У ЕС узяліся за стварэнне санкцыйнага спісу беларускіх чыноўнікаў — Жазэп Барэль
Міністры замежных спраў краін — сябраў Еўрапейскага саюза дамовіліся вызначыць спіс беларускіх чыноўнікаў, супраць якіх будуць уведзеныя санкцыі за фальсіфікацыі вынікаў прэзідэнцкіх выбараў і гвалт з пратэстоўцаў.
Еўрапейскі саюз не прызнае вынікі прэзідэнцкіх выбараў у Беларусі.
Пра гэта віцэ-прэзідэнт Еўрапейскай камісіі, высокі прадстаўнік ЕС па
пытаннях знешняй палітыкі і бяспекі Жазэп Барэль паведаміў на прэс-канферэнцыі
ў Берліне пасля нефармальнага пасяджэння кіраўнікоў МЗС краін — сябраў ЕС, якое
адбылося 27–28 жніўня. Прэс-канферэнцыя транслявалася на сайце аўдыёвізуальных
паслуг Еўракамісіі, паведамляе УНІАН.
У прыватнасці, кіраўнікі МЗС краін ЕС разгледзелі сітуацыю ў Беларусі.
"Паміж міністрамі была палітычная дамоўленасць вызначыць канкрэтных асобаў, адказных за несумленныя выбары ў Беларусі і за далейшае падаўленне (пратэстаў) у адпаведнасці з дзейным санкцыйным рэжымам у дачыненні да Беларусі. Гэта вызначэнне павінна ўключаць чыноўнікаў", — падкрэсліў Барэль.
Паводле яго слоў, спіс асобаў і адпаведныя прававыя акты будуць падрыхтаваныя бліжэйшымі днямі працоўнымі групамі Савета ЕС, каб канчатковае рашэнне было прынята як мага хутчэй.
"І ў сувязі з гэтым — я толькі што атрымаў ліст, падпісаны 11 чальцамі Рады ЕС, якія просяць зрабіць гэта як мага хутчэй, настойваюць на больш хуткім прыняцці рашэння, але мы павінны гэта зрабіць у адпаведнасці з усімі прававымі працэдурамі", — падкрэсліў Барэль.
"Вы выдатна ведаеце, што Еўрапейскі саюз не прызнае вынікі выбараў і лічыць дзеянні (беларускай) улады непрымальнымі. Мы зноў выказваем абсалютную падтрымку суверэнітэту і незалежнасці Беларусі, асуджаем жорсткія рэпрэсіі ў дачыненні да беларускага народа і просім уладу далучыцца да ўсебаковага дыялогу, каб выйсці з крызісу", — заявіў Барэль.
Таксама ён падкрэсліў, што беларускія ўлады павінны прыняць прапанову кіраўніцтва АБСЕ па візіце ў Беларусь для садзейнічання наладжванню дыялогу паміж уладай і апазіцыяй. У сваю чаргу Еўрасаюз падтрымлівае гэтую прапанову.
Паводле УНІАН