Саакашвілі хочуць судзіць за разгон мітынгу ў Тбілісі

Галоўная пракуратура Грузіі ў панядзелак вынесла пастанову аб прыцягненні былога прэзідэнта Грузіі Міхаіла Саакашвілі да крымінальнай адказнасці ў якасці абвінавачанага.



Як кажуць у пракуратуры, справа тычыцца разгону мітынгоўцаў 7 лістапада 2007 года, уварвання ў тэлекампанію «Імеды» і незаконнай перадачы маёмасці Бадры Патаркацышвілі. 
Па словах прадстаўнікоў пракуратуры, абвінавачванні павінны быць прад'яўлены на працягу 24 гадзін пасля вынясення пастановы і з улікам таго, што Саакашвілі пазбягае яўкі ў следчыя органы, права наняць адваката ёсць у яго сям'і. 
Акрамя Саакашвілі, абвінаваўчыя пастановы за перавышэнне службовых паўнамоцтваў вынесены таксама ў дачыненні да тагачасных міністра ўнутраных спраў Вано Мерабішвілі, генеральнага пракурора Зураба Адэішвілі, міністра абароны Давіда Кезерашвілі і мэра Тбілісі Гігі Угулава. 
Следства працягваецца па трэцяй частцы артыкула 333, які прадугледжвае пазбаўленне волі тэрмінам ад пяці да васьмі гадоў, заяўляе пракуратура. 
Заявы пракуратура Грузіі зрабіла пасля таго, як Саакашвілі не з'явіўся ў галоўную пракуратуру ў панядзелак раніцай, куды ён быў выкліканы ўжо ў другі раз для дачы паказанняў у якасці сведкі. 
Саакашвілі, які пасля заканчэння свайго другога прэзідэнцкага тэрміну пакінуў Грузію, назваў абвінавачванні ў яго адрас «чыста палітычнымі».

Абвінавачванні экс-прэзідэнту 

Па дадзеных пракурораў, у лістападзе 2007 года, калі ў Тбілісі праходзілі антыўрадавыя акцыі, па заданні Саакашвілі ў будынку МУС прайшло надзвычайнае пасяджэнне, якім кіраваў тагачасны міністр унутраных спраў Вано Мерабішвілі. 
Пракуратура заяўляе, што на пасяджэнні было вырашана скласці спіс асоб, якія ўдзельнічалі ў антыўрадавых акцыях, на якіх планавалася аказаць розныя формы ціску. 
Так, 7 лістапада 2007 года ў час разгону мітынгоўцаў ў Тбілісі былі незаконна ужытыя гумовыя кулі і сотні грамадзян былі жорстка збітыя. 
«Спецназ фізічна расправіўся з напалоханымі мітынгоўцамі, якія хаваліся ў крамах і аптэках», — заяўляе пракуратура. 
У гэты ж дзень у тэлекампанію «Імеды» уварваўся атрад спецыяльнага прызначэння МУС, пасля чаго супрацоўнікі тэлекампаніі былі выдвараныя з будынка, а вяшчанне тэлеканала было спынена. 
Пракуратура заяўляе, што пасля гэтага службовыя асобы па заданні Саакашвілі пачалі працэс незаконнай канфіскацыі тэлекампаніі у яе ўладальніка Бадры Патаркацышвілі, які завяршыўся ўжо пасля яго смерці. 
«Пасля гэтага быў уведзены кантроль над тэлекампаніяй з боку ўладаў, у якім удзельнічалі высокапастаўленыя асобы, у тым ліку Георгій Угулава [былы мэр Тбілісі], які цалкам кантраляваў інфармацыйную палітыку канала», — гаворыцца ў заяве пракуратуры. 
У заяве пракуратуры таксама ідзе гаворка аб іншых аб'ектах, незаконна канфіскаваных, паводле абвінавачання, у сям'і Патаркацышвілі, але ў далейшым ёй вернутых. 
Што тычыцца тэлекампаніі, то доля ў 90% «Імеды» была вернута сям'і Патаркацышвілі ўжо пасля парламенцкіх выбараў 2012 года, адзначае пракуратура.

Закон і палітыка 

Адвакаты абвінавачаных заяўляюць, што яны пакуль не азнаёмленыя з матэрыяламі справы і ім невядомыя доказы, на падставе якіх абвінавачваюцца былыя высокапастаўленыя асобы і экс-прэзідэнт. 
Сам Саакашвілі на сваёй старонцы ў сацыяльнай сетцы Facebook заявіў, што пасля таго, як у яго не змаглі знайсці ні нібыта скрадзеныя ім мільярды, бо ён ніколі ні прысвойваў ні капейкі, ні даказаць якое-небудзь канкрэтнае злачынства, бо ён нічога падобнага не здзяйсняў, яму прад'явілі «чыста палітычнае абвінавачванне». 

Ён адзначыў, што ў 2007 годзе падаў у адстаўку, а ў 2012 годзе мірна перадаў уладу тым людзям, якія адказалі яму чорнай няўдзячнасцю. 
«Сёння ў Расіі святкуюць гэта дасягненне, і [былы прэм'ер-міністр Грузіі Бідзіна] Іванішвілі, напэўна, будзе годна ацэнены за выкананне указанняў», — піша Саакашвілі, дадаючы, што радасці Пуціна і Іванішвілі «хутка прыйдзе канец». 
«Сусветныя працэсы развіваюцца такім чынам, што шчупальцы Пуціна слабеюць з кожным днём, мы абавязкова вызвалімся ад алігарха, і Грузія акрыяе і пераможа раз і назаўсёды», — напісаў на сваёй старонцы экс-прэзідэнт. 
Пасля парламенцкіх выбараў 2012 года мноству былых чыноўнікаў былі прад'яўленыя абвінавачванні, а некаторыя службовыя асобы апынуліся за кратамі. 
Кіруючая кааліцыя абвяргае абвінавачванні апазіцыі ў палітычным пераследзе апанентаў, а заявы апазіцыі адносна служэння былога экс-прэм'ера Бідзіны Іванішвілі расійскім інтарэсам называе «абсурднымі». 
Між тым, згодна з пракуратурай, следства знаходзіцца ў заключнай стадыі па астатніх справах, па якіх Саакашвілі быў выкліканы ў якасці сведкі. 
У сакавіку Саакашвілі быў выкліканы ў пракуратуру ў якасці сведкі па цэлым шэрагу нашумелых спраў, у тым ліку і па вызначэньні абставінаў смерці прэм'ер-міністра Зураба Жванія. 
Ён тады адмовіўся даваць паказанні пракуратуры, але выказаў гатоўнасць даць паказанні па Skype суду.
bbc.co.uk