Надыходзіць эра распусты?

Аўтарытэтнае выданне Financial Times прапанавала цікавую трактоўку феномена Roaring twenties («Равучыя дваццатыя»).

Так вельмі часта называюць другую дэкаду мінулага стагоддзя, якой былі ўласцівыя лібералізацыя маральных нораваў, эмансіпацыя жанчын, калектыўнае захапленне музыкай (джаз), цікавасць да алкаголю і гэтак далей.

Дагэтуль гісторыкі не разумеюць, чаму сто гадоў таму людзей ахапіў такі ўгар геданізму. Лічылася, што гэта было вынікам Першай сусветнай вайны. Тыя, хто выжыў у крывавай мясарубцы, натуральна, намагаліся праз танцы, секс і алкаголь забыць жахі вайны. У сваю чаргу, Financial Times нагадаў, што людзі хацелі не толькі забыць пра вайну, але і пра эпідэмію «іспанкі» — грыпу, які на мяжы 1920-х забіў каля 20 мільёнаў чалавек на планеце. Калі эпідэмія прайшла, людзей ахапіла эйфарыя, якая вылілася ў глабальную гулянку.

Гэтая версія дазваляе задумацца: што будзе пасля таго, як скончыцца эпідэмія каронавіруса? Няўжо таксама нейкі аналаг Roaring twenties? На думку выдання — менавіта так.

Паводле брытанскай прэсы