Дагавор аб ЕАЭС могуць падпісаць, але энерганосьбіты для Беларусі не патаннеюць

Усе асноўныя рознагалоссі па праекце дагавора аб ЕАЭС урэгуляваны, паведаміў паводле вынікаў пасяджэння Вышэйшага еўразійскага эканамічнага савета 29 красавіка ў Мінску старшыня калегіі Еўразійскай эканамічнай камісіі Віктар Хрысценка. Як паведамляе агенцтва БелТА, Хрысценка сказаў, што застаюцца яшчэ двухбаковыя пытанні, абмеркаванне якіх будзе працягнута.



Фота прэс-службы Уладзіміра Пуціна

Лукашэнка, Пуцін і Назарбаеў даручылі завяршыць прапрацоўку ўсіх нюансаў дагавора найбліжэйшым часам, каб дакумент быў пададзены на падпісанне на саміце тройкі ў Астане 29 мая. Такая задача пастаўлена перад Еўразійскай эканамічнай камісіяй і ўрадамі трох краін.
 

Паводле слоў Хрысценкі, праект дагавора аб Еўразійскім эканамічным саюзе (ЕАЭС) — гэта вялікі аб'ём не толькі кадыфікаваных дакументаў Мытнага саюза і Адзінай эканамічнай прасторы, прыблізна 70 міжнародных дагавораў, але і новых норм, якія ў мэтах развіцця гэтых дамоўленасцей былі ўключаны ў праект дагавора і тычацца пашырэння агульнага рынку на незакранутыя раней сегменты, у прыватнасці энергетычны сектар, рынак паслуг.
 

"Не пазней за 2025 год пачынаюць функцыянаваць агульныя рынкі нафты, нафтапрадуктаў, газу", — цытуе Хрысценку агенцтва БелТА.
 

Паводле слоў міждзяржаўнага чыноўніка, агульны рынак электраэнергіі пачынае працаваць крыху раней за гэты тэрмін, бо да яго два гады вялася падрыхтоўка. У 2016 годзе кіраўнікі дзяржаў МС зацвердзяць канцэпцыю фарміравання кожнага з гэтых рынкаў: нафты, нафтапрадуктаў, газу. У 2018 годзе будзе зацверджана праграма фарміравання гэтых рынкаў. Як растлумачыў Хрысценка, каб запусціць працу агульных рынкаў, запатрабуецца падпісанне спецыяльных міжнародных дагавораў, якія прапісаны ў праекце дагавора аб ЕАЭС.
 

"Да 2025 года пытанні, звязаныя з узаемадзеяннем у сферы нафты, нафтапрадуктаў і газу, будуць урэгуляваны ў адпаведнасці з дзейнымі пагадненнямі, заключанымі ў 2010 годзе, і ў адпаведнасці з дадатковымі двухбаковымі дамоўленасцямі, якія будуць падпісаны і забяспечаць статус узаемадзеяння ў гэтых сферах, што задаволіць бакі, на ўвесь перыяд да фарміравання агульнага рынку", — сказаў старшыня калегіі ЕЭК. Ён дадаў, што дамоўленасці будуць дзейнічаць да таго часу, пакуль не набудуць моц новыя дагаворы па агульным рынку нафты, нафтапрадуктаў і газу. "Калі гэта адбудзецца раней за 2025 год, што дагавор дапускае, значыць, яны пачнуць дзейнічаць раней", — заявіў Хрысценка.
 

Што да пытання пошлін на нафтапрадукты, то яно па-ранейшаму будзе вырашацца на двухбаковым узроўні, паведаміў Хрысценка. "Пошліны на нафтапрадукты сёння з'яўляюцца прадметам двухбаковых дамоўленасцяў і да фарміравання агульнага рынку застануцца прадметам урэгулявання на двухбаковай аснове", — сказаў ён.
 

"Ці будзе адбывацца трансфармацыя ў гэтым сэнсе і якая — гэта будзе ісці паралельна з працай па дагаворы аб ЕАЭС ужо толькі паміж Рэспублікай Беларусь і Расійскай Федэрацыяй", — дадаў Хрысценка.
 

Кіраўнік калегіі ЕЭК праінфармаваў, што да 1 чэрвеня 2014 года будзе падрыхтаваны праект дагавора аб далучэнні Арменіі да Мытнага саюза і Адзінай эканамічнай прасторы. Такое даручэнне далі Аляксандр Лукашэнка, Уладзімір Пуцін і Нурсултан Назарбаеў. Хрысценка адзначыў, што дакумент павінен быць падрыхтаваны для разгляду кіраўнікамі дзяржаў на пасяджэнні Вышэйшага еўразійскага эканамічнага савета 29 мая ў Астане.
 

Паводле яго слоў, кіраўнікі трох дзяржаў ухвалілі праведзеную на сёння працу па рэалізацыі дарожнай карты далучэння Арменіі да МС і АЭП. У прыватнасці, са 126 пунктаў дарожнай карты, якія павінны быць выкананы да падпісання дакумента, 111 выкананы, а 15 уключаюцца ў сам дагавор аб далучэнні Арменіі да МС/АЭП.
 

Читать полностью:  http://news.tut.by/economics/397107.htmlВячаслаў Будкевіч, БелаПАН