Венесуэла прапанавала прытулак Сноўдэну
Прэзідэнт Венесуэлы Нікалас Мадура гатовы прадаставіць палітычны прытулак выкрывальніку амерыканскіх спецслужбаў Эдварду Сноўдэну. Пра гэта паведамляе CNN са спасылкай на венесуэльскае дзяржаўнае інфармагенцтва.
«Я
вырашыў даць гуманітарны прытулак маладому амерыканцу Эдварду Сноўдэну, каб ён мог жыць на радзіме Балівара і Чавеса у месцах, далёкіх ад пераследу паўночнаамерыканскай
імперыі»,
—
заявіў Мадура. Просьба аб прытулку паступіла ад Сноўдэна ў маскоўскую амбасаду
Венесуэлы.
Раней у пятніцу прэзідэнт
Нікарагуа Даніэль Артэга заявіў, што яго краіна з радасцю дасць прыстанішча Сноўдэну, «калі дазволяць
абставіны». Ён дадаў, што Нікарагуа — адкрытая краіна, якая паважае права на прытулак.
У той жа дзень стала
вядома, што парламент Ісландыі да завяршэння бягучай сесіі не паставіць на галасаванне пытанне пра прытулак для Сноўдэна. Група дэпутатаў, якая выступіла з гэтай ініцыятывай, не знайшла падтрымкі ў спікера і
калегаў.
У аўторак
прэзідэнт Балівіі Эва Маралес заявіў, што яго краіна гатовая разгледзець пытанне пра прытулак для Сноўдэна, хоць і не атрымлівала ад яго запыту. Пасля гэтага самалёт Маралеса здзейсніў вымушаную пасадку ў Вене па шляху з Масквы. Улады Францыі, Партугаліі і
Іспаніі адклікалі дазвол на выкарыстанне ім сваёй паветранай прасторы, баючыся, што на борце можа знаходзіцца Сноўдэн.
Як адзначае The New York
Times, у Сноўдэна могуць узнікнуць складанасці з пералётам ў Венесуэлу, калі ён прыме прапанову Мадура. Паміж Масквой і Каракасам няма прамых рэйсаў, звычайна маршрут уключае перасадку ў
Гаване. Пакуль невядома, ці дадуць кубінскія ўлады дазвол на транзіт. Акрамя таго, улады краін ЕС не дазволяць выкарыстоўваць сваю паветраную прастору. Альтэрнатывай магла бы стаць адмова ад трансатлантычнага пералёту, піша выданне. У гэтым выпадку Сноўдэну прыйдзецца ляцець праз Ціхі акіян з дазапраўкай ва
Уладзівастоку.
Усяго Сноуден папрасіў прытулку болей чым у 20 краінах. Яму ўжо адмовілі Францыя, Італія, Нідэрланды, Польшча, Аўстрыя, Фінляндыя, Ірландыя і
Іспанія. З краін ЕС, дзе Сноўдэн папрасіў прытулку, толькі
Германія пакуль не дала афіцыйнага адказу на гэты запыт.
Лічыцца, што Сноўдэн з 23
чэрвеня знаходзіцца ў транзітнай зоне маскоўскага аэрапорта «Шарамеццева», куды прыляцеў з Ганконга.
Амерыканскія ўлады анулявалі яго пашпарт. Расійскія ўлады сцвярджаюць, што Сноўдэн не перасякаў мяжу краіны.
У пачатку чэрвеня Сноўдэн распаўсюдзіў сакрэтны ордэр суда, па якім спецслужбы ЗША атрымалі доступ да ўсіх званкоў найбуйнейшага сотавага аператара Verizon, а таксама дадзеныя аб сакрэтнай праграме амерыканскага Агенцтва нацбяспекі PRISM, якая дазваляе адсочваць электронныя камунікацыі на найбуйнейшых сайтах. Улады ЗША заявілі, што ўцечкі нанеслі сур'ёзны ўрон нацбяспецы краіны.