Вярхоўны суд ЗША прыпыніў выкананне смяротных прысудаў на федэральным узроўні

У бліжэйшыя два месяцы планавалася прывесці ў выкананне чатыры смяротныя прысуды, вынесеныя федэральнымі судамі ЗША.

Вярхоўны суд ЗША прыпыніў выкананне смяротных прысудаў, вынесеных федэральнымі судамі. Суд адхіліў хадайніцтва адміністрацыі Дональда Трампа, якая спрабавала адмяніць часовую забарону на выкананне вышэйшай меры пакарання на федэральным узроўні, паведамілі ўвечары ў пятніцу, 6 снежня, амерыканскія СМІ.
Такім чынам у бліжэйшы час не будуць прыведзеныя ў выкананне чатыры смяротныя прысуды. Аднаго з асуджаных планавалася пакараць смерцю раніцай 9 снежня, яшчэ трох — да канца студзеня. Прывядзенне ў выкананне яшчэ аднаго смяротнага прысуду, пра які першапачаткова ішла гаворка, было ўжо раней прыпынена ў сувязі з іншым працэсам.

Нефармальны мараторый на смяротнае пакаранне

2 снежня адміністрацыя ЗША звярнулася ў Вярхоўны суд з просьбай адмяніць вынесенае ў той самы дзень рашэнне апеляцыйнага суда ў Вашынгтоне, якія забараніў выкананне смяротных прысудаў федэральных судоў. Пры гэтым урад спаслалася на "неймаверную жорсткасць" асуджаных да вышэйшай меры пакарання злачынцаў.
Судовая цяжба вядзецца не адносна смяротнага пакарання як такога, а метаду яго выканання. Суд у Вашынгтоне палічыў недапушчальным адхіленне ад дзеючай з 1994 года нормы аб прымяненні смяротнай сумесі з трох рэчываў, а урад планаваў прымяніць смяротную дозу аднаго рэчыва — псіхатропнага прэпарата пентабарбітал.
У канцы ліпеня міністэрства юстыцыі ЗША паведаміла пра аднаўленне выканання смяротных прысудаў на федэральным узроўні пасля перапынку амаль у 20 гадоў. Генеральны пракурор Уільям Барр адзначыў, што ў снежні і студзені плануецца караць смерцю пецярых зняволеных у турме Тэры-Хот ў Індзіане. Гаворка ідзе пра найбольш жорсткіх злачынцаў, усе яны былі асуджаныя за забойства, у тым ліку дзяцей, і чакаюць пакарання больш за 15 гадоў.
У апошні раз смяротны прысуд федэральнага суда ЗША быў выкананы ў 2003 годзе. Мараторый на кары на федэральным узроўні быў нефармальным, Мінюст ЗША правяраў працэдуру прымянення смяротнай ін'екцыі. За гэты час вышэйшая мера пакарання ажыццяўлялася асобна ў шэрагу штатаў. У цяперашні час у ЗША прысуджаныя да смяротнага пакарання больш за 2600 чалавек.

Трамп — прыхільнік смяротнага пакарання

Прэзідэнт Дональд Трамп з'яўляецца прыхільнікам вышэйшай меры пакарання. У прыватнасці, у пачатку жніўня пасля страляніны ў Тэхасе і Агаё ён заявіў, што ЗША павінны ўвесці вышэйшую меру пакарання для злачынцаў, якія ўчынілі масавыя забойствы. «Я даручаю міністэрству юстыцыі прапанаваць закон, які гарантуе, што тыя, хто здзяйсняюць злачынствы на глебе нянавісці і масавыя забойствы, будуць прысуджаныя да смяротнага пакарання», — паведаміў прэзідэнт. Ён падкрэсліў, што вышэйшая мера пакарання будзе прымяняцца «хутка, рашуча і без непатрэбных шматгадовых адтэрміновак».
Па дадзеных арганізацыі Death Penalty Information Center, смяротнае пакаранне адмененае ў прыкладна 20 з 50 штатаў, у прыватнасці ў Нью-Йорку.
dw.com