Беларусь падала МАГАТЭ чарговы нацыянальны даклад

Беларусь падрыхтавала чарговы (сёмы) нацыянальны даклад аб выкананні Канвенцыі аб ядзернай бяспецы.


Распрацоўку дакумента ажыццявіў дэпартамент па ядзернай і радыяцыйнай бяспецы МНС у супрацоўніцтве з зацікаўленымі органамі дзяржаўнага кіравання.
Як паведамляе прэс-служба МНС Беларусі, у адпаведнасці з міжнароднымі абавязацельствамі даклад пададзены ў МАГАТЭ для яго разгляду. Дакумент на рускай і англійскай мовах размешчаны на інтэрнэт-сайце Дзяржатамнагляда.
Беларусь ратыфікавала Канвенцыю аб ядзернай бяспецы ў 1998 годзе. Згодна з працэдурамі, краіны-ўдзельніцы (дагаворныя бакі) рыхтуюць нацыянальныя даклады аб выкананні канвенцыі адзін раз на тры гады.
Чарговы нацыянальны даклад, адзначылі ў прэс-службе МНС, "ілюструе выкананне абавязацельстваў Рэспублікі Беларусь у 2013—2016 гадах, з улікам рэалізацыі дзяржаўнага рашэння аб будаўніцтве ў Беларусі першай АЭС і дзеянняў ўсіх уцягнутых дзяржаўных органаў і арганізацый па яго выкананні". "Асаблівая ўвага нададзеная зменам, якія адбыліся ў заканадаўстве і сферы рэгулявання забеспячэння ядзернай і радыяцыйнай бяспекі пры выкарыстанні атамнай энергіі. Адлюстраваныя мерапрыемствы па падрыхтоўцы кадраў, забеспячэнні прыярытэту бяспекі, ажыццяўленні радыяцыйнай абароны, арганізацыі сістэмы аварыйнай гатоўнасці і рэагавання, рэалізацыі прынцыпаў, якія ўтрымліваюцца ў Венскай заяве аб ядзернай бяспецы ад 9 лютага 2015 года", — гаворыцца ў паведамленні.
У адпаведнасці з усталяванай МАГАТЭ працэдурай, краіны, якія ратыфікавалі канвенцыю, на працягу чатырох месяцаў будуць вывучаць нацыянальныя даклады іншых дагаворных бакоў і фармуляваць пытанні і каментары да іх. Абарона нацыянальных дакладаў адбудзецца ў сакавіку—красавіку 2017 года на пляцоўцы МАГАТЭ падчас чарговай нарады дагаворных бакоў.
Канвенцыя аб ядзернай бяспецы прынятая 17 чэрвеня 1994 года. Яна скіраваная на "дасягненне і падтрыманне высокага ўзроўню ядзернай бяспекі ва ўсім свеце на аснове ўмацавання нацыянальных мер і міжнароднага супрацоўніцтва; стварэнне і падтрыманне на ядзерных устаноўках эфектыўных сродкаў аховы ад патэнцыйнай радыяцыйнай небяспекі; ахову асоб, грамадства ў цэлым і навакольнага асяроддзя ад шкоднага ўздзеяння іанізуючых выпраменьванняў; прадухіленне аварый з радыелагічнымі наступствамі і змякчэння іх наступстваў у тым выпадку, калі яны здарацца".
Андрэй Серада, БелаПАН