Дасье ў карыкатурах: Канец брытанскай манархіі?
Увесь свет і натуральна Брытанія абмяркоўвае сенсацыю, якая часам зацямняе тэму Ірану. Гаворка пра рашэнне прынца Гары і яго жонкі Меган скласці з сябе паўнамоцтвы членаў каралеўскай дынастыі. Такога ўдару па прэстыжу манархіі не было з часоў смерці прынцэсы Дзіяны.
У прынцыпе, ад Гары заўжды можна чакаць нейкага выбрыку. Ён ніколі не адрозніваўся прыкладнымі паводзінамі і арыстыкратызмам, уласцівым асобам каралеўскай крыві. Перш, чым ажаніцца з Меган, ён быў сталым героем скандальных хронік. Самым буйным скандалам быў прыход на вечарыну ў форме Вермахта з нашыўкай у выглядзе свастыкі. Толькі шчырыя прабачэнні, якія прынёс прынц антыфашысцкім і яўрэйскім арганізацыям, выратавалі яго імідж. А магчыма, усёй дынастыі. Іранізуючы над густамі сям’і Вінздар, карыкатурыст Дэйв Грунланд адлюстраваў прынца, які дзякуе каралеве за тое, што яна не дазволіла пайсці на вечарынку ў касцюме нацыста. Замест гэтага ён збіраецца надзець прапанаваны Лізаветай касцюм сябра арганізацыі Ку-Клус-Клан.
Але ўсе папярэднія выбрыкі Гары блякнуць на фоне выбару спадарожніцы жыцця. У 2018-м Гары «распісаўся» з Меган Маркл, амерыканскай актрысай, якая знялася ў некалькіх тэлевізійных праектах. Гэта быў скандал скандалаў. Нягледзячы на еўрапейскую знешнасць, у венах Меган цячэ кроў афрыканскіх рабоў, што не спадабалася кансерватыўнай фракцыі брытанскага грамадства. На малюнку інтэрнет-рэсурса Clautoons адна з такіх рэтраградак выклікае паліцыю, паколькі «падчас шлюбнай цырымоніі з’явілася чарнаскурая персона».
Нейкі час падавалася, што Меган стала сваёй для сямейкі Вінздар. Аднак у выніку ідыліі не атрымалася. Днямі Меган схіліла Гары адмовіцца ад тытулаў, каб адправіцца жыць за акіян. Прыхільнікі Меган сцвярджаюць, што яна не вытрымала моцны псіхалагічны ціск з боку рэзідэнтаў Букінгемскага палацу. Так ці інакш, «Мегзіт» (так іранічна называюць дэзертырства Гары і Меган па аналогіі з Брэкзітам) стаў моцным ударам па прэстыжы дынастыі. Крыніцы, блізкія да сям’і, сцвярджаюць, што каралева ўспрыняла такі ўчынак як здраду і зараз вельмі нервуецца. Сітуцыю праілюстравала выданне The Australian (Аўстралія). На малюнку Лізавета Другая прапануе Гары і Меган ехаць з краіны на карэце з гарбуза.
Выхадка Гары і Меган таксама значыць пачатак новага раунду барацьбы за тытул пераемніка Лізаветы. Напярэдадні Новага года з'явілася інфармацыя, што Лізавета II пачала працэдуру падрыхтоўкі адрачэння ад пасады на карысць свайго старэйшага сына — 71-гадовага прынца Чарльза. Паведамлялася, што Лізавета II перадасць яму трон праз два гады. Пасля такія плёткі афіцыйна аспрэчылі. Аднак сама перспектыва таго, што наступным каралём будзе Чарльз, якага лічаць ледзь не замоўцам забойства Дзіяны, вельмі не падабаецца простым брытанцам. Традыцыйна негатыўна выяўляюць каралеўскія амбіцыі прынца і карыкатурысты. Малюнак выдання Guardian.
Аднак прыход Чарльза на трон — яшчэ не самае жудаснае. Прэса адзначае, што дэмарш Гары і Меган можа мець далёка ідучыя наступствы. Сыход вельмі папулярнага ў народзе Гары можа распаліць рэспубліканскія рухі ва ўсіх краінах Садружнасці і нават у самой Брытаніі. Каб завочна спыніць хвалю антыманархічных выступаў, газета Financial Times ужо прапанавала рэферэндум з нагоды захавання інстытута каралеўскай улады. У сваю чаргу, аналітыкі чакаюць, што супраць фармальнага падпарадкавання брытанскай кароне вось-вось паўстане Аўстралія, дзе рэспубліканскія ідэі падтрымлівае да 75 адсоткаў моладзі. Малюнак мясцовага выдання Eureka Street.
Такім чынам, набывайце папкорн: пачынаецца новы сезон непрадказальнага і інтрыгуючага серыяла «Брытанская карона».