У Цярнопалі на Народнай алімпіядзе кідалі брукавы камень і разбіралі аўтамат Калашнікава

Замежжа

Своеасаблівы шарж на Алімпіяду ў Сочы зладзілі ўчора ў Цярнопалі — у горадзе правялі Народную Алімпіяду.



narodnaya_alimpijada.jpg

Удзельнікі спаборніцтваў кідалі на трапнасць брукавы камень, гранаты, разбіралі на час аўтаматы Калашнікава, пераадольвалі перашкоды з шын, спаборнічалі ў перацягванні канату, пераносе параненых, стараліся як найхутчэй апрануць касцюм хімабароны і процігаз, удзельнічалі ў выпрабаванні "сценка на сценку", падчас якога адна з каманд адцясняла іншую з металічнымі ахоўнымі шчытамі.

"Народная алімпіяда з'яўляецца толькі пачаткам для падрыхтоўкі грамадзян да дзеянняў у надзвычайных сітуацыях. Сёння кожны ўкраінец павінен умець абараніць сябе і мы гэтыя ўменні трэніруем падчас спаборніцтваў. Яны таксама з'яўляюцца нашай рэакцыяй на Алімпіяду ў Сочы. Бо ўсе разумеюць, што рэжым Пуціна адказны за падзеі ў нашай дзяржаве, менавіта ён стаіць за адмовай Украіны ад еўраінтэграцыі. На жаль, ніякай рэакцыі ніякай дзяржавы свету на гэты не было" , - сказаў намеснік гарадскога галавы Леанід Біцюра.


Эмблемай Народнай алімпіяды сталі пераплеценыя кольцы з шын і мішэнь.
"Аўтамабільная шына стала сімвалам рэвалюцыі, а мішэнь азначае, што кожны жыхар Украіны знаходзіцца пад прыцэлам беззаконьня з боку ўлады і сілавікоў", - растлумачыў сутнасць эмблемы Леанід Біцюра.
Першым у праграме алімпіяды было кіданне брукавага камню ў цэль з адлегласці 15 метраў.

"На Грушэўскага ў мяне неяк лепей атрымлівалася", - кажа малады чалавек пасля таго, як у чарговы раз не трапляе ў расстаўленыя на адлегласці колы.


У цэлым гэта было адно з самых цяжкіх выпрабаванняў - патрапіць унутр кола брукавым камнем мала хто змог.

"Сёння я ўпершыню кідаў брук, гэта мой першы вопыт, спадзяюся ён мне не спатрэбіцца. Бо таго, што адбываецца на Грушэўскага, не падтрымліваю. Але тое, што ўлада давяла людзей да таго, што яны кідаюць брук - гэта ганьба для ўлады. Я на алімпіядзе прадстаўляю ўкраінцаў Вялікабрытаніі. Жыву там з 1997 года з сям'ёй, дзеці там вучацца ў універсітэтах. І мне вельмі шкада нашу моладзь, бо нашым людзям не далі наблізіцца да гэтага, каб у любы момант пабываць у Еўропе, убачыць цывілізаваны свет. І я сёння тут, каб падтрымаць Цярнопаль, таму што хачу, каб і мае дзеці маглі тут быць такія ж шчаслівыя, як яны шчаслівыя ў Еўропе", - кажа удзельнік Алімпіяды, ураджэнец Цярнопаля Яўген Дзмітрык.


Маладыя людзі ў асноўным удзельнічалі ў тых выпрабаваннях, якія патрабавалі сілавой падрыхтоўкі. Затое на разборку аўтамата Калашнікава каманды дэлегавалі старэйшых. Узнагародзяць пераможцаў сёння падчас Народнага веча на Тэатральнай плошчы.

gazeta.ua