Дасье ў карыкатурах: Новая халодная вайна
Амерыка робіць заяўку на жорсткі варыянт для Кітая, пагражаючы ў перспектыве яму нават «нябытам». Супрацьстаянне двух гігантаў, якое ўжо называюць новай халоднай вайной, відавочна, скалане падмурак сусветнай сістэмы не горш за каронавірус. Лепш зразумець як Вашынгтон і Пекін дайшлі да жыцця такога, дапамогуць карыкатуры.
Адразу, на жаль, даводзіцца канстатаваць, што рана ці позна нешта такое павінна было здарыцца. Яшчэ ў часы Абамы Белы Дом актыўна ўмешваўся ў тэрытарыяльныя спрэчкі ў Паўднёва-Кітайскім моры, праектаваў аб'яднанне Транс-Ціхаакіянскага партнёрства. Усё гэта павінна было «стрымаць» Кітай, які прыкладна ў 2030-м, па разліках экспертаў, мог закрыць эру амерыканскай глабальнай дамінацыі. Антыкітайскай рыторыкі прытрымліваўся і Трамп. Яшчэ падчас выбарчай кампаніі ён абяцаў абараніць інтарэсы амерыканскага бізнесу і рынку працы, у якога кітайскія вытворцы адымаюць працоўныя месцы. Адсюль у асноўным растуць карані тарыфнай вайны з КНР, якая пачалася ў 2017-м. Цяжка сказаць, хто ў выніку перамог, у сілу ўзаемнай залежнасці эканомік ЗША і Кітая. Крытыкам гандлёвага канфлікту быў і карыкатурыст выдання The Week (ЗША).
Бліжэй да канца 2019 года Вашынгтон і Пекін пачалі і змякчаць пазіцыі. Многія загаварылі аб вялікай дамове. Але тут ва Ухані з'явіўся небяспечны вірус, які ў сакавіку дабраўся да Штатаў. Нягледзячы на планы прэзідэнта аказаць фінансавую дапамогу ў памеры каля 2 трыльёнаў долараў сектарам эканомікі і выдачу «жывых» грошай насельніцтву, пазбегнуць выбуховага росту беспрацоўя і абвалу эканомікі не атрымалася. Адначасова дэмакраты абвінавачваюць прэзідэнта ў масавай гібелі амерыканцаў ад віруса. У такой сітуацыі амерыканскі гарант, здаецца, вырашыў перакласці адказнасць на кітайскіх камуністаў, якія, нібыта, амаль свядома экспартавалі эпідэмію ў Штаты. The Print, адно з блізкіх да рэспубліканцаў СМІ, параўноўвае распаўсюджванне эпідэміі з сучасным варыянтам «доўгага марша» — вядомай стратэгічнай аперацыі Мао Цзэ Дуна падчас грамадзянскай вайны ў Кітаі.
Усе межы Трамп перайшоў 7 траўня, калі выдаў наступны пасаж: «Мы бачым самы сур'ёзны напад на нашу краіну за ўсю нашу гісторыю. Гэта самая сур'ёзная атака з усіх, што былі. Горш, чым Пёрл-Харбар, горш, чым Сусветны гандлёвы цэнтр. Такой атакі ніколі раней не было». Параўнанне віруса, які паўстаў у Кітаі, з двума самымі вядомымі нападамі ў гісторыі ЗША, шакавала ўсіх. Афіцыйныя асобы прызнаюць, што Трамп ужо не зможа змякчыць сваю лінію ў дачыненні да Пекіна нават у тым выпадку, калі ён пераможа на выбарах у лістападзе. З іншага боку, ёсць думка, што гэта — старая завядзёнка Трампа — перакладаць адказнасць на іншых. Мастак рэсурсу Political Cartoons у якасці рэакцыі на згаданую прамову графічна прапанаваў прэзідэнту запусціць шоу «Хто будзе вінаваты сёння?»
А што Кітай? Там упэўненыя, што янкі не рызыкнуць на нешта сур’ёзнае. Бо ў рукаве ў Пекіна ёсць козыр! Кітай з'яўляецца найбуйнейшым крэдыторам амерыканскага ўрада. Тэарэтычна Кітай можа выклікаць паніку на рынку дзярждоўгу ЗША, калі пазбавіцца ад часткі амерыканскіх казначэйскіх каштоўных папер. У гэтым выпадку цэны на казначэйскія аблігацыі паваляцца, працэнтныя стаўкі на рынку ЗША вырастуць, што выкліча рэзкі рост амерыканскіх пазык, крах долара і г.д. Карыкатурыст праўладнага кітайскага выдання China Daily арыгінальна адлюстраваў сцэну, калі Кітай запатрабуе ў янкі плаціць па даўгах.
Нягледзячы на тое, што ЗША і Кітай геаграфічна вельмі далёка, наша зона можа таксама стаць арэнай супрацьстаяння. Суседняя Масква выступае саюзнікам Кітая. Таму тэарэтычна амерыканцы могуць паспрабаваць нанесці па ёй удар, выкарыстоўваючы падкантрольную Украіну, што пагражае рэгіянальнай эскалацыяй. Зрэшты, можа быць і зваротная сітуацыя — калі ЗША паспрабуюць адарваць Крэмль ад Кітая, то магчымыя і некаторыя зрухі па нармалізацыі адносінаў Масквы і Кіева. Іншымі словамі, Пекін і Вашынгтон калі і будуць адкрыта канфліктаваць, то чужымі рукамі, далёка ад сваіх межаў. Не выключаюць і іншы фармат канфрантацыі. Напрыклад, праз гонку ўзбраенняў. Пакуль з упэўненасцю можна казаць толькі аб тым, што свет, на жаль, імкліва ляціць у бездань новай халоднай вайны. На гэтую тэму малюнак у выданні Independent (Індыя).
