Дзесяць гадоў таму не стала Алега Лойкі

19 лістапада 2008 года ў Слоніме не стала аднаго з самых выбітных асобаў Беларусі, пісьменніка, доктара філалагічных навук, прафесара, члена-карэспандэнта Нацыянальнай Акадэміі Навук, лаўрэата Дзяржаўнай прэміі Беларусі імя Якуба Коласа,былога дэкана філалагічнага факультэта Белдзяржуніверсітэта Алега Лойкі (1931-2008).



Алег Лойка быў родам са Слоніма. Ён любіў свой родны горад над Шчарай. Адсюль пайшоў у навуку, у літаратуру.

Скончыў філфак БДУ і аспірантуру пры кафедры беларускай літаратуры ўніверсітэта. Працаваў выкладчыкам у БДУ, загадчыкам кафедры, узначальваў універсітэцкае літаб’яднанне “Узлёт”.

Пры жыцці напісаў і выдаў больш за 100 кніг паэзіі, прозы, літаратуразнаўчых даследаванняў, перакладаў, падручнікаў.

Апошнія гады свайго жыцця ён жыў у родным Слоніме на Віленскай вуліцы. Памёр і пахаваны на гарадскіх могілках.

У гонар знакамітага слонімца названа адна невялікая вуліца на ўскрайку горада і адкрыты маленькі пакой-музей у Слонімскай раённай цэнтральнай бібліятэцы. Але гэтага даволі мала дзеля ўшанавання такой вялікай асобы, як Алег Лойка ў маштабах краіны.

Дзесяць гадоў таму мясцовыя чыноўнікі абяцалі па-сапраўднаму ўшанаваць імя Алега Лойкі. Гутарка ішла, каб адкрыць у яго гонар мемарыяьную шыльду на будынку ліцэя, дзе ён вучыўся, надаць яго імя гэтаму ліцэю. Устанавіць у Слоніме стыпендыю імя Алега Лойкі лепшым вучням школ горада і навучэнцам вучылішчаў. Адкрыць у Слоніме беларускі культурны цэнтр імя Алега Лойкі, дзе наладжваліся б і праводзіліся б літаратурна-музычныя вечары і сустрэчы. Устанавіць помнік свайму вялікаму земляку.

Але прайшло дзесяць гадоў, а да сённяшніх дзён няма ў Слоніме ні шыльды, ні помніка Алегу Лойку.

Барыс Баль, Беларускае Радыё Рацыя

Фота з архіва аўтара