Дасье ў карыкатурах. Рух супраць каранціну ў ЗША: «Дайце мне права заразіцца!»
З сярэдзіны красавіка Штаты ахапілі масавыя пратэсты супраць каранціну, якія ў выніку выліліся нават ва ўзброеныя захопы афіцыйных устаноў. Разабрацца ў феномене амерыканскага бунту дапамогуць карыкатуры.
Прычыны такой рэакцыі, у прынцыпе, відавочныя. Каранцінныя мерапрыемствы падарвалі эканоміку і пагоршылі матэрыяльнае становішча шэраговых амерыканцаў. Акрамя таго, рэжым каранціну, які прадугледжвае вялікія штрафы за яго парушэнне, усё больш негатыўна ўспрымаецца людзьмі. Высмейваюць каранцін і мастакі. На малюнку рэсурсу Political Cartoon паліцыянты дапытваюць курыцу, якая выйшла на дарогу, тым самым парушыўшы рэжым самаізаляцыі. «Якая прычына выхаду? Ці чыталі вы папярэджанне губернатара? Трымайце крылы за спіной», — кажуць копы.
Пачынаючы з сярэдзіны красавіка ў многіх гарадах ЗША праходзяць мітынгі праціўнікаў каранціну, якія збіраюць ад некалькіх соцень да тысяч удзельнікаў. Асноўнае патрабаванне пратэстуючых — «Reopen!» («адкрыйце зноў», г.зн. «спыніце ізаляцыю»). Лозунг суправаджаюць іранічныя патрабаванні: «Дайце мне права заразіцца каронавірусам!» або «Хачу падстрыгчыся» (праца цырульняў падчас каранціну забароненая). Пры гэтым ЗША працягваюць заставацца безумоўным сусветным лідарам па колькасці тых, хто заразіўся вірусам (больш за мільён ) і памерлых ад выкліканых ім захворванняў. Таму ўдзел у калектыўных публічных акцыях, падчас якіх ёсць вялікая рызыка заразіцца, многія разглядаюць як гульню ў рускую рулетку. Малюнак мастака Джона Кола.
Выступы з самага пачатку ўзялі пад кантроль правыя і кансерватыўныя арганізацыі. Таму іх спікерамі агучваюцца самыя брутальныя і антынавуковыя тэорыі паходжання эпідэміі і тое, як лячыць хваробу. Напрыклад, кажуць пра тое, што каронавірус — гэта кара Божая за гомасексуалізм і захапленне дактрынамі сацыялізму. З падобных рэцэптаў смяецца мастак выдання Colombia Missurian. На яго малюнку актывісты руху Reopen патрабуюць спыніць дыктатуру навукоўцаў і вярнуць ім права быць хворымі.
Акцыі супраць каранціну хутка наклаліся на канфлікт Дональда Трампа і губернатараў (як правіла, сябраў дэмпартый). Апошнія адмаўляюцца выконваць інструкцыю Белага дому — дазволіць працу бізнесу. У адказ Трамп асабіста падтрымаў праціўнікаў каранціну ў Twitter, запісаўшы губернатараў у праціўнікі свабоды. Многія амерыканцы сапраўды разглядаюць каранцін як замах на свае грамадзянскія правы і спробу ўсталяваць дыктатуру. Гэтую ідэю даносяць карыкатурысты, якія сімпатызуюць рэспубліканцам, напрыклад, Міхаэль Прамірэз. На яго малюнку губернатар Мічыгана спрабуе кантраляваць, якімі сталовымі прыборамі мічыганцы ядуць салату.
30 красавіка рух супраць каранціну ў ЗША выйшаў на якасна новы ўзровень: узброеныя прыхільнікі Reopen прарваліся ў парламент штата Мічыган. Такой выхадкі найноўшая гісторыя Штатаў яшчэ не ведала, хоць наўрад акупацыя скончыцца абвяшчэннем нейкай Мічыганскай Народнай Рэспублікі. Хутчэй за ўсё штурм яшчэ больш радыкалізуе рух супраць каранціну, прымушаючы Трампа яшчэ больш рашуча дамагацца выхаду гаспадаркі з каранціну. Рост нацыянальнай эканомікі становіцца для прэзідэнта галоўным шанцам умацаваць сваю перадвыбарчую пазіцыю. Што тычыцца пагроз эпідэміі, то прэзідэнт, мяркуючы па ўсім, будзе іх мінімізаваць ці не заўважаць. Мастаку газеты Boston Globe гэта нагадала сюжэт культавага фільма «Сківіцы», паводле сюжэту якога дырэкцыя курорта адчыняе пляжы нягледзячы на пагрозу акулы-людажэра.
