, да псіхатэрапеўта, да фізіятэрапеўта, аплаціць сваё навучанне, усякія задавальненні, хобі.

Пра сакрэты фінансавай удачы і адносіны з грашыма

На пытанне, наколькі яе стартап блізкі да аднарога, Руся адказвае: «Ён блізкі, таму я ўжо прымяраю на сябе ролю мільянершы і зняла сабе кватэру, якая адымае большую частку майго даходу, але аказалася, што гэта вельмі крута працуе».

Яна тлумачыць, што калі чалавек думае, як зарабіць больш, трэба не баяцца па максімуме ўкласці ў той стан, у якім вы знаходзіцеся цяпер, зняць класную кватэру, тады, напрыклад, калі прачынаешся ў такой кватэры, якая табе па душы, вырастае ўпэўненасць у сабе, вырастае працаздольнасць.

«Як мы будзем сябе адчуваць у будучыні, залежыць ад таго, наколькі смела мы гатовы ўкласціся ў сябе цяпер. Праверана на сабе: я зняла дарагую кватэру, і мой даход вырас — дзіўна», — кажа Руся.

Яна распавядае, што «арганічна» прайшла шлях ад ролтанаў і танных цягнікоў да ўладальніцы стартапа. «Ёсць псіхатэрапія, дзе можна папрацаваць з устаноўкамі, якія нам прывівае бедная сям'я, няўпэўненасць у сабе», — кажа яна.

У яе цяпер спакойнае стаўленне да грошай. Але гэта праца над сабой. Руся распавядае, што яна з гарадскога пасёлка са шматдзетнай сям'і, дзе тата піў. «Уяўляеш, колькі там у галаве тараканаў: гэтага нельга, гэтага я не вартая, гэтага я ніколі не даб'юся. У тэрапіі ўсё гэта можна прапрацаваць і пазбавіцца ад гэтых кайданоў — бядняцкіх установак».

Яна кажа, што ў карціну свету дачкі ўплятае думку, што грошы — «гэта наш вялікі сябар».

«Калі я атрымліваю нейкі добры кантракт, у мяне ёсць такі пункцік, што я як быццам бы плачу падатак на паспяховасць: я нейкую суму выдзяляю сваім сябрам, скажам, сяброўцы, якая выгарала ад мацярынства, я магу аплаціць дзень спа, гатэль, масажы, ежу, паслаць 200-300 долараў проста, каб яна звярнула ўвагу на сябе і парадавалася, як бы напоўнілася. І калі я выдаткоўваю такія вось «падаткі за добрыя кантракты», мне прыбывае яшчэ больш», — раскрывае таямніцы свайго фінансавага поспеху Руся.

Яна кажа, што і дачку прывучае не баяцца грошай, не саромецца іх, а ўспрымаць іх як жывую цякучую энергію, дзяліцца імі смела, таму што, па вядомым законе, варта нам спыніцца, і энергія таксама спыняецца.

«Таму я стараюся не спыняцца праз вось гэтыя падарункі сваім блізкім людзям, праз магчымасць падзяліцца радасцю ад таго, што ў мяне атрымалася зарабіць».

Руся кажа, што ў многіх людзей ёсць дурная ўстаноўка: я нічога не варты ці мне трэба моцна старацца, каб заслужыць каханне, што проста мяне недастаткова. «Гэта вельмі такі класічны і моцна жывучы таракан у галаве многіх людзей. Гэта крыўдна, таму што людзі вядуцца на гэтую ідэю, нібыта яны не вартыя, у іх не атрымаецца. Усё гэта смецце з галавы трэба вычысціць і даць прастору новым, больш жыццесцвярджальным ідэям. Таму мая рэкамендацыя — перш за ўсё любіць сябе і хадзіць на псіхатэрапію, калі сваіх сіл недастаткова».