Падобна на тое, што да Лукашэнкі ніхто не прыедзе
Якая праўдзівая прычына таго, што Лукашэнка так актыўна зазывае "калегаў" у Мінск?
У сітуацыі распаўсюджвання каронавіруса кіраўнік Беларусі актыўна зазывае іншых кіраўнікоў дзяржаў у Мінск. Напярэдадні ён прапанаваў правесці ў беларускай сталіцы 19 траўня саміт ЕАЭС ў вочнай, а не дыстанцыйнай форме.
«Што тычыцца ЕАЭС, я сёння размаўляў з прэзідэнтам Казахстана Такаевым. Яны зараз кансультуюцца з прэзідэнтам Расіі. Вам магу сказаць, і яму сказаў: я ваш слуга, як вы скажаце, так і будзе. Я арганізую мерапрыемства. Гатовы 19 траўня прыняць ўсіх вас. Абяцаю поўную бяспеку», — заявіў Аляксандр Лукашэнка.
Ён таксама дадаў:
«З нас ужо людзі пачынаюць смяяцца. Калі мы хочам сур’ёзна абмеркаваць пытанні, можна сабрацца тут і абмеркаваць сам-насам».
Прапанову кіраўніка Беларусі аб вочным фармаце саміту пакуль падтрымаў толькі прэзідэнт Малдовы Ігар Дадон — і тое на словах: «Для мяне гэта не перашкода. Як вырашаць нашы калегі».
5 траўня Лукашэнка ўжо запрасіў кіраўнікоў іншых дзяржаў прыехаць у Мінск на парад Перамогі.
«Публічна запрашаю кіраўнікоў дзяржаў, хоць бы былога Саюза, прыехаць у Мінск. Правільна было б сабрацца ў Мінску. Гэта рэспубліка, якая была сцёртая з твару зямлі, якая першая прыняла ўдар. Гэта самая пацярпелая рэспубліка — жывы помнік вайне», — сказаў кіраўнік Беларусі.
UDF.BY пацікавіўся ў экспертаў, ці адгукнецца хто-небудзь на заклік Лукашэнкі.
«Тут ёсць ідэалагічны складнік»
Дырэктар Цэнтра стратэгічных і знешнепалітычных даследаванняў Арсень Сівіцкі ў каментары UDF.BY адзначыў, што прыезду кіраўнікоў дзяржаў на парад у Мінск у гонар 75-годдзя перамогі ў Вялікай Айчыннай вайне чакаць не даводзіцца.
«На момант правядзення парада ў Мінску 9 траўня большасць з постсавецкіх краін будуць працягваць знаходзіцца ў каранцінным рэжыме. Відавочна, што ўдзел лідэраў гэтых дзяржаў у парадзе будзе разглядацца іх грамадзянамі як парушэнне карантыну, які шмат у чым і быў ініцыяваны ўладамі», — сказаў Сівіцкі.
Але ёсць і іншая прычына, з-за якой прыезд кіраўнікоў дзяржаў у Мінск на 9 траўня вельмі малаверагодны.
«Непаслядоўныя крокі беларускага кіраўніцтва, правядзенне масавых мерапрыемстваў ва ўрон здароўю грамадзян, нягледзячы на рэкамендацыі СААЗ, а таксама хваля публікацый аб сітуацыі ў Беларусі ў замежжы стварылі нашай краіне сумнеўную рэпутацыю. Па сутнасці беларускі ачаг каронавіруса прыраўноўваюць да пагрозы для суседніх краін. Іміджавы фактар, у тым ліку, акажа ўплыў на прыняцце рашэнняў аб візіце ў Мінск», — лічыць Сівіцкі.
Што тычыцца пасяджэння ў рамках ЕАЭС ў вочным фармаце, то шмат будзе залежаць ад таго, якія рашэнні па рэжыме каранціну будуць прыняты ў краінах-сябрах саюза пасля 15 траўня. І перш за ўсё, у Расіі. Пакуль існуе вялікая верагоднасць таго, што каранцінныя меры там будуць працягнутыя або нязначна змякчэлыя.
Чаму Лукашэнка зазывае калегаў на парад у Мінск, хоць іх прыезд малаверагодны?
«Тут ёсць ідэалагічны складнік. У Беларусі спрабуюць прадэманстраваць сваю прыхільнасць каштоўнасцям, звязаным з перамогай у Вялікай Айчыннай. На фоне таго, што іншыя краіны адмовіліся ад святкавання гадавіны, Беларусь прэтэндуе на свайго роду лідэрства», — сказаў Сівіцкі.
«Ніякіх сур’ёзных плюсаў такая бравада не дае»
Дырэктар інстытута «Палітычная сфера» і доктар палітычных навук Андрэй Казакевіч у каментары UDF.BY адзначыў, што кіраўнікі краін ЕАЭС ня адгукнуцца на прапанову правесці асабістую сустрэчу ў Мінску.
«Думаю, усё ж такі саміт будзе праведзены ў дыстанцыйным фармаце. У рэжыме відэасувязі праходзяць многія міжнародныя сустрэчы апошняга часу. Як мінімум кіраўніцтва Расіі і Казахстана вельмі сур’ёзна ставіцца да пытання захавання карантыну», — сказаў Казакевіч.
Акрамя таго, магчымы візіт у Мінск — гэта пытанне не толькі знешняй, але і ўнутранай палітыкі.
«Калі кіраўніцтва краіны кажа пра неабходнасць самаізалявацца, абмежаваць колькасць кантактаў, перакладаць усё па магчымасці ў дыстанцыйны рэжым, а потым выедзе для міжнароднай сустрэчы — гэта выклікае шмат пытанняў з боку насельніцтва», — адзначыў дырэктар інстытута «Палітычная сфера».
У заявах Лукашэнка палітолаг бачыць асабісты фактар.
«Я б сказаў, што мы назіраем упартасць, нежаданне прызнаваць дапушчаныя памылкі па барацьбе з каронавірусам. Кіраўніцтва краіны такім чынам дэманструе ўпэўненасць у сваёй праваце. Ніякай сур’ёзнай рацыянальнай асновы або стратэгіі ў такіх паводзінах я не бачу. Пры тым, што, на мой погляд, ніякіх сур’ёзных плюсаў такая бравада і гэтыя выказванні ў палітычным плане не даюць. Наадварот, яны многіх раздражняюць — значна больш людзей, чым тых, хто можа ацаніць правядзенне такіх масавых мерапрыемстваў пазітыўна», — сказаў Казакевіч.
Паводле udf.by